ലോട്ടറിയടിച്ചത് 18 തവണ!; ‘ജാക്ക്‌പോട്ട്’ രഹസ്യം വെളിപ്പെടുത്തി വൈറലായി ഭാഗ്യവാൻ

ഭാഗ്യം എന്നത് ചിലരുടെ ജീവിതത്തിൽ ഒരു അതിഥിയായി വരാറുണ്ട്, എന്നാൽ അമേരിക്കയിലെ ഐഡഹോ സ്വദേശിയായ റോബർട്ട് ബെവന്റെ കാര്യത്തിൽ അത് ഒരു സ്ഥിരം സന്ദർശകനാണ്. കേൾക്കുമ്പോൾ അവിശ്വസനീയമെന്ന് തോന്നുമെങ്കിലും, കഴിഞ്ഞ കുറച്ചുദിവസങ്ങളായി സോഷ്യൽ മീഡിയയിൽ വൈറലായിക്കൊണ്ടിരിക്കുന്നത് റോബർട്ടിന്റെ 18ാമത്തെ ലോട്ടറി വിജയമാണ്. എന്നാൽ, ഈ വിജയങ്ങളേക്കാളൊക്കെ ലോകത്തെ അദ്ഭുതപ്പെടുത്തുന്നത് തന്റെ ഭാഗ്യത്തെക്കുറിച്ച് അദ്ദേഹം നൽകിയ ഹൃദ്യമായ മറുപടിയാണ്.

ഏറ്റവും ഒടുവിലായി ഐഡഹോ ലോട്ടറിയുടെ ‘$1,000,000 കിങ് സ്‌ക്രാച്ച് ഗെയിമി’ലൂടെ 50,000 ഡോളർ (ഏകദേശം 47.97 ലക്ഷം രൂപ) ആണ് റോബർട്ട് നേടിയത്. ഇതോടെ അദ്ദേഹത്തിന്റെ ലോട്ടറി വിജയങ്ങളുടെ എണ്ണം 18 ആയി ഉയർന്നു. ഐഡഹോ ലോട്ടറി അവരുടെ ഔദ്യോഗിക ഇൻസ്റ്റഗ്രാം പേജിലൂടെയാണ് ഈ അപൂർവ നേട്ടം പുറത്തുവിട്ടത്. ‘മിന്നൽ 18 തവണ ഒരേ സ്ഥലത്ത് തന്നെ അടിക്കുമോ? റോബർട്ട് ബെവന്റെ കാര്യത്തിൽ അത് സംഭവിക്കും,’ എന്ന അടിക്കുറിപ്പോടെയാണ് അധികൃതർ ഈ വാർത്ത പങ്കുവച്ചത്.

റോബർട്ടിന്റെ ഭാഗ്യപരീക്ഷണം ഇന്നോ ഇന്നലെയോ തുടങ്ങിയതല്ല. 1997ൽ ഐഡഹോ ലോട്ടറി നടത്തിയ ‘ബ്ലേസർ ബക്‌സ്’ എന്ന പ്രമോഷനിലൂടെയാണ് അദ്ദേഹം ആദ്യമായി വലിയൊരു സമ്മാനം നേടുന്നത്. അന്ന് ഐഡഹോ പ്രദേശത്തിനു നൽകിയ ഏഴ് ‘ഷെവർലെ ബ്ലേസർ’ കാറുകളിൽ ഒന്നിന്റെ അവകാശി റോബർട്ട് ആയിരുന്നു. അന്ന് മുതൽ ഇന്നുവരെ 1,000 ഡോളർ മുതൽ 2,00,000 ഡോളർ വരെയുള്ള വിവിധ തുകകൾ അദ്ദേഹം സമ്മാനമായി നേടിയിട്ടുണ്ട്. ലോട്ടറി അധികൃതർ പഴയ റെക്കോർഡുകൾ പരിശോധിച്ചപ്പോഴാണ് ഈ സ്ഥിരം വിജയിയെ തിരിച്ചറിഞ്ഞതും അദ്ദേഹത്തിന്റെ വിജയഗാഥ ലോകത്തെ അറിയിച്ചതും.

ലോട്ടറി ഓഫിസിൽ സമ്മാനം വാങ്ങാൻ എത്തിയപ്പോൾ ഉദ്യോഗസ്ഥർ റോബർട്ടിനോട് ചോദിച്ചു, ‘എന്താണ് നിങ്ങളുടെ ഈ തുടർച്ചയായ വിജയങ്ങളുടെ രഹസ്യം?’. പണത്തേക്കാളും പ്രശസ്തിയേക്കാളും ഉപരിയായി അദ്ദേഹം നൽകിയ മറുപടി ഏതൊരു വ്യക്തിയുടെയും കണ്ണ് നിറയ്ക്കുന്നതായിരുന്നു.

‘എന്റെ യഥാർത്ഥ ഭാഗ്യം ഈ ലോട്ടറി പണമല്ല, പകരം കഴിഞ്ഞ 40 വർഷമായി കൂടെയുള്ള എന്റെ പ്രിയപ്പെട്ട ഭാര്യയാണ്.’ പതിനെട്ട് തവണ ഭാഗ്യദേവത കനിഞ്ഞിട്ടും, തന്റെ ജീവിതത്തിലെ ഏറ്റവും വലിയ ജാക്ക്‌പോട്ട് തന്റെ ദാമ്പത്യമാണെന്ന് അദ്ദേഹം വിശ്വസിക്കുന്നു. ഭാര്യയുമായി ചേർന്ന് ലോട്ടറി ടിക്കറ്റുകൾ എടുക്കുന്നത് വർഷങ്ങളായി ജീവിതത്തിന്റെ ഭാഗമാണെന്നും, അതൊരു വിനോദമായി മാത്രമേ കാണാറുള്ളൂവെന്നും അദ്ദേഹം കൂട്ടിച്ചേർത്തു.

പലപ്പോഴും ലോട്ടറി എന്നത് ഒരു ലഹരിയായി മാറുന്നിടത്ത്, റോബർട്ട് ഇതിനെ കാണുന്നത് വെറുമൊരു നേരമ്പോക്കായാണ്. തങ്ങൾ രണ്ടുപേരും ചേർന്ന് തമാശയ്ക്കായി ടിക്കറ്റുകൾ വാങ്ങുന്നു, അതിൽ കിട്ടുന്ന സമ്മാനങ്ങൾ ജീവിതത്തിന് സന്തോഷം നൽകുന്നു. എന്നാൽ അതൊരിക്കലും ജീവിതത്തിന്റെ ലക്ഷ്യമല്ലെന്ന് അദ്ദേഹം വ്യക്തമാക്കുന്നു.

ഐഡഹോ ലോട്ടറി നൽകുന്ന വിവരമനുസരിച്ച്, ടിക്കറ്റ് വിൽപനയിലൂടെ ലഭിക്കുന്ന തുകയുടെ ഭൂരിഭാഗവും സമ്മാനങ്ങൾ നൽകാനാണ് ഉപയോഗിക്കുന്നത്. ബാക്കിയുള്ള തുക പ്രദേശത്തെ പൊതുവിദ്യാലയങ്ങളുടെയും സർക്കാർ കെട്ടിടങ്ങളുടെയും വികസനത്തിനായിട്ടാണ് വിനിയോഗിക്കുന്നത്. വാങ്ങുന്ന ഓരോ ടിക്കറ്റും ഒരുതരത്തിൽ സമൂഹത്തിന് ഉപകാരപ്പെടുന്നു എന്ന സംതൃപ്തിയും ഈ ദമ്പതികൾക്കുണ്ട്.

റോബർട്ട് ബെവന്റെ കഥ കേവലം ഒരു ഭാഗ്യവാനിന്റേതല്ല. പണം കൊണ്ട് അളക്കാൻ കഴിയാത്ത ഒന്നാണ് കുടുംബബന്ധങ്ങൾ എന്ന് അദ്ദേഹം ഓർമിപ്പിക്കുന്നു. ലോട്ടറി അടിക്കുന്നതും പണം നേടുന്നതും സന്തോഷകരമാണെങ്കിലും, സ്‌നേഹമുള്ള ഒരു ജീവിതപങ്കാളി കൂടെയുള്ളതാണ് ഏറ്റവും വലിയ സമ്പാദ്യമെന്ന് അദ്ദേഹത്തിന്റെ ജീവിതം സാക്ഷ്യപ്പെടുത്തുന്നു

സോഷ്യൽ മീഡിയയിൽ റോബർട്ടിന്റെ ഈ നിലപാടിന് വലിയ കയ്യടിയാണ് ലഭിക്കുന്നത്. ‘യഥാർഥ കോടീശ്വരൻ ഇദ്ദേഹമാണ്,’ എന്നാണ് ഒരാൾ കമന്റ് ചെയ്തത്. ഭാഗ്യം തേടി അലയുന്നവർക്കിടയിൽ, തന്റെ പക്കലുള്ള യഥാർഥ ഭാഗ്യത്തെ തിരിച്ചറിഞ്ഞ റോബർട്ട് ബെവൻ ഇന്ന് ഒരു താരമാണ്.