കുട്ടികളെ ലഹരി നൽകി പീഡിപ്പിച്ചു; കുപ്രസിദ്ധ ‘ലോസ് ഗാറ്റോസ് പാർട്ടി മോമിന്’ പരമാവധി ശിക്ഷ

കലിഫോർണിയ: പ്രായപൂർത്തിയാകാത്ത കൗമാരക്കാർക്കായി മദ്യവും ലഹരിമരുന്നും ലൈംഗിക ചൂഷണങ്ങളും നിറഞ്ഞ പാർട്ടികൾ സംഘടിപ്പിച്ച കലിഫോർണിയയിലെ കുപ്രസിദ്ധ ‘ലോസ് ഗാറ്റോസ് പാർട്ടി മോം’ ഷാനൻ ഒകോണറിന് (52) കോടതി 35 വർഷവും 10 മാസവും കഠിനതടവ് വിധിച്ചു.

കോവിഡ് ലോക്ക്ഡൗൺ കാലത്ത് സ്വന്തം വീട്ടിൽ വച്ച് 14ഉം 15ഉം വയസ്സുള്ള കുട്ടികളെ ദുരുപയോഗം ചെയ്തതിനാണ് സന്റാ ക്ലാര കൗണ്ടി കോടതി നിയമപ്രകാരം നൽകാവുന്ന ഏറ്റവും പരമാവധി ശിക്ഷ പുറപ്പെടുവിച്ചത്.

കുട്ടികൾക്ക് ‘വോഡ്ക’ ഉൾപ്പെടെയുള്ള മദ്യങ്ങൾ വാങ്ങി നൽകി അവരെ അബോധാവസ്ഥയിലാക്കുകയും, മദ്യപിച്ചു ബോധമില്ലാതിരുന്ന പെൺകുട്ടികൾ പീഡിപ്പിക്കപ്പെടുമ്പോൾ നോക്കിനിന്ന് പ്രോത്സാഹിപ്പിക്കുകയും ചെയ്തു എന്നതാണ് ഇവർക്കെതിരെയുള്ള കുറ്റം. രഹസ്യങ്ങൾ പുറത്തുപറഞ്ഞാൽ ജയിലിലാകുമെന്ന് പറഞ്ഞ് കുട്ടികളെ ഇവർ ഭീഷണിപ്പെടുത്തിയിരുന്നു. സ്‌നാപ്!ചാറ്റ് വഴിയാണ് അർധരാത്രികളിൽ ഇവർ കുട്ടികളെ വീട്ടിലേക്ക് ആകർഷിച്ചിരുന്നത്.

വിചാരണ വേളയിൽ ഇരകളായ കുട്ടികളും അവരുടെ മാതാപിതാക്കളും കോടതിയിൽ പൊട്ടിക്കരഞ്ഞുകൊണ്ടാണ് സാക്ഷി പറഞ്ഞത്. തന്റെ മകന് കൂട്ടുകാരെ ഉണ്ടാക്കാനും ലോക്ക്ഡൗൺ കാലത്തെ വിരസത മാറ്റാനുമാണ് കുട്ടികളെ വീട്ടിലേക്ക് ക്ഷണിച്ചതെന്ന പ്രതിയുടെ വാദം കോടതി തള്ളി. കുട്ടികളുടെ ജീവൻ അപകടത്തിലാക്കിയ ഷാനൻ ഒകോണർ ഇനിമുതൽ ഒരു റജിസ്റ്റർ ചെയ്ത ലൈംഗിക കുറ്റവാളിയായിരിക്കുമെന്ന് ഡിസ്ട്രിക്റ്റ് അറ്റോർണി വ്യക്തമാക്കി. ജയിൽ ശിക്ഷയ്ക്ക് പുറമെ വൻ തുക പിഴയും കോടതി ചുമത്തിയിട്ടുണ്ട്.

Report ജയിംസ് വർഗീസ്