ഫിലഡൽഫിയ: മാർത്തോമ്മാ സഭയുടെ നോർത്ത് അമേരിക്കൻ ഭദ്രാസനത്തിന്റെ ആഭിമുഖ്യത്തിൽ സൗത്ത് ഈസ്റ്റ് റീജനൽ ആക്ടിവിറ്റി കമ്മിറ്റിയും സഭയുടെ സംഗീത വിഭാഗമായ ഡിഎസ്എംസി (DSMC) യും സംയുക്തമായി നേതൃത്വം നൽകുന്ന ‘ഹെവൻലി ട്രമ്പറ്റ് 2025’ ക്രിസ്മസ് സംഗീത സായാഹ്നം 29ന് നടക്കും. അന്നേ ദിവസം വൈകിട്ട് നാല് മുതൽ 7.30 വരെ പെൻസിൽവേനിയയിലെ മെൽറോസ് പാർക്കിൽ സ്ഥിതി ചെയ്യുന്ന ഓൾഡ് ഗ്രാറ്റ്സ് കോളജ് ഓഡിറ്റോറിയമാണ് പരിപാടിയുടെ വേദി.
നോർത്ത് അമേരിക്കൻ ഭദ്രാസനത്തിന്റെ റീജനൽ തലത്തിലുള്ള രണ്ടാമത്തെ ക്രിസ്മസ് സംഗീത സായാഹ്നമാണ് ‘ഹെവൻലി ട്രമ്പറ്റ് 2025’. ഭദ്രാസന അധ്യക്ഷൻ ഡോ. എബ്രഹാം മാർ പൗലോസിന്റെ ആശയമാണ് ഈ സംഗീത പരിപാടി. ഫിലഡൽഫിയയിലെ ആർച്ച് ഡയോസിസ് ഓഫ് ഓക്സിലറി ബിഷപ്പായ റവ. കെിത് ജെയിംസ് ച്യ്ലിന്ന്സ്കി ക്രിസ്മസ് സന്ദേശം നൽകും.
ഭദ്രാസനത്തിന് കീഴിലുള്ള 16 ഇടവകകളിൽ നിന്നും കോൺഗ്രിഗേഷനിൽ നിന്നുമുള്ള അംഗങ്ങളാണ് ഗാന പരിശീലനം നടത്തുന്നത്. മുൻ ഡിഎസ്എംസി ഡയറക്ടറും നിലവിൽ ബോസ്റ്റൺ കാർമേൽ മാർത്തോമ്മാ ഇടവക വികാരിയുമായ റവ. ആശിഷ് തോമസ് ജോർജാണ് ഗായക സംഘത്തെ പരിശീലിപ്പിക്കുന്നത്.
അസൻഷൻ മാർത്തോമ്മാ ഇടവക വികാരി റവ. ജോജി എം ജോർജ് വൈസ് പ്രസിഡന്റായും അനു സ്കറിയ സെക്രട്ടറിയായും ഉള്ള സൗത്ത് ഈസ്റ്റ് റീജനൽ ആക്ടിവിറ്റി കമ്മിറ്റി പരിപാടിക്ക് നേതൃത്വം നൽകും. ബൈജു വർഗീസ് (ട്രസ്റ്റി), പി. ജി തോമസ് (അക്കൗണ്ടന്റ്), ബിൻസി ജോൺ, ഡോക്ടർ ഏലിയാസ് എബ്രഹാം, ഡോക്ടർ മാത്യു ടി. തോമസ്, വത്സ മാത്യു, ജോസഫ് കുരുവിള, റെജി ജോസഫ്, ഷൈജു ചെറിയാൻ എന്നിവരാണ് മറ്റ് കമ്മിറ്റി അംഗങ്ങൾ.
Report: സന്തോഷ് എബ്രഹാം
