ചിക്കാഗോയിൽ ചിൻമയ മിഷന്റെ അമൃത മഹോത്സവാഘോഷം; ഹനുമാൻ ഹവനും കുടുംബമേളയും വൻവിജയം

ചിക്കാഗോ: ചിൻമയ മിഷന്റെ 75-ാം വാർഷികാഘോഷങ്ങളുടെ ഭാഗമായി അമേരിക്കയിലെ ചിക്കാഗോയിൽ സംഘടിപ്പിച്ച ‘വായുപുത്ര ഇൻ വിൻഡി സിറ്റി’ ആത്മീയ-സാംസ്കാരിക മഹാമേളയിൽ 4,000-ത്തിലധികം ഭക്തജനങ്ങൾ പങ്കെടുത്തു. ഇല്ലിനോയിയിലെ വീറ്റണിലുള്ള ഡ്യൂപേജ് കൗണ്ടി ഫെയർഗ്രൗണ്ടിൽ ജൂലൈ 11-ന് നടന്ന പരിപാടി ഹനുമാൻ ഭക്തിയും ഇന്ത്യൻ പൈതൃകവും ഒരുമിച്ചുചേർന്ന അപൂർവ ആഘോഷമായി മാറി.
 

ചിൻമയ മിഷന്റെ ആഗോള തലവനും സെൻട്രൽ ചിൻമയ മിഷൻ ട്രസ്റ്റിന്റെ ചെയർമാനുമായ പൂജ്യ സ്വാമി സ്വരൂപാനന്ദ ഇന്ത്യയിൽ നിന്ന് നേരിട്ടെത്തി ചടങ്ങിന് അനുഗ്രഹം നൽകി. ഹനുമാന്റെ സന്ദേശവും ഭഗവദ്ഗീതയുടെ പ്രസക്തിയും ഊന്നിപ്പറഞ്ഞ അദ്ദേഹം, കുട്ടികൾ ഉൾപ്പെടെ എല്ലാ ഹിന്ദുക്കളും ഗീതയിലെ തിരഞ്ഞെടുത്ത അഞ്ച് ശ്ലോകങ്ങളെങ്കിലും പഠിക്കണമെന്ന് ആഹ്വാനം ചെയ്തു. ഒക്ടോബറിൽ ന്യൂഡൽഹിയിൽ നടക്കുന്ന ചിൻമയ അമൃത മഹോത്സവത്തിലേക്കും അദ്ദേഹം ഭക്തരെ ക്ഷണിച്ചു.

പരിപാടിയുടെ മുഖ്യ ആകർഷണമായിരുന്നു 31 ഹവൻകുണ്ഡങ്ങളിലായി നടന്ന ഹനുമാൻ ചാലിസ ഹവൻ. മിഡ്‌വെസ്റ്റിലെ അഞ്ച് ചിൻമയ മിഷൻ കേന്ദ്രങ്ങൾ ഉൾപ്പെടെ വിവിധ സാംസ്കാരിക-സാമൂഹിക സംഘടനകൾ ചേർന്ന് 21 പ്രാവശ്യം ഹനുമാൻ ചാലിസ ആലപിച്ചതോടെ ഭക്തിസാന്ദ്രമായ അന്തരീക്ഷം സൃഷ്ടിക്കപ്പെട്ടു.

കുട്ടികൾക്കായി രാമായണത്തെ ആസ്പദമാക്കിയ വിനോദ-വിദ്യാഭ്യാസ പരിപാടികൾ, ട്രഷർ ഹണ്ട്, ഒബ്സ്റ്റാക്കിൾ കോഴ്‌സ്, കലാപരിപാടികൾ, കരകൗശല പ്രവർത്തനങ്ങൾ എന്നിവയും ഒരുക്കിയിരുന്നു. ചിൻമയ ദർശൻ പ്രദർശനം, സ്വാമി ചിൻമയാനന്ദയുടെ ജീവിതവും ലോകമെമ്പാടുമുള്ള ചിൻമയ മിഷന്റെ പ്രവർത്തനങ്ങളും പരിചയപ്പെടുത്തി. 53-ലധികം സ്റ്റാളുകൾ, ആത്മീയ സംഘടനകളുടെ പ്രദർശനങ്ങൾ, പ്രാദേശിക സംരംഭകരുടെ ഉൽപ്പന്നങ്ങൾ, ബാലവിഹാർ പ്രവർത്തനങ്ങളുടെ അവതരണം എന്നിവയും സന്ദർശകരെ ആകർഷിച്ചു.

വൈകുന്നേരം നടന്ന സാംസ്കാരിക പരിപാടിയിൽ ഒഡീസി, ഭാരതനാട്യം, സമകാലിക നൃത്തം, ഭാങ്‌റ തുടങ്ങിയ കലാരൂപങ്ങളിലൂടെ രാമായണത്തിലെ വിവിധ സംഭവങ്ങൾ അരങ്ങിലെത്തി. അവസാനം ‘ചിക്കാഗോ ചാന്റ്സ് ചാലിസ’ പദ്ധതിയുടെ നേതൃത്വത്തിൽ നൂറുകണക്കിന് കുട്ടികളും മുതിർന്നവരും ചേർന്ന് ഹനുമാൻ ചാലിസ ആലപിച്ചതോടെ ആഘോഷങ്ങൾക്ക് സമാപനമായി.

250-ലധികം സന്നദ്ധപ്രവർത്തകരുടെ സേവനവും വിവിധ സഹസംഘടനകളുടെ പിന്തുണയും പരിപാടിയുടെ വിജയത്തിന് കരുത്തായി. ചിൻമയ മിഷൻ ചിക്കാഗോ പ്രസിഡന്റ് രാജുൽ ഭലാല, ആചാര്യന്മാർ, സ്പോൺസർമാർ, കലാകാരൻമാർ, സന്നദ്ധപ്രവർത്തകർ എന്നിവരുടെ സേവനത്തെ ചടങ്ങിൽ പ്രത്യേകം അഭിനന്ദിച്ചു. പരിപാടി വിശ്വാസവും സംസ്കാരവും സമൂഹ ഐക്യവും ശക്തിപ്പെടുത്തുന്ന ചരിത്ര മുഹൂർത്തമായിരുന്നുവെന്ന് ഏഷ്യൻ മീഡിയ യു.എസ്.എ ചെയർമാൻ സുരേഷ് ബോഡിവാല അഭിപ്രായപ്പെട്ടു.