മുരിങ്ങയ്ക്ക് വിലക്കേർപ്പെടുത്തി ഓസ്ട്രേലിയ! വിൽക്കുന്നതും ഇറക്കുമതിയും നിരോധിച്ചു

പോഷകഗുണങ്ങളുടെ കലവറയാണ് മുരിങ്ങ. മലയാളികളുടെ അടുക്കളയിലെ നിത്യസാന്നിധ്യമായ മുരിങ്ങയിലയും മുരിങ്ങക്കായയും ഇല്ലാത്ത ഒരു ആഹാരക്രമത്തെക്കുറിച്ച് പലർക്കും ചിന്തിക്കാൻ പോലും കഴിയില്ല. കറികളിലെ രുചിക്കൂട്ടായും മികച്ചൊരു ഔഷധമായും അരിയപ്പെടുന്ന ഈ ‘സൂപ്പർഫൂഡിനെ നിരോധിച്ചിരിക്കുകയാണ് ഓസ്‌ട്രേലിയയും ന്യൂസീലൻഡും. മുരിങ്ങയോ അതിൽ നിന്നുള്ള ഉൽപന്നങ്ങളോ ഭക്ഷ്യവസ്തുവായോ സപ്ലിമെന്റായോ വിൽക്കുന്നതും ഇറക്കുമതി ചെയ്യുന്നതും ഓസ്‌ട്രേലിയൻ സർക്കാർ കർശനമായി നിരോധിച്ചിരിക്കുന്നു. 

ഓസ്‌ട്രേലിയൻ വിപണിയിൽ ഇനി മുരിങ്ങ ഉൽപന്നങ്ങൾ ലഭ്യമാകില്ലെന്ന ഈ വാർത്ത പ്രവാസി മലയാളികൾക്കിടയിലും വലിയ ചർച്ചയായിട്ടുണ്ട്. എന്തുകൊണ്ടാണ് ഓസ്‌ട്രേലിയ മുരിങ്ങയ്ക്ക് ഇത്തരമൊരു വിലക്കേർപ്പെടുത്തിയത്? ഇതിന് പിന്നിലെ വസ്തുതകൾ പരിശോധിക്കാം.

എന്തുകൊണ്ട് ഈ നിരോധനം?
ഭക്ഷ്യോൽപന്നങ്ങളുടെ ഗുണനിലവാരവും സുരക്ഷയും പരിശോധിക്കുന്ന ഔദ്യോഗിക സ്ഥാപനമായ ഫൂഡ് സ്റ്റാൻഡേർഡ്സ് ഓസ്‌ട്രേലിയ ന്യൂസീലൻഡ് (FSANZ) നൽകിയ നിർദേശത്തിന്റെ അടിസ്ഥാനത്തിലാണ് ഈ നടപടി. മുരിങ്ങയെ ഒരു ഭക്ഷ്യ ഉൽപന്നമെന്ന നിലയിൽ വിപണിയിലെത്തിക്കാൻ ആവശ്യമായ സുരക്ഷാ ഡേറ്റയുടെ അപര്യാപ്തതയാണ് ഇതിന് കാരണമായി അവർ ചൂണ്ടിക്കാണിക്കുന്നത്. അതിനാൽ എഫ്എസ്എഎൻസീ മുരിങ്ങയെ ഒരു ‘നോവൽ ഫൂഡ്’ (സുരക്ഷാ കാര്യങ്ങളിൽ കൃത്യമായ ഉറപ്പില്ലാത്ത പുതിയ തരം ഭക്ഷണം) വിഭാഗത്തിലാണ് തരംതിരിച്ചിരിക്കുന്നത്.

മുരിങ്ങയില (പച്ചയും ഉണങ്ങിയതും), പാകമാകാത്ത പച്ചക്കായകൾ, വിത്തിൽ നിന്നുള്ള എണ്ണ എന്നിവ ചില്ലറ വിൽപനയ്ക്കുള്ള ഭക്ഷണമായോ അതിന്റെ ചേരുവകളായോ മാറ്റാൻ ഓസ്‌ട്രേലിയ ന്യൂസീലൻഡ് ഫൂഡ് സ്റ്റാൻഡേർഡ്സ് കോഡിൽ ഭേദഗതി വരുത്തണമെന്ന് ആവശ്യപ്പെട്ട് ഒരു അപേക്ഷ സമർപ്പിച്ചിരുന്നു. എന്നാൽ, മുരിങ്ങ മനുഷ്യന്റെ ആരോഗ്യത്തിന് യാതൊരുവിധ സുരക്ഷാ പ്രശ്നങ്ങളും ഉണ്ടാക്കില്ലെന്ന് തെളിയിക്കാൻ ആവശ്യമായ ഡേറ്റ ഹാജരാക്കാൻ അപേക്ഷകർക്ക് കഴിഞ്ഞില്ല. ഇതേത്തുടർന്ന് എഫ്എസ്എഎൻസീ ഈ അപേക്ഷ നിരസിക്കുകയും വിപണിയിലെ വിലക്ക് കർശനമാക്കാൻ തീരുമാനിക്കുകയുമായിരുന്നു.

വാണിജ്യ വിപണിയിലെ കടുത്ത നിയന്ത്രണങ്ങൾ
പുതിയ നിയമപ്രകാരം മുരിങ്ങയുടെ വാണിജ്യപരമായ എല്ലാ സാധ്യതകൾക്കും ഓസ്‌ട്രേലിയയിൽ വലിയ തിരിച്ചടിയാണ് നേരിട്ടിരിക്കുന്നത്.

വാണിജ്യ വിൽപന നിരോധനം: ചില്ലറ വ്യാപാരികൾക്ക് മുരിങ്ങയിലയോ, കായകളോ, വിത്തിൽ നിന്നുള്ള എണ്ണയോ ഭക്ഷ്യ ഘടകമായി വിൽക്കാൻ സാധിക്കില്ല. വിപണിയിൽ ലഭിക്കുന്ന മുരിങ്ങപ്പൊടി, ഗുളികകൾ, ചായ (Moringa Tea) എന്നിവയ്ക്കും ഈ നിരോധനം ബാധകമാണ്.
ഇറക്കുമതി നിയന്ത്രണങ്ങൾ: ഭക്ഷണത്തിനോ സപ്ലിമെന്റിനോ വേണ്ടി വിദേശങ്ങളിൽ നിന്നും ഇറക്കുമതി ചെയ്യുന്ന മുരിങ്ങ ഉൽപന്നങ്ങൾ അതിർത്തിയിൽ വച്ച് തന്നെ സുരക്ഷാ വിഭാഗം തടയുകയും പിടിച്ചെടുക്കുകയും ചെയ്യും.
നിയമനടപടികൾ: 1992ലെ ‘ഇംപോർട്ടഡ് ഫൂഡ് കൺട്രോൾ ആക്ട്’ പ്രകാരം മാനദണ്ഡങ്ങൾ പാലിക്കാത്ത ഉൽപന്നങ്ങളെ ‘പരാജയപ്പെട്ട ഭക്ഷണം’ ആയി പ്രഖ്യാപിച്ച് നശിപ്പിക്കുകയോ തിരിച്ചയക്കുകയോ ചെയ്യും. നിയമം ലംഘിച്ച് മുരിങ്ങ ഇറക്കുമതി ചെയ്യുന്നത് ഈ നിയമത്തിലെ സെക്ഷൻ 8 പ്രകാരം കടുത്ത കുറ്റകൃത്യമാണ്.

മുരിങ്ങ നട്ടാൽ കേസാകുമോ? പ്രവാസികൾ അറിയേണ്ടത്
രാജ്യത്ത് നിരോധനമുള്ളതിനാൽ ഓസ്‌ട്രേലിയയിൽ മുരിങ്ങ നട്ടാൽ പൊലീസ് പിടിക്കുമോ എന്ന ആശങ്ക പലർക്കുമുണ്ട്. എന്നാൽ ഇതിൽ പരിഭ്രാന്തിയുടെ ആവശ്യമില്ലെന്ന് അവിടുത്തെ പ്രവാസി സമൂഹം വ്യക്തമാക്കുന്നു. മുരിങ്ങയുടെ വാണിജ്യപരമായ കൃഷിക്കും വിപണനത്തിനും മാത്രമാണ് നിരോധനമുള്ളത്. വ്യക്തിപരമായ ആവശ്യങ്ങൾക്കായി സ്വന്തം വീട്ടുപറമ്പിൽ മുരിങ്ങ മരം നട്ടുവളർത്തുന്നതിനോ, അതിന്റെ ഇലകൾ സ്വകാര്യമായി പാകം ചെയ്ത് കഴിക്കുന്നതിനോ യാതൊരുവിധ നിയമതടസ്സവുമില്ല.

ഓസ്‌ട്രേലിയയിൽ മുൻപ് പ്രചാരത്തിലില്ലാതിരുന്ന ഒരു സസ്യമായതിനാൽ, അതിന്റെ വാണിജ്യപരമായ ഉപയോഗത്തിന് കർശനമായ ഭക്ഷ്യസുരക്ഷാ മാനദണ്ഡങ്ങൾ പാലിക്കണം എന്ന ഉദേശ്യത്തോടെ മാത്രമാണ് അധികൃതർ ഈ നടപടി സ്വീകരിച്ചിരിക്കുന്നത്.

മൈക്രോപ്ലാസ്റ്റിക്കിനെ ചെറുക്കാൻ മുരിങ്ങ
ഭക്ഷ്യസുരക്ഷയുടെ പേരിൽ ഓസ്‌ട്രേലിയയിൽ മുരിങ്ങയ്ക്ക് വിലക്കുണ്ടെങ്കിലും, ശാസ്ത്രലോകം ഈ അദ്ഭുത സസ്യത്തിന്റെ മറ്റൊരു വിസ്മയിപ്പിക്കുന്ന ഗുണം കൂടി അടുത്തിടെ കണ്ടെത്തുകയുണ്ടായി. ആധുനിക ലോകം നേരിടുന്ന ഏറ്റവും വലിയ വെല്ലുവിളികളിലൊന്നായ മൈക്രോപ്ലാസ്റ്റിക് മലിനീകരണത്തെ ചെറുക്കാൻ മുരിങ്ങ വിത്തുകൾക്ക് സാധിക്കും എന്നാണ് പുതിയ പഠനങ്ങൾ വ്യക്തമാക്കുന്നത്.

പ്രശസ്ത ശാസ്ത്ര ജേണലായ ‘എസിഎസ് ഒമേഗ’യിൽ പ്രസിദ്ധീകരിച്ച പഠന റിപ്പോർട്ട് അനുസരിച്ച്, വെള്ളത്തിലെ മൈക്രോപ്ലാസ്റ്റിക്കുകളെ അരിച്ചെടുത്ത് മാറ്റാൻ മുരിങ്ങ വിത്തുകളിൽ അടങ്ങിയിരിക്കുന്ന ചില ഘടകങ്ങൾക്ക് പ്രത്യേക ശേഷിയുണ്ട്. പരമ്പരാഗതമായി വെള്ളം ശുദ്ധീകരിക്കാൻ മുരിങ്ങ ഉപയോഗിച്ചിരുന്ന എന്ന പരമ്പരാഗത ശൈലി ശരിവയ്ക്കുന്നതാണ് ഈ പുതിയ ശാസ്ത്രീയ കണ്ടെത്തൽ.

പരമ്പരാഗതമായി നമ്മൾ ഏറെ ഗുണപ്രദമെന്ന് കരുതുന്ന പല ഭക്ഷണപദാർഥങ്ങളും മറ്റ് വിദേശ രാജ്യങ്ങളിലെ കർശനമായ സുരക്ഷാ പരിശോധനകളിൽ പരാജയപ്പെടാറുണ്ട്. എന്നാൽ അത് ആ ഭക്ഷണത്തിന്റെ ദോഷം കൊണ്ടല്ല, മറിച്ച് കൃത്യമായ ശാസ്ത്രീയ തെളിവുകളുടെയും ഡേറ്റയുടെയും അഭാവം മൂലമാണെന്ന് മനസ്സിലാക്കാം. ഉപഭോക്തൃ സുരക്ഷ ഉറപ്പാക്കാനുള്ള ഓസ്‌ട്രേലിയൻ സർക്കാരിന്റെ കടുത്ത നിയമങ്ങൾക്കിടയിലും, മുരിങ്ങയുടെ ഔഷധഗുണങ്ങളെ പൂർണമായി തള്ളിക്കളയാൻ ശാസ്ത്രലോകത്തിന് കഴിയില്ലെന്ന് തന്നെയാണ് പുതിയ പഠനങ്ങൾ സൂചിപ്പിക്കുന്നത്.