തൃശ്ശൂർ മണ്ണുത്തിയില്‍ മോഷണം: വീട്ടുടമയെ കെട്ടിയിട്ട് 40 പവന്‍ കവര്‍ന്നു

തൃശ്ശൂർ: മണ്ണുത്തി മുല്ലക്കരയിൽ വീട്ടുടുമയെ കെട്ടിയിട്ട് 40 പവന്റെ സ്വർണാഭരണങ്ങൾ മോഷ്ടിച്ചു. വെട്ടിക്കൽ സ്വദേശി ചെറുവാറ വീട്ടിൽ സോമശേഖരനെയാണ് മൂന്നംഗ സംഘം കെട്ടിയിട്ട് സ്വർണ്ണം കവർന്നത്. അലമാരിയിൽ സൂക്ഷിച്ചിരുന്ന 50,000 രൂപയും കവർന്നു.

ഞായറാഴ്ച പുലർച്ചെ രണ്ടുമണിയോടെ ആയിരുന്നു സംഭവം. സംഭവദിവസം സോമശേഖരൻ മാത്രമാണ് വീട്ടിൽ ഉണ്ടായിരുന്നത്. ഹിന്ദി സംസാരിക്കുന്ന മൂന്നുപേരാണ് മോഷണ സംഘത്തിൽ ഉണ്ടായിരുന്നതെന്ന് സോമശേഖരൻ പറയുന്നു.

മോഷ്ടാക്കൾ വീട്ടിൽ നിന്നും പുറത്തുകടന്ന ഉടൻ കെട്ടഴിച്ച് സോമശേഖരൻ റോഡിലേക്ക് ഇറങ്ങി ഓടുകയായിരുന്നു. പിന്നാലെ മണ്ണുത്തി പോലീസ് സ്റ്റേഷനിൽ വിവരമറിയിച്ചു. മണ്ണുത്തി പോലീസും വിരലടയാള വിദഗ്ധരും ഡോഗ് സ്‌ക്വാഡും സ്ഥലത്ത് പരിശോധന നടത്തി.