ഫൊക്കാനാ കൺവൻഷൻ വേദിയിൽ ആയിരത്തിൽ അധികം മോഹിനിമാർ ഒത്തുചേർന്ന് ഗിന്നസ് ചരിത്രമെഴുതുന്നു

കാലത്തിന്റെ കനകച്ചിലങ്കകൾ കാതിലണിഞ്ഞ്, കേരളത്തിന്റെ  ലാവണ്യകലയെ ലോകത്തിന്റെ നെറുകയിൽ പ്രതിഷ്ഠിക്കാൻ ഇനി എണ്ണപ്പെട്ട ദിനങ്ങളുടെ മാത്രം കാത്തിരിപ്പ്. ഫൊക്കാന 2026 ദേശീയ കൺവെൻഷനിൽ, ആയിരത്തിലേറെ അനുഗ്രഹീത കലാകാരികൾ ഒരേ മനസ്സും ഒരേ തളങ്ങളുമായി മോഹിനിയാട്ടത്തിന്റെ ലാവണ്യനൃത്തമൊരുക്കി ഗിന്നസ് ലോക റെക്കോർഡിന്റെ പൊൻതാളുകളിലേക്ക് പദമൂന്നുകയാണ്.

അമേരിക്കയുടെ കാഹളം മുഴങ്ങുന്ന  അമ്പതോളം സംസ്ഥാനങ്ങളിൽ നിന്നും,  ദൂരം മറന്ന് ഒഴുകിയെത്തുന്ന ആയിരത്തിലധികം നൃത്തോപാസകർ ചേർന്ന് ചരിത്രത്തിന്റെ കാൻവാസിൽ വസന്തം തീർക്കും. പ്രവാസത്തിന്റെ തിളക്കത്തിലും മാതൃഭൂമിയുടെ ആത്മാവിനെ സ്വന്തം നൃത്തച്ചുവടുകളിൽ പേറുന്ന പ്രവാസി മലയാളി സ്ത്രീരത്നങ്ങളുടെ  ഈ മഹാസംഗമം ലോകത്തിന് മുന്നിൽ കേരളീയ  സംസ്കാരത്തിന്റെ അനശ്വര പ്രഭ ചൊരിയും.

-കലാസൗന്ദര്യത്തിന്റെ അമരപ്പെരുമ: കോട്ടയം ലക്ഷ്മി സിൽക്സ് സമർപ്പിക്കുന്ന പരമ്പരാഗത വേഷവിധാനങ്ങളുടെ പ്രൗഢിയിൽ, കേരളീയ മഹിമയുടെ പൊൻപ്രഭയുമായി കലാകാരികൾ അരങ്ങിലെത്തും.

-സ്നേഹത്തിന്റെയും ആദരവിന്റെയും വാതായനങ്ങൾ: ദൂരദേശങ്ങളിൽ നിന്നും കലയുടെ വിളികേട്ടെത്തുന്ന പൂമ്പാറ്റകളെപ്പോലുള്ള നർത്തകർക്ക്  കലഹരി റിസോർട്ടിൽ പാറിപറക്കുബോൾ കണ്ണിനും മനസ്സിനും ആനന്ദം നൽകുന്നതാണ് .

-ഒരുമയുടെ മഹാനാദം: പ്രവാസി മലയാളി മനസ്സിന്റെ ഐക്യദാർഢ്യവും സാംസ്കാരിക വീര്യവും ആഗോള തലത്തിലേക്ക് പ്രഘോഷിക്കുന്ന ഈ മഹാസംഗമം,  പ്രവാസി മലയാളിയുടെ ഹൃദയസ്പന്ദനമായി മാറും.

ഗുരു ബീന മേനോൻ കോരിയൊഗ്രാഫി ചെയ്യുന്ന ഈ  പ്രോഗ്രാമിൽ  അമേരിക്കയിലെ പ്രധാന ഡാൻസ് ടീച്ചേഴ്സും ഗുരുക്കന്മാരുമായ നിമ്മി ദാസ്, നിമ്മി ബാബു ,ബിന്ധ്യ ശബരി , ദേവിക നായർ ,ലിസ ജോസഫ് ,ലതിക നായർ ,ജെയിൻ തെരേസ ബാബ അശ്വതി അരുൺ ,ബേസിൽ കാളഹർട്സ് , ബേബി തടവനാൽ ,ആശ അഗസ്റ്റിൻ ,മാലിനി നായർ ,നീന ഫിലിപ്പ് ,സൗയ്മാ ,ചന്ദ്രിക കുറുപ്പ് ,ലക്ഷ്മി കുറുപ്പ് ,അഞ്ജന പ്രദീപ് , പ്രിയ ലൂയിസ് ,ജോജോ കൊട്ടാരക്കര ,സുഷമ പ്രവീൺ ,മേരിയാൻ മൈക്കിൾ  ,സുജിത്  തോന്നാറിൽ ,റുബീന സുദർശൻ, അപരുമ ചാറ്റർജ്ജി  തുടങ്ങി നിരവധി ഡാൻസ് സ്കൂളുകളും ടീച്ചേഴ്സും ഇതിന്റെ ഭാഗമായി പ്രവർത്തിച്ചു വരുന്നു

ഫൊക്കാന പ്രസിഡന്റ് സജിമോൻ ആന്റണി, ജനറൽ സെക്രട്ടറി ശ്രീകുമാർ ഉണ്ണിത്താൻ, ട്രഷറർ ജോയ് ചാക്കപ്പൻ എന്നിവരുടെ നേതൃത്വത്തിൽ  ഒരുങ്ങുന്ന ഈ യജ്ഞം, അമരസ്മരണകളുടെ കനകകിരീടം ചൂടും. ചരിത്രം പുനർജനിക്കുന്ന ഈ അസുലഭ നിമിഷത്തിന് സാക്ഷിയാകാൻ ഏവർക്കും സ്വാഗതം.

ചരിത്രത്തിന്റെ ഭാഗമാകാൻ ഞങ്ങളും വരുന്നുണ്ട് , നിങ്ങളും വരില്ലേ ?

• Report ശ്രീകുമാർ ഉണ്ണിത്താൻ