ഭക്ഷണപ്രിയർക്കായി വൈവിധ്യമാർന്ന വിഭവങ്ങൾ ഒരുക്കുന്നതിൽ സ്പെയിൻകാർ എപ്പോഴും മുന്നിലാണ്. എന്നാൽ ഇത്തവണ ലോകത്തെ സ്പെയിൻ ഞെട്ടിച്ചിരിക്കുന്നത് വ്യത്യസ്തമായ ഭക്ഷ്യമേളയിലൂടെയാണ്. സ്പാനിഷ് നഗരമായ ലെയ്ഡയിൽ നടന്ന ലോകത്തിലെ ഏറ്റവും വലിയ ഒച്ചുതീറ്റ ഉത്സവമായ ലാപ്ലെക് ഡെൽ കരാഗോൾസമാപിച്ചപ്പോൾ വിറ്റുപോയത് ഒന്നും രണ്ടുമല്ല, 14,000 കിലോ ഒച്ചുകളാണ്!
മേയ് 22 മുതൽ 24 വരെ നടന്ന മൂന്ന് ദിവസം നീണ്ട ഉത്സവത്തിൽ പങ്കെടുക്കാൻ പ്രാദേശികവാസികൾ ഉൾപ്പെടെ രണ്ട് ലക്ഷത്തിലധികം സന്ദർശകരാണ് ഒഴുകിയെത്തിയത്. പ്രദേശത്തെ ഏറ്റവും ജനപ്രിയമായ പരമ്പരാഗത വിഭവങ്ങളിലൊന്നാണ് ഒച്ചുകൾ.
രുചികളുടെ പൂരം, ഒപ്പം ബിയറും!
വഴിയോരങ്ങളിൽ സജ്ജീകരിച്ച താൽക്കാലിക സ്റ്റാളുകളിൽ ഭീമാകാരമായ പാനുകളിൽ ഒച്ചുകൾ വെന്തുരുകുന്ന കാഴ്ചയായിരുന്നു മേളയിലുടനീളം. ചൂടിനെ പ്രതിരോധിക്കാൻ തണുത്ത ബിയറും കയ്യിലേന്തി, ലോകത്തിന്റെ വിവിധ ഭാഗങ്ങളിൽ നിന്നുള്ള ഭക്ഷണപ്രേമികൾ തെരുവുകളിൽ ഒത്തുകൂടി.
പതിറ്റാണ്ടുകൾക്ക് മുൻപ് ഒരു ചെറിയ കുടുംബ കൂട്ടായ്മയായി തുടങ്ങിയ ആചാരം ലോകപ്രശസ്തമായ പാചക ഉത്സവമായി മാറുകയായിരുന്നു. രാജ്യത്തിന്റെ സമ്പന്നമായ പാരമ്പര്യം വിളിച്ചോതുന്ന മേള കാണാൻ നിരവധി ട്രാവൽ ബ്ലോഗർമാരും ഫുഡ് ഇൻഫ്ലുവൻസർമാരുമാണ് ഇത്തവണ എത്തിയത്.
വൈവിധ്യമാർന്ന വിഭവങ്ങൾ
സാധാരണ രീതിയിൽ വേവിച്ച ഒച്ചുകൾ മാത്രമല്ല ഇവിടെ ലഭിക്കുന്നത്. സന്ദർശകരെ ആകർഷിക്കാൻ പലവിധ രുചിക്കൂട്ടുകൾ ഷെഫുമാർ ഒരുക്കിയിരുന്നു:
- ക്ലാസിക് ഗ്രിൽഡ് ഒച്ചുകൾ
- ഗാർലിക് ആന്റ് ഹെർബ് മിക്സ്
- സ്പൈസി ഒച്ച് കറി
പ്രാദേശിക ഷെഫുമാരും സന്നദ്ധപ്രവർത്തകരും കുടുംബങ്ങളും കൈകോർത്താണ് ഇത്രയും വലിയ ജനക്കൂട്ടത്തിനായുള്ള വിഭവങ്ങൾ തയ്യാറാക്കിയത്.
ആഘോഷങ്ങളും മത്സരങ്ങളും
ഒച്ച് കഴിക്കുന്നതിനൊപ്പം തന്നെ തത്സമയ പാചക പ്രദർശനങ്ങൾ, സംഗീത പരിപാടികൾ എന്നിവയും ഇതിനെല്ലാ പുറമെ, ആരാണ് ഏറ്റവും കൂടുതൽ ഒച്ചുകൾ തിന്നുക എന്ന് കണ്ടെത്താനുള്ള ആവേശകരമായ മത്സരവും നടക്കാറുണ്ട്.
