ഫുൾ ടാങ്ക് ഡീസലടിച്ച് 2831 കിലോമീറ്റർ ഓടി, ഗിന്നസ് റെക്കോഡുമായി സ്‌കോഡ സൂപ്പർബ്

ചെക്ക് വാഹന നിർമാതാക്കളായ സ്‌കോഡയുടെ വാഹനശ്രേണിയിലെ പ്രീമിയം സെഡാൻ വാഹനമാണ് സൂപ്പർബ്. വിദേശ രാജ്യങ്ങളിൽ സ്‌കോഡയുടെ വാഹന നിരയിലെ താരമാണ് ഈ സെഡാൻ. സൂപ്പർബ് എന്ന സൂപ്പർ സെഡാനിലൂടെ സ്‌കോഡയിലേക്ക് ഒരു ഗിന്നസ് റെക്കോഡ് എത്തിയിരിക്കുകയാണ്. ഒരു ഫുൾ ടാങ്ക് ഡീസൽ ഉപയോഗിച്ച് ഏറ്റവുമധികം ദൂരം സഞ്ചരിച്ചാണ് സൂപ്പർബ് ഗിന്നസ് റെക്കോഡ് നേട്ടം കൊയ്തത്.

ഒരു ഫുൾ ടാങ്ക് ഡീസൽ ഉപയോഗിച്ച് 2831 കിലോമീറ്ററാണ് സ്‌കോഡ സൂപ്പർബ് സഞ്ചരിച്ചിരിക്കുന്നത്. സ്‌കോഡ നിരത്തുകളിൽ എത്തിക്കുന്ന റെഗുലർ ഡീസൽ എൻജിൻ സൂപ്പർബിലൂടെയാണ് ഈ നേട്ടം സ്‌കോഡയ്ക്ക് ലഭിച്ചിരിക്കുന്നത്. പരീക്ഷണത്തിനായി പ്രത്യേകമായി ഒരുക്കിയ വാഹനമല്ലെന്ന് ചുരുക്കം. 2025ലെ യൂറോപ്യൻ റാലി ചാമ്പ്യൻഷിപ്പ് ജേതാവായ മിക്കോ മാർസിക്കിയുടെ െ്രെഡവിങ്ങിലൂടെയാണ് ഈ ഗിന്നസ് നേട്ടം കൈവരിച്ചിരിക്കുന്നത്.

മിക്കോ മാർസിക്കിന്റെ കൈവശമുണ്ടായിരുന്ന സ്‌കോഡ സൂപ്പർബാണ് ഈ റെക്കോഡ് നേട്ടത്തിനായി ഓടിയത്. 100 കിലോമീറ്റർ ഓടാൻ 2.61 ലിറ്റർ ഡീസൽ മാത്രമാണ് ചിലവായതെന്നാണ് കണക്കുകൾ സൂചിപ്പിക്കുന്നത്. അതായത് ഒരു ലിറ്റർ ഡീസലിൽ ഏകദേശം 38 കിലോമീറ്ററായിരുന്നു ഈ വാഹനത്തിന് ലഭിച്ച മൈലേജ്. സ്‌കോഡ ഈ വാഹനത്തിന് ഉറപ്പുനൽകുന്ന മൈലേജ് 100 കിലോമീറ്റർ സഞ്ചരിക്കാൻ 4.8 ലിറ്റർ എന്ന നിലയിലാണ്. അതായത് ഏകദേശം 20 കിലോമീറ്റർ. ഇതാണ് മിക്കോ മാർസിക് തിരുത്തി കുറിച്ചിരിക്കുന്നത്.

66 ലിറ്ററാണ് സൂപ്പർബിന്റെ ഫ്യുവൽ ടാങ്ക് കപ്പാസിറ്റി. മികച്ച എയറോ ഡൈനാമിക് ശേഷിയും ഉയർന്ന ഫ്യുവൽ ടാങ്ക് കപ്പാസിറ്റിയുമാണ് ഈ ഉദ്യമത്തിനായി സൂപ്പർബ് തിരഞ്ഞെടുക്കാൻ കാരണമെന്നാണ് മിക്കോ മാർസിക പറയുന്നത്. 2.0 ലിറ്റർ ടിഡിഐ ഡീസൽ എൻജിനാണ് ഈ വാഹനത്തിന് കരുത്തേകുന്നത്. ഇത് 148 ബിഎച്ച്പി പവറും 360 എൻഎം ടോർക്കുമാണ് നൽകുന്നത്. ഏഴ് സ്പീഡ് ഡ്യുവൽ ക്ലെച്ച് ഓട്ടോമാറ്റിക് ട്രാൻസ്മിഷനിലുള്ള വാഹനമാണ് റെക്കോഡ് ഓട്ടത്തിൽ ഉപയോഗിച്ചത്.

16 ഇഞ്ച് വീലുകൾ അടിസ്ഥാന ഫീച്ചറായി നൽകിയിട്ടുള്ള ഈ വാഹനത്തിന് 1590 കിലോഗ്രാം ഭാരമുണ്ട്. വാഹനത്തിന്റെ ഭാരവും ടയറുകളുടെ വലിപ്പവും പോലും ഉയർന്ന ഇന്ധനക്ഷമത ഉറപ്പാക്കാൻ സഹായിച്ചിരുന്നതായാണ് ിക്കോ മാർസിക് പറയുന്നത്. 2024 നവംബറിലാണ് സ്‌കോഡ സൂപ്പർബ് അദ്ദേഹത്തിന് ലഭിക്കുന്നത്. 2025 മാർച്ചിലാണ് റെക്കോഡ് സൃഷ്ടിക്കുന്നതിനുള്ള ശ്രമം ആരംഭിക്കുന്നത്. ഇതിന് മുൻപ് തന്നെ ഏകദേശം 20,000 കിലോമീറ്ററോളം അദ്ദേഹം ഈ വാഹനം ഓടിച്ചിരുന്നുവെന്നാണ് റിപ്പോർട്ട്.

പോളണ്ടിലെ ലോഡ്‌സിൽ നിന്നും ജർമനിയിലേക്കും പാരീസിലേക്കും പിന്നീട് നെതർലാൻഡ്‌സ്, ബെൽജിയം, ജർമനി എന്നിടങ്ങളിലേക്കുമായിരുന്നു അദ്ദേഹത്തിന്റെ യാത്ര. തിരിച്ച് പോളണ്ടിലാണ് യാത്ര അവസാനിപ്പിച്ചതും. 80 കിലോമീറ്ററിൽ താഴെയായിരുന്നു ഭൂരിഭാഗം സമയവും വാഹനത്തിന്റെ വേഗതയെന്നാണ് അദ്ദേഹം പറയുന്നത്. സ്‌പോർട്‌സ്‌ലൈൻ സ്പ്രിങ്ങുകൾ ഘടിപ്പിച്ചതിനൊപ്പം ഷാസി 15 മില്ലി മീറ്റർ താഴ്ത്തുകയും ചെയ്ത് ഉയർന്ന് ഇന്ധനക്ഷമതയ്ക്ക് കാരണമായെന്നാണ് മിക്കോ മാർസിക് പറയുന്നത്.