പ്ലാനോ (ഡാലസ്): പ്ലാനോയിലെ ബോബ് വുഡ്രഫ് പാർക്കിൽ ജോഗിങ് നടത്തുകയായിരുന്ന സ്ത്രീയെ വ്യാഴാഴ്ച ഉച്ചയ്ക്ക് ചുറ്റിക കൊണ്ട് ആക്രമിച്ച 17 വയസ്സുകാരൻ പിടിയിലായി. ചുരുങ്ങിയത് രണ്ടു തവണയെങ്കിലും പ്രതി ചുറ്റിക കൊണ്ട് സ്ത്രീയെ അടിച്ചതായാണ് വിവരം. ആക്രമിക്കപ്പെട്ട സ്ത്രീ തിരിച്ചടിച്ചതിനെ തുടർന്ന് പ്രതി സംഭവസ്ഥലത്തുനിന്ന് ഓടി രക്ഷപ്പെട്ടു.
ആക്രമണത്തിൽ പരുക്കേറ്റ സ്ത്രീയെ ഉടൻ തന്നെ ഒരു പ്രാദേശിക ആശുപത്രിയിൽ പ്രവേശിപ്പിച്ചു. ഇവരുടെ പരുക്ക് ജീവന് ഭീഷണിയല്ലെന്ന് അധികൃതർ അറിയിച്ചു. കുറ്റകൃത്യം നടന്ന സ്ഥലത്ത് നിന്ന് ലഭിച്ച തെളിവുകളുടെ അടിസ്ഥാനത്തിൽ പൊലീസ് നടത്തിയ അന്വേഷണത്തിലാണ് 17 വയസ്സുകാരനാണ് പ്രതിയെന്ന് തിരിച്ചറിഞ്ഞത്.
ആക്രമണത്തിന് ഉപയോഗിച്ച ചുറ്റിക, ഡക്റ്റ് ടേപ്പ്, മറ്റ് ചില വസ്തുക്കൾ എന്നിവ പൊലീസ് സംഭവസ്ഥലത്തുനിന്ന് കണ്ടെടുത്തു. ആക്രമണ കാരണം പൊലീസ് പുറത്തുവിട്ടിട്ടില്ല. നിലവിൽ അന്വേഷണം പുരോഗമിക്കുന്നതിനാൽ കൂടുതൽ വിവരങ്ങൾ വെളിപ്പെടുത്താൻ കഴിയില്ലെന്നും അധികൃതർ അറിയിച്ചു.
