കഫേകൾ, വിമാനത്താവളങ്ങൾ, ഹോട്ടലുകൾ തുടങ്ങിയ പൊതു ഇടങ്ങളിലെ സൗജന്യ വൈഫൈ (Wi-Fi) നെറ്റ്വർക്കുകൾ പലപ്പോഴും സൈബർ കുറ്റവാളികൾക്ക് ഡാറ്റ ചോർത്താൻ എളുപ്പമുള്ള മാർഗ്ഗമാണ്. ഈ പൊതു നെറ്റ്വർക്കുകൾ ഉപയോഗിക്കുമ്പോൾ സുരക്ഷാ ക്രമീകരണങ്ങളില്ലാത്തതിനാൽ ഹാക്കർമാർക്ക് എളുപ്പത്തിൽ കടന്നുകയറാനും വ്യക്തിഗത വിവരങ്ങൾ, ബാങ്കിംഗ് വിവരങ്ങൾ, സ്വകാര്യ സന്ദേശങ്ങൾ എന്നിവ മോഷ്ടിക്കാനും മാൽവെയറുകൾ സ്ഥാപിക്കാനും കഴിയും.
സൈബർ ആക്രമണങ്ങൾ വലിയ ബിസിനസ്സുകൾക്ക് മാത്രമേ സംഭവിക്കൂ എന്ന് പലരും കരുതുന്നുണ്ടെങ്കിലും, വേണ്ടത്ര സംരക്ഷണം ഇല്ലാത്ത വ്യക്തികളാണ് പലപ്പോഴും ഹാക്കർമാരുടെ എളുപ്പമുള്ള ലക്ഷ്യങ്ങൾ. മിക്ക പൊതു വൈഫൈ നെറ്റ്വർക്കുകളിലും ശക്തമായ എൻക്രിപ്ഷൻ ഉണ്ടാകില്ല. ചിലതിന് സുരക്ഷാ ക്രമീകരണങ്ങൾ ഒട്ടും ഉണ്ടാകുകയുമില്ല. ഇത് വാട്ട്സ്ആപ്പ് പോലുള്ള മെസ്സേജിങ് ആപ്പുകളിലെ സംഭാഷണങ്ങൾ, ഓൺലൈൻ പണമിടപാടുകൾ എന്നിവ അതീവ അപകടകരമാക്കുന്നു.
വാട്ട്സ്ആപ്പ് ഉൾപ്പെടെയുള്ള വിവരങ്ങൾ ചോർത്തുന്ന രീതികൾ
പാക്കറ്റ് സ്നിഫിങ് (Packet Sniffing): നെറ്റ്വർക്കിലൂടെ കൈമാറ്റം ചെയ്യപ്പെടുന്ന ഡാറ്റ ഹാക്കർമാർക്ക് ഈ രീതിയിലൂടെ പിടിച്ചെടുക്കാൻ കഴിയും.
ഈവിൾ ട്വിൻ (Evil Twin): യഥാർത്ഥ വൈഫൈ ആക്സസ് പോയിന്റുകൾക്ക് സമാനമായ വ്യാജ നെറ്റ്വർക്കുകൾ ഉണ്ടാക്കി ആളുകളെ അതിലേക്ക് കണക്ട് ചെയ്യിക്കുന്നു. കണക്ട് ചെയ്തു കഴിഞ്ഞാൽ, അവർക്ക് ബ്രൗസിങ് വിവരങ്ങൾ, പാസ്വേഡുകൾ, സെഷൻ കുക്കികൾ എന്നിവ കാണാൻ കഴിയും. ഇത് വഴി ഇമെയിൽ, ബാങ്കിങ്, സോഷ്യൽ മീഡിയ അക്കൗണ്ടുകൾ എന്നിവയിൽ പ്രവേശിക്കാനും സാധിക്കും.
മാൽവെയർ ആക്രമണം: നിങ്ങളുടെ സോഫ്റ്റ്വെയറുകളിൽ സുരക്ഷാ പിഴവുകൾ ഉണ്ടെങ്കിൽ വിദൂരമായി മാൽവെയർ കടത്തിവിട്ട് വിവരങ്ങൾ ചോർത്താൻ സാധ്യതയുണ്ട്.
സൈബർ ആക്രമണങ്ങൾ ഉപയോക്താക്കളുടെ ശ്രദ്ധയിൽപ്പെടാതെ നിശബ്ദമായി നടക്കുന്നതിനാൽ പലരും ഈ അപകടങ്ങളെക്കുറിച്ച് ബോധവാന്മാരല്ലെന്ന് ഗവേഷകർ മുന്നറിയിപ്പ് നൽകുന്നു.
പൊതു വൈഫൈയിൽ ലാപ്ടോപ്പ് സുരക്ഷിതമാക്കാനുള്ള വഴികൾ
പൊതു നെറ്റ്വർക്കുകൾ ഉപയോഗിക്കുമ്പോൾ സൈബർ ആക്രമണങ്ങളിൽ നിന്ന് രക്ഷനേടാൻ വിദഗ്ധർ നിർദേശിക്കുന്ന പ്രധാന മാർഗ്ഗങ്ങൾ ഇവയാണ്:
- വിർച്വൽ പ്രൈവറ്റ് നെറ്റ്വർക്ക് (VPN) ഉപയോഗിക്കുക: വി പി എൻ ഉപയോഗിക്കുമ്പോൾ നിങ്ങളുടെ ഡാറ്റാ ട്രാഫിക് എൻക്രിപ്റ്റ് ചെയ്യപ്പെടുന്നു. ഇത് സുരക്ഷിതമല്ലാത്ത നെറ്റ് വർക്കിൽ പോലും ഡാറ്റ ചോർത്തുന്നത് തടയും.
- HTTPS വെബ്സൈറ്റുകളിൽ മാത്രം ബ്രൗസ് ചെയ്യുക: വിലാസത്തിന്റെ തുടക്കത്തിൽ
https://എന്നും ഒരു പാഡ്ലോക്ക് ചിഹ്നവും ഉണ്ടോയെന്ന് ഉറപ്പുവരുത്തുക. എൻക്രിപ്റ്റ് ചെയ്ത സൈറ്റുകൾ സെൻസിറ്റീവ് വിവരങ്ങൾ സംരക്ഷിക്കും. - ഓട്ടോ-കണക്റ്റും ഫയൽ ഷെയറിങ്ങും ഓഫ് ചെയ്യുക: ഓട്ടോമാറ്റിക് വൈഫൈ കണക്ഷൻ, ബ്ലൂടൂത്ത് ഷെയറിങ്, നെറ്റ്വർക്ക് ഡിസ്കവറി എന്നിവ നിർജ്ജീവമാക്കുക.
- ഫയർവാളും സോഫ്റ്റ്വെയർ അപ്ഡേറ്റുകളും: ഫയർവാളുകൾ അനധികൃത ആക്സസ് ശ്രമങ്ങൾ തടയുന്നു. സോഫ്റ്റ്വെയർ അപ്ഡേറ്റുകൾ സുരക്ഷാ പിഴവുകൾ പരിഹരിക്കുന്നു.
- മൾട്ടി-ഫാക്ടർ ഓതന്റിക്കേഷൻ (MFA): പാസ്വേഡ് മോഷ്ടിക്കപ്പെട്ടാലും, എം എഫ് എ ഉള്ളതിനാൽ ഹാക്കർമാർക്ക് അക്കൗണ്ടിൽ പ്രവേശിക്കാൻ കഴിയില്ല.
ബാങ്കിങ്, പണമിടപാടുകൾ, രഹസ്യസ്വഭാവമുള്ള ഫയലുകൾ അപ്ലോഡ് ചെയ്യുമ്പോൾ, സുരക്ഷിതമായ വി പി എൻ ഇല്ലാതെ കോർപ്പറേറ്റ് നെറ്റ്വർക്കുകളിൽ പ്രവേശിക്കുമ്പോൾ, മെഡിക്കൽ അല്ലെങ്കിൽ സാമ്പത്തിക പോർട്ടലുകൾ തുറക്കുമ്പോൾ പൊതു വൈഫൈ ഉപയോഗിക്കുന്നത് പൂർണ്ണമായും ഒഴിവാക്കണം. പകരം മൊബൈൽ ഡാറ്റയോ പേഴ്സണൽ ഹോട്ട്സ്പോട്ടോ ഉപയോഗിക്കുന്നതാണ് സുരക്ഷിതം.
