സാൻ ഫ്രാൻസിസ്കോ: നിലവിലെ ഫെഡറൽ സർക്കാർ ഷട്ട്ഡൗണിനിടെ ആയിരക്കണക്കിന് കേന്ദ്ര സർക്കാർ ജീവനക്കാരെ പിരിച്ചുവിടാനുള്ള ട്രംപ് ഭരണകൂടത്തിന്റെ നീക്കത്തിന് യുഎസ് ഫെഡറൽ ജഡ്ജി താൽക്കാലിക വിലക്കേർപ്പെടുത്തി. തൊഴിലാളി യൂണിയനുകൾ സമർപ്പിച്ച കേസിലാണ് ജില്ലാ ജഡ്ജി സൂസൻ ഇൽസ്റ്റൺ അടിയന്തര ഉത്തരവ് പുറപ്പെടുവിച്ചത്.
ഷട്ട്ഡൗൺ മൂലം പ്രതിസന്ധിയിലായ ഫെഡറൽ ഏജൻസികളിൽ നിന്ന് പതിനായിരത്തിലധികം ജീവനക്കാരെ പിരിച്ചുവിടാൻ ഭരണകൂടം പദ്ധതിയിടുന്നതായി സൂചനകളുണ്ടായിരുന്നു. ഈ നീക്കം നിയമവിരുദ്ധമാണെന്നും ജീവനക്കാരെ രാഷ്ട്രീയപരമായി ശിക്ഷിക്കാനുള്ള ശ്രമമാണെന്നും ചൂണ്ടിക്കാട്ടിയാണ് യൂണിയനുകൾ കോടതിയെ സമീപിച്ചത്.
ഫണ്ടിംഗ് പ്രതിസന്ധി മുതലെടുത്ത് നിയമങ്ങൾ ബാധകമല്ലാതാക്കാൻ ഭരണകൂടം ശ്രമിക്കുകയാണെന്ന യൂണിയനുകളുടെ വാദം കോടതി അംഗീകരിച്ചു. ഇതോടെ, ഇതിനകം അയച്ചതും ഇനി അയക്കാൻ ഉദ്ദേശിക്കുന്നതുമായ പിരിച്ചുവിടൽ നോട്ടീസുകൾ നടപ്പിലാക്കുന്നതിൽ നിന്ന് ട്രംപ് ഭരണകൂടത്തിന് താൽക്കാലിക വിലക്ക് നേരിട്ടിരിക്കുകയാണ്. സർക്കാർ ഷട്ട്ഡൗൺ തുടരുന്നതിനിടെ ഫെഡറൽ ജീവനക്കാർക്ക് ആശ്വാസം നൽകുന്ന സുപ്രധാന വിധിയാണിത്.
Leave a comment