കലിഫോർണിയ : യുഎസിൽ ഹാഫ് മാരത്തൺ പൂർത്തിയാക്കിയതിന് തൊട്ടുപിന്നാലെ വിമുക്ത ഭടൻ കുഴഞ്ഞുവീണു മരിച്ചു. കലിഫോർണിയയിൽ നിന്നുള്ള 28 കാരനായ സ്കോട്ടി വില്യംസാണ് സാൻ ഡിയേഗോയിലെ ഒരു വാട്ടർ സ്റ്റേഷന് സമീപം കുഴഞ്ഞുവീണു മരിച്ചത്. കഴിഞ്ഞ ഞായറാഴ്ച നടന്ന സിൽവർ സ്ട്രാൻഡ് വെറ്ററൻസ് ഡേ ഹാഫ് മാരത്തൺ ഓടിത്തീർത്തതിന് പിന്നാലെയാണ് സ്കോട്ടി വില്യംസ് ഒരു വാട്ടർ സ്റ്റേഷന് സമീപം കുഴഞ്ഞുവീണത്.
ഉടൻ തന്നെ സ്ഥലത്തെത്തിയ മെഡിക്കൽ സംഘം ഏകദേശം 90 മിനിറ്റോളം സിപിആർ നൽകിയെങ്കിലും ജീവൻ രക്ഷിക്കാനായില്ല. കൊറിയയിലും സിറിയയിലും ഒരു ട്രാൻസ്പോർട്ട് െ്രെഡവറായി സേവനമനുഷ്ഠിച്ചിട്ടുള്ള വില്യംസ്, സിറിയയിൽ നിന്ന് മടങ്ങിയെത്തിയ ശേഷം പോസ്റ്റ് ട്രോമാറ്റിക് സ്ട്രെസ് ഡിസോർഡർ നേരിട്ടിരുന്നു. തുടർന്ന് യുഎസ് സൈനിക സേവനത്തിൽ നിന്നും വിരമിച്ചു. പിന്നീട് ഒരു സ്കീ റിസോർട്ടിൽ ജോലി ചെയ്യുകയായിരുന്ന വില്യംസ് സാൻ ഡിയാഗോയിലേക്ക് താമസം മാറി.
മുൻപ് ഒട്ടേറെ ഹാഫ് മാരത്തണുകൾ വിജയകരമായി പൂർത്തിയാക്കിയിട്ടുള്ള ആരോഗ്യവാനും കായികക്ഷമതയുമുള്ള മകൻ ഇത്ര പെട്ടെന്ന് മരിച്ചത് എങ്ങനെയാണെന്ന് മനസ്സിലാക്കാൻ കഴിയുന്നില്ലെന്ന് അമ്മ കാതറിൻ യ്ഗ്ലേഷ്യസ്ഹെരേര പറയുന്നു. മത്സരത്തിന് രണ്ട് ദിവസം മുമ്പ്, വിഡിയോ കോളിനിടെ വില്യംസ് തന്റെ പുതിയ അപ്പാർട്മെന്റ് കാണിക്കുകയും കാമുകി ബ്രീ റിവേരയെ ‘രഹസ്യമായി വിവാഹം കഴിക്കാൻ’ പദ്ധതിയിട്ടിട്ടുണ്ടെന്ന് പറഞ്ഞിരുന്നതായി വില്യംസിന്റെ അമ്മ പറയുന്നു. വില്യംസിന്റെ മരണകാരണം കണ്ടെത്താനായി കുടുംബം പോസ്റ്റ്മോർട്ടം ഫലങ്ങൾക്കായി കാത്തിരിക്കുകയാണ്.
