ന്യൂഡൽഹി: ഗൂഗിൾ ക്രോം വെബ് ബ്രൗസറിൽ ഗുരുതരമായ സുരക്ഷാ പാളിച്ചകൾ കണ്ടെത്തിയതിനെ തുടർന്ന് ഉപയോക്താക്കൾക്ക് മുന്നറിയിപ്പുമായി ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം (CERT-In). ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിൻ്റെ ഭാഗമായ CERT-In, ഒക്ടോബർ 30-ന് പുറത്തിറക്കിയ നിർദ്ദേശത്തിൽ, ഉപയോക്താക്കളുടെ വിവരങ്ങൾ ചോർത്താൻ സാധിക്കുന്ന രീതിയിലുള്ള ഈ സുരക്ഷാ പാളിച്ചകൾ പരിഹരിക്കാൻ അടിയന്തര നടപടി സ്വീകരിക്കണമെന്ന് ആവശ്യപ്പെട്ടു.
എന്താണ് ഭീഷണി?
ഗൂഗിൾ ക്രോമിൽ റിപ്പോർട്ട് ചെയ്യപ്പെട്ട ഒന്നിലധികം സുരക്ഷാ പാളിച്ചകൾ ഉപയോഗപ്പെടുത്തി, ഹാക്കർമാർക്ക് ഉപയോക്താവിൻ്റെ കമ്പ്യൂട്ടറിലെ സുരക്ഷാ നിയന്ത്രണങ്ങൾ മറികടന്ന് നുഴഞ്ഞുകയറാൻ സാധിക്കും. ഇത് വിവരങ്ങൾ ചോർത്തുന്നതിനും സൈബർ ആക്രമണം നടത്തുന്നതിനും കാരണമാകും. വിദൂരത്തിരുന്ന് മാൽവെയർ കോഡുകൾ പ്രവർത്തിപ്പിക്കാനും ഉപയോക്താവിൻ്റെ കമ്പ്യൂട്ടറിനെ നിയന്ത്രിക്കാനും സാധിക്കുന്ന തരത്തിലുള്ളതാണ് കണ്ടെത്തിയിട്ടുള്ള സുരക്ഷാ പാളിച്ചകളെന്ന് അധികൃതർ വ്യക്തമാക്കി.
ആർക്കാണ് അപകടസാധ്യത?
വിൻഡോസ്, മാക് ഒ എസ്, ലിനക്സ് എന്നീ ഓപ്പറേറ്റിങ് സിസ്റ്റങ്ങളിൽ ക്രോം ഉപയോഗിക്കുന്നവർക്ക് മുന്നറിയിപ്പ് നൽകിയിട്ടുണ്ട്. താഴെ പറയുന്ന പതിപ്പുകളിലെ ക്രോം ഉപയോഗിക്കുന്നവരാണ് ജാഗ്രത പാലിക്കേണ്ടത്:
- Linux: 142.0.7444.59-ന് മുമ്പുള്ള Google Chrome പതിപ്പുകൾ
- Windows: 142.0.7444.59/60 ന് മുമ്പുള്ള Google Chrome പതിപ്പുകൾ
- Mac: 142.0.7444.60-ന് മുമ്പുള്ള Google Chrome പതിപ്പുകൾ
എന്താണ് പോംവഴി?
സുരക്ഷാ പാളിച്ചകൾ പരിഹരിച്ച് ക്രോം ബ്രൗസറിൻ്റെ പുതിയ പതിപ്പ് റിലീസ് ചെയ്തിട്ടുണ്ട്. ഉപയോക്താക്കൾ ഉടൻ തന്നെ ബ്രൗസർ അപ്ഡേറ്റ് ചെയ്യണം.
വിൻഡോസിലും മാകോസിലും അപ്ഡേറ്റ് ചെയ്യാനുള്ള രീതി:
- ക്രോം ബ്രൗസറിൻ്റെ വലതുവശത്തുള്ള ത്രീ-ഡോട്ട് മെനുവിലേക്ക് (മൂന്ന് കുത്തുകൾ) പോകുക.
- സെറ്റിങ്സ് (Settings) തിരഞ്ഞെടുക്കുക.
- ‘എബൗട്ട്’ (About) എന്ന ഓപ്ഷൻ തിരഞ്ഞെടുക്കുക.
- തുടർന്ന് ‘അപ്ഡേറ്റ് ക്രോം’ (Update Chrome) എന്ന ബട്ടൺ ക്ലിക്ക് ചെയ്ത് പുതിയ പതിപ്പ് ഇൻസ്റ്റാൾ ചെയ്യുക.
