ഷാഹിദ് കപൂർ, രശ്മിക മന്ദാന, കൃതി സനോൺ എന്നിവർ മുഖ്യവേഷങ്ങളിലെത്തുന്ന കോക്ടെയ്ൽ 2 എന്ന ചിത്രത്തിന്റെ ട്രെയിലർ പുറത്തിറങ്ങി. ഹോമി അദജാനിയയാണ് ഈ റൊമാന്റിക് എന്റർടെയ്നർ സംവിധാനം ചെയ്യുന്നത്. സൗഹൃദവും ത്രികോണ പ്രണയവുമെല്ലാമാണ് ചിത്രത്തിന്റെ പ്രമേയമെന്നാണ് ട്രെയിലർ നൽകുന്ന സൂചന.
2012-ൽ പുറത്തിറങ്ങിയ കോക്ക്ടെയിൽ എന്ന ചിത്രത്തിന്റെ സ്പിരിച്വൽ സീക്വൽ ആയാണ് പുതിയ ചിത്രം എത്തുന്നത്. ഹോമി അദജാനിയ തന്നെയാണ് ആദ്യ ഭാഗവും സംവിധാനം ചെയ്തത്. സെയ്ഫ് അലി ഖാൻ, ദീപികാ പദുക്കോൺ, ഡയാനാ പെന്റി എന്നിവരായിരുന്നു ‘കോക്ക്ടെയ്ൽ’ ആദ്യ ഭാഗത്തിൽ പ്രധാന വേഷങ്ങളിലെത്തിയത്.
തരുൺ ജെയിൻ, ലവ് രഞ്ജൻ എന്നിവർ ചേർന്നാണ് തിരക്കഥയൊരുക്കുന്നത്. പ്രീതം ആണ് കോക്ടെയ്ൽ 2-ന്റെ സംഗീതം. സന്താന കൃഷ്ണൻ രവിചന്ദ്രനാണ് ഛായാഗ്രഹണം. മാഡോക്ക് ഫിലിംസ് നിർമിക്കുന്ന ചിത്രം ജൂൺ 19-ന് തിയറ്ററുകളിലെത്തും.
