പാക് ആരാധകനെ ഞെട്ടിച്ച് കോലിയും രോഹിത്തും; ആർസിബി ജേഴ്‌സിയിൽ ഓട്ടോഗ്രാഫ് നൽകി കോലി; ബസിൽനിന്ന് ഇറങ്ങിവന്ന് രോഹിത്തും

പെർത്ത്: പാകിസ്താൻ വംശജനായ ആരാധകന് ഓട്ടോഗ്രാഫ് നൽകി ഇന്ത്യൻ താരങ്ങളായ വിരാട് കോലിയും രോഹിത് ശർമയും. ഓസ്‌ട്രേലിയക്കെതിരായ ഏകദിന പരമ്പരയ്ക്കായി പെർത്തിൽ എത്തിയ ഇന്ത്യൻ സംഘത്തെ കാണാൻ പാകിസ്താനിലെ കറാച്ചി സ്വദേശിയായ സാഹിലും ഉണ്ടായിരുന്നു. കോലിയുടെയും രോഹിത്തിന്റെയും ആരാധകനായ സാഹിൽ ഇവരെ കാണാൻ ടീം ഹോട്ടലിനു പുറത്ത് കാത്തുനിൽക്കുകയായിരുന്നു.

കോലി വന്നപാടെ ആർസിബി ജേഴ്‌സിയുമായി സാഹിലെത്തി, ജേഴ്‌സിയിൽ കോലി ഓട്ടോഗ്രാഫ് നൽകി. എന്നാൽ, രോഹിത്ത് ഇതിനോടകം ടീം ബസിൽ കയറിയിരുന്നു. ബസിൽ ഇരിക്കുകയായിരുന്ന രോഹിത്തിനോട് ഒരു ഓട്ടോഗ്രാഫ് അഭ്യർഥിച്ചുകൊണ്ട് സാഹിൽ ആംഗ്യം കാട്ടി. സാഹിലിനെപ്പോലും ഞെട്ടിച്ച് ബസിൽനിന്ന് ഇറങ്ങിവന്ന് രോഹിത്, ആരാധകന് ഓട്ടോഗ്രാഫ് നൽകുകയായിരുന്നു.

ടെസ്റ്റിൽനിന്നും ടി20യിൽനിന്നും വിരമിച്ച കോലിയും രോഹിത്തും ദീർഘനാളുകൾക്ക് ശേഷമാണ് ഇന്ത്യൻ ജേഴ്‌സിയിൽ കളിക്കാൻ പോകുന്നത്. ഏകദേശം ഏഴു മാസങ്ങൾക്കു ശേഷമാണ് ഇരുവരും ദേശീയ ടീം ജേഴ്‌സിയിലേക്ക് മടങ്ങിയെത്തുന്നത്. ആരാധകരും അതിന്റെ ആവേശത്തിലാണ്. മൂന്ന് ഏകദിന മത്സരങ്ങളും അഞ്ച് ടി20കളുമാണ് പര്യടനത്തിലുള്ളത്. ഒക്ടോബർ 19ന് പെർത്തിലാണ് ആദ്യ ഏകദിനം. തുടർന്ന് യഥാക്രമം ഒക്ടോബർ 23, 25 തീയതികളിൽ അഡ്‌ലെയ്ഡ് ഓവലിലും സിഡ്‌നി ക്രിക്കറ്റ് ഗ്രൗണ്ടിലും മത്സരങ്ങൾ നടക്കും. ഒക്ടോബർ 29 മുതലാണ് ടി20 പരമ്പര.