ന്യൂ യോര്ക്ക് : 2026 ആഗസ്റ്റ് 6-ാം തീയതി പെന്സില്വാനിയയിലെ കലഹാരി റിസോര്ട്ടില് അരങ്ങേറുന്ന ഫൊക്കാന കണ്വെന്ഷനില് മലയാള ഭാഷക്കും സാഹിത്യത്തിനും അര്ഹമായ പ്രാധാന്യം നല്കി വിപുലമായ സാഹിത്യസമ്മേളനം സംഘടിപ്പിക്കുന്നു.
കുമരകത്ത് നടന്ന കേരള കണ്വെന്ഷനിലെ സാഹിത്യസമ്മേളനങ്ങളും ശ്രദ്ധേയമായിരുന്നു. മലയാള സാഹിത്യരംഗത്തെ പ്രമുഖ എഴുത്തുകാരെ ആദരിക്കുകയും പുരസ്കാരങ്ങള് നല്കി അനുമോദിക്കുകയും ചെയ്ത ചടങ്ങുകള് വലിയ ജനശ്രദ്ധ നേടിയിരുന്നു. സാഹിത്യരംഗത്ത് സജീവമായ എഴുത്തുകാരുടെ സാന്നിധ്യംകൊണ്ട് സമ്പുഷ്ടമായിരുന്ന ആ സമ്മേളനങ്ങള് ഏറെ പ്രശംസിക്കപ്പെട്ടു. മലയാളികളുടെ ലോകത്തിലെ ഏറ്റവും സമഗ്രവും പഴക്കമേറിയതുമായ സാമൂഹിക സംഘടനകളിലൊന്നായി ഫൊക്കാനയെ അടയാളപ്പെടുത്തുന്നതിലും ഇത്തരം പ്രവര്ത്തനങ്ങള് നിര്ണായക പങ്കുവഹിക്കുന്നു.
കലഹാരി റിസോര്ട്ടില് അരങ്ങേറുന്ന ഫൊക്കാന കണ്വെന്ഷനിലും ചരിത്രം കുറിക്കുന്ന സാഹിത്യസമ്മേളനമാണ് ഒരുങ്ങുന്നത്. മലയാള ഭാഷക്കും സാഹിത്യത്തിനും നോര്ത്ത് അമേരിക്കയില് ശ്രദ്ധേയമായ ഇടം സൃഷ്ടിക്കുന്നതില് ഫൊക്കാന സ്ഥിരതയാര്ന്ന പ്രവര്ത്തനങ്ങളാണ് നടത്തിവരുന്നത്. നോര്ത്ത് അമേരിക്കയിലെ മലയാളം എഴുത്തുകാരെ ഒരുമിപ്പിക്കുന്ന വലിയ സാഹിത്യവേദിയായിരിക്കും ഇത്തവണത്തെ സമ്മേളനം. കണ്വെന്ഷന്റെ പ്രധാന വേദികളിലൊന്നില് തന്നെയായിരിക്കും സാഹിത്യസമ്മേളനം നടക്കുക.
കേരളത്തില് നിന്നുള്ള പ്രമുഖ സാഹിത്യകാരന്മാരും അമേരിക്കയുടെ വിവിധ ഭാഗങ്ങളില് നിന്നെത്തുന്ന എഴുത്തുകാരും സമ്മേളനത്തില് പങ്കെടുക്കും. ശ്രീ. അടൂര് ഗോപാലകൃഷ്ണന്, കെ. വി. മോഹന്കുമാര്, ജോസ് പനച്ചി, പി.പി.ജെയിംസ്, ബെന്നി നായരമ്പലം, ഡോ. പ്രമീളാദേവി, ടി .ഡി . രാമകൃഷ്ണന് തുടങ്ങിയ നിരവധി സാഹിത്യ പ്രതിഭകള് സമ്മേളനത്തില് പങ്കെടുക്കും.
നോര്ത്ത് അമേരിക്കയിലെ മലയാളം എഴുത്തുകാരെ പ്രോത്സാഹിപ്പിക്കുന്നതിനായി നോവല്, ചെറുകഥ, കവിത, ഹാസ്യം, യാത്രാവിവരണം, ലേഖനം എന്നീ വിഭാഗങ്ങളില് കഴിഞ്ഞ രണ്ട് വര്ഷത്തിനിടെ പുറത്തിറങ്ങിയ കൃതികള് വിലയിരുത്തി അവാര്ഡുകള് നല്കും. ഇതുമായി ബന്ധപ്പെട്ട കൂടുതല് വിവരങ്ങള് ഉടന് പ്രസിദ്ധീകരിക്കുന്നതാണ്. കൂടാതെ, നോര്ത്ത് അമേരിക്കന് എഴുത്തുകാരുടെ സമഗ്ര സാഹിത്യ സംഭാവനകള് പരിഗണിച്ചും പ്രത്യേക അംഗീകാരങ്ങള് നല്കപ്പെടും.
ഇതുവരെ പ്രസിദ്ധീകരിച്ച മലയാള പുസ്തകങ്ങളുടെ വിപുലമായ പ്രദര്ശനവും കണ്വെന്ഷനോടനുബന്ധിച്ച് ഒരുക്കുന്നുണ്ട്. പുസ്തകചര്ച്ചകള്, പുസ്തക പ്രകാശനങ്ങള്, സാഹിത്യത്തിലെ പുതിയ പ്രവണതകളെക്കുറിച്ചുള്ള സംവാദങ്ങള് എന്നിവയും സമ്മേളനത്തിന്റെ ഭാഗമായി നടക്കും.
സാഹിത്യസമ്മേളനത്തിന്റെ ക്രമീകരണങ്ങള്ക്കായി കോരസണ് വര്ഗീസ് (ചെയര്മാന്), കെ. കെ. ജോണ്സന് (കോ-ചെയര്മാന്), മുരളി ജെ. നായര് (കോ-ചെയര്മാന്), ഗീത ജോര്ജ് (കോര്ഡിനേറ്റര്), ബെന്നി നെച്ചൂര്, അബ്ദുള് പുന്നയൂര്ക്കുളം, വേണുഗോപാലന് കൊക്കോടന്, അഭിലാഷ് തുണ്ടുമണ്ണില് എന്നിവരെ നിയമിച്ചതായി പ്രസിഡന്റ് സജിമോന് ആന്റണി, സെക്രട്ടറി ശ്രീകുമാര് ഉണ്ണിത്താന്, ട്രഷറര് ജോയി ചാക്കപ്പന് എന്നിവര് അറിയിച്ചു.
സാഹിത്യസമ്മേളനത്തില് പങ്കെടുക്കാന് ആഗ്രഹിക്കുന്നവര് ഇതുവരെ കണ്വെന്ഷനില് രജിസ്റ്റര് ചെയ്തിട്ടില്ലെങ്കില് ഉടന് രജിസ്റ്റര് ചെയ്യണമെന്ന് സംഘാടകര് അഭ്യര്ത്ഥിച്ചു. കണ്വെന്ഷന് വേദിയിലെ മുറികള് മുഴുവന് ബുക്ക് ചെയ്തതിനാല്, കൂടുതല് താമസസൗകര്യങ്ങള് സമീപ ഹോട്ടലുകളില് ക്രമീകരിച്ചിട്ടുണ്ടെന്നും ഭാരവാഹികള് അറിയിച്ചു.
Report വര്ഗീസ് കോരസണ്
Leave a comment