ന്യൂയോർക്ക് ∙ കഴിഞ്ഞ പന്ത്രണ്ട് വർഷമായി ന്യൂയോർക്ക് ലോങ്ങ് ഐലൻഡ് കേന്ദ്രീകൃതമായി പ്രവർത്തിക്കുന്ന ചാരിറ്റി സംഘടനയായ എക്കോ (ECHO)യുടെ (Enhance Community through Harmonious Outreach) 2025ലെ ഹ്യുമാനിറ്റേറിയൻ അവാർഡ് (Humanitarian Award-2025), പ്രഭാഷകനും എഴുത്തുകാരനും കോർപ്പറേറ്റ് പരിശീലകനും ‘അഞ്ചപ്പം ചാരിറ്റബിൾ ട്രസ്റ്റ്’ പ്രസിഡന്റുമായ ഡോ. ബേബി സാം സാമുവേലിന്. എക്കോ ഹ്യൂമാനിറ്റേറിയൻ അവാർഡ്. 2,500 ഡോളറും പ്രശംസാഫലകവുമാണ് അവാർഡായി നൽകുന്നത്.
വൃക്ക രോഗികൾക്ക് സൗജന്യ ഡയാലിസിസ് നടത്തുന്നതിന് കിഡ്നി ഫെഡറേഷൻ ചെയർമാൻ ഫാ. ഡേവിസ് ചിറമേലുമായി സഹകരിച്ച് എക്കോ ഡയാലിസിസ് യൂണിറ്റുകൾ സ്ഥാപിച്ചു. ലോങ്ങ് ഐലൻഡിൽ മുതിർന്ന പൗരന്മാരുടെ ശാരീരികവും മാനസികവുമായ ഉന്നമനത്തിന് സീനിയർ വെൽനെസ്സ് പരിപാടി സംഘടിപ്പിച്ചു. ഡൊമിനിക്കൻ റിപ്പബ്ലിക്കിൽ നിർധനരായ ഒരു കുടുംബത്തിന് ഭവനം നിർമിച്ച് നൽകി.
ഒമാനിൽ പ്രവർത്തിക്കുമ്പോൾ ‘നോളേഡ്ജ് ഒമാൻ’ (Knowledge Oman) എന്ന ഒമാനിലെ സന്നദ്ധ സംഘടനയുടെ വൈസ് ചെയർമാനായിരുന്നു. അതോടൊപ്പം ‘ഇന്ത്യൻ സ്കൂൾസ് ഇൻ ഒമാൻ’ മുൻ ചെയർമാനുമാണ്. ഫാ. ബോബി ജോസ് കട്ടിക്കാട് ആരംഭിച്ച അഞ്ചപ്പം ചാരിറ്റബിൾ ട്രസ്റ്റിന്റെയും താവു കമ്മ്യൂണിറ്റി ട്രസ്റ്റിന്റെയും പ്രസിഡന്റാണ്.
ഈ മാസം 22ന് വൈകിട്ട് ആറിന് ബെത്പേജിലുള്ള ദി സ്റ്റെർലിങ് ബാങ്ക്വറ്റ് ഹാളിൽ എക്കോ നടത്തുന്ന വാർഷിക ഡിന്നർ അവാർഡ് നൈറ്റിൽ ഡോ. ബേബി സാം സാമുവേലിന് അവാർഡ് സമ്മാനിക്കും. മജീഷ്യൻ പ്രഫ. ഗോപിനാഥ് മുതുകാട് മുഖ്യാതിഥിയായി ചടങ്ങിൽ പങ്കെടുക്കും. പ്രവേശനം പാസ് മൂലം നിയന്ത്രിക്കുമെന്ന് സംഘാടകർ അറിയിച്ചു.
