ദുബായ്: ദുബായിലെ പുതിയ ഇന്ത്യൻ കോൺസൽ ജനറലായി ഡോ. വിഷ്ണുവർധൻ റെഡ്ഡി നിയമിതനായി. യു.എ.ഇ. വിദേശകാര്യ മന്ത്രാലയത്തിന് ഔദ്യോഗിക പത്രങ്ങൾ സമർപ്പിക്കുന്നതോടെ അദ്ദേഹം ചുമതലയേൽക്കും. കാലാവധി പൂർത്തിയാക്കി മടങ്ങിയ സതീഷ് കുമാർ ശിവന് പകരമാണ് പുതിയ നിയമനം.
തെലങ്കാനയിൽനിന്ന് ദുബായിലെ ഇന്ത്യൻ കോൺസൽ ജനറൽ പദവിയിലെത്തുന്ന ആദ്യ വ്യക്തിയാണ് ഡോ. വിഷ്ണുവർധൻ റെഡ്ഡി. വറങ്കൽ സ്വദേശിയായ അദ്ദേഹം 2008 ബാച്ച് ഇന്ത്യൻ ഫോറിൻ സർവീസ് (ഐ.എ.എഫ്.എസ്.) ഉദ്യോഗസ്ഥനാണ്. ഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽനിന്നുള്ള (എയിംസ്) പൂർവ്വവിദ്യാർഥി കൂടിയാണ് അദ്ദേഹം.
തെലങ്കാന സർക്കാരിൽ ഇൻവെസ്റ്റ്മെന്റ് പ്രൊമോഷൻ ആൻഡ് എക്സ്റ്റേണൽ എൻഗേജ്മെന്റ് സ്പെഷ്യൽ സെക്രട്ടറിയായും ഹൈദരാബാദ് റീജിയണൽ പാസ്പോർട്ട് ഓഫീസറായും സേവനമനുഷ്ഠിച്ചിട്ടുണ്ട്. യൂറോപ്പ്, ലാറ്റിൻ അമേരിക്ക എന്നിവിടങ്ങളിലും യുണൈറ്റഡ് നേഷൻസിലും വിവിധ നയതന്ത്ര പദവികൾ വഹിച്ചിട്ടുണ്ട്.
ദുബായിൽ ചുമതലയേൽക്കുന്നതിന് മുന്നോടിയായി മുംബൈയിലെ ഭാരത് ഡയമണ്ട് ബോർസ്, ജൂവലറി എക്സ്പോർട്ട് പ്രൊമോഷൻ കൗൺസിൽ എന്നിവ സന്ദർശിച്ച് അദ്ദേഹം വ്യവസായപ്രമുഖരുമായി ചർച്ചകൾ നടത്തിയിരുന്നു.
കാലാവധി പൂർത്തിയാക്കി മടങ്ങിയ മുൻ കോൺസൽ ജനറൽ സതീഷ് കുമാർ ശിവന് ദുബായിലെയും വടക്കൻ എമിറേറ്റുകളിലെയും വിവിധ കൂട്ടായ്മകളും സുപ്രീം കൗൺസിൽ അംഗവും റാസൽഖൈമ ഭരണാധികാരിയുമായ ശൈഖ് സൗദ് ബിൻ സഖർ അൽ ഖാസിമിയും യാത്രയയപ്പ് നൽകി.
Leave a comment