ഉപയോക്താക്കൾക്കായി കോളിംഗ്, കോൾ മാനേജ്മെൻ്റ് എന്നിവ കൂടുതൽ എളുപ്പമാക്കുന്നതിനായി പുതിയ ഫീച്ചർ അവതരിപ്പിച്ച് വാട്സ്ആപ്പ്. ഐഫോണിലെ വോയ്സ്മെയിൽ പോലെ, വിളിച്ചിട്ട് കിട്ടാത്ത സാഹചര്യത്തിൽ വോയിസ്, വീഡിയോ സന്ദേശങ്ങൾ എളുപ്പത്തിൽ അയക്കാൻ കഴിയുന്നതാണ് ഈ പുതിയ അപ്ഡേറ്റ്. നിലവിൽ ഐഫോൺ ഉപയോക്താക്കൾക്ക് ഈ ഫീച്ചർ ലഭ്യമായി തുടങ്ങിയിട്ടുണ്ട്.
ഡബ്ല്യു എ ബീറ്റ ഇൻഫോയുടെ (WABetaInfo) റിപ്പോർട്ട് പ്രകാരം, വോയ്സ് കോളിന് മറുപടി ലഭിക്കാതെ വരുമ്പോൾ വാട്സ്ആപ്പ് ‘റെക്കോർഡ് വോയ്സ് മെസേജ്’ ഓപ്ഷൻ നൽകും. ഇത് വഴി കോളിന്റെ ഉദ്ദേശ്യം വ്യക്തമാക്കുന്ന ഓഡിയോ സന്ദേശം റെക്കോർഡ് ചെയ്ത് അയക്കാൻ സാധിക്കും. മിസ്ഡ് കോൾ അലർട്ടിനൊപ്പം ഈ സന്ദേശം സ്വീകർത്താവിന് ദൃശ്യമാകും.
വീഡിയോ കോളുകളിലും ഈ ഫീച്ചർ ലഭ്യമാണ്. വീഡിയോ കോളിന് മറുപടി ലഭിച്ചില്ലെങ്കിൽ വിളിക്കുന്നവർക്ക് ഇതേ രീതിയിൽ വീഡിയോ സന്ദേശം അയക്കാൻ കഴിയും. വേഗത്തിൽ ആശയവിനിമയം നടത്തുക എന്നതാണ് ഈ അപ്ഡേറ്റിൻ്റെ പ്രധാന ലക്ഷ്യം. വാട്സ്ആപ്പ് അതിൻ്റെ കോൾസ് ടാബ് പുനക്രമീകരിക്കുന്നതിനിടെയാണ് ഈ പുതിയ ഫീച്ചർ അവതരിപ്പിച്ചത്. ആൻഡ്രോയിഡ് ഉപയോക്താക്കൾക്ക് ഈ ഫീച്ചർ എപ്പോൾ ലഭ്യമാകുമെന്നതിൽ വ്യക്തതയില്ല.
പുതിയ കോൾസ് ടാബും മറ്റ് ഫീച്ചറുകളും
ഇതിനൊപ്പം കോൺടാക്റ്റുകൾ ആക്സസ് ചെയ്യുന്നത് മുതൽ പുതിയ ഗ്രൂപ്പുകൾ നിർമ്മിക്കുന്നത് വരെയുള്ള കോളുകളുമായി ബന്ധപ്പെട്ട എല്ലാ കാര്യങ്ങളെയും ഒരു ടാബിൽ ക്രമീകരിക്കുന്ന പുതിയൊരു ‘കോൾസ് ടാബും’ വാട്സ്ആപ്പ് കൊണ്ടുവരുന്നുണ്ട്.
ഈ പുതിയ കോളിങ് ഫീച്ചറിൽ ഉപയോക്താക്കൾക്ക് 31 പേരെ വരെ ഉൾപ്പെടുത്തിക്കൊണ്ട് വൺ-ഓൺ-വൺ കോളുകളോ ഗ്രൂപ്പ് കോളുകളോ ചെയ്യാൻ സാധിക്കും. കൂടാതെ, വോയ്സ് അല്ലെങ്കിൽ വീഡിയോ കോളുകൾ മുൻകൂട്ടി ഷെഡ്യൂൾ ചെയ്യാനുള്ള ‘കോൾ ഷെഡ്യൂളിങ്’ ഫീച്ചറും ഉപയോക്താക്കൾക്ക് കൂടുതൽ സൗകര്യപ്രദമാക്കും.
