ജയ്പുർ: ഐ.പി.എൽ. ഫ്രാഞ്ചൈസിയായ രാജസ്ഥാൻ റോയൽസിന്റെ ഭൂരിഭാഗം ഓഹരികളും സ്വന്തമാക്കി വ്യവസായി ലക്ഷ്മി എൻ. മിത്തലും മകൻ ആദിത്യ മിത്തലും അദാർ പൂനാവാലയും. ഏകദേശം 15,600 കോടി രൂപയ്ക്കാണ് (1.65 ബില്യൺ ഡോളർ) ടീമിനെ ഇവർ ഏറ്റെടുത്തത്.
കൽ സോമാനി-റോബ് വാൾട്ടൺ-ഷീല ഫോർഡ് ഹാംപ് കൺസോർഷ്യം ലേലത്തിൽനിന്ന് പിന്മാറിയതിനെത്തുടർന്നാണ് മിത്തൽ കുടുംബവും പൂനാവാലയും ചേർന്ന് ഈ ഇടപാട് നടത്തിയത്. ബി.സി.സി.ഐ., സി.സി.ഐ., ഐ.പി.എൽ. ഗവേണിങ് കൗൺസിൽ എന്നിവയുൾപ്പെടെയുള്ള നിയന്ത്രണ ഏജൻസികളുടെ അനുമതി ലഭിക്കുന്നതോടെ ഈ നടപടികൾ പൂർത്തിയാകും.
പുതിയ കരാർ പ്രകാരം മിത്തൽ കുടുംബത്തിന് രാജസ്ഥാൻ റോയൽസിൽ ഏകദേശം 75 ശതമാനം ഓഹരി പങ്കാളിത്തമുണ്ടാകും. അദാർ പൂനാവാലയ്ക്ക് 18 ശതമാനം ഓഹരികളും ലഭിക്കും. നിലവിലെ ഉടമയായ മനോജ് ബദാലെ ഉൾപ്പെടെയുള്ള നിക്ഷേപകർക്ക് ബാക്കി 7 ശതമാനം ഓഹരികൾ കൈവശമുണ്ടാകും.
ലക്ഷ്മി എൻ. മിത്തൽ, ആദിത്യ മിത്തൽ, വാനിഷ മിത്തൽ-ഭാട്ടിയ, അദാർ പൂനാവാല, മനോജ് ബദാലെ എന്നിവരടങ്ങുന്നതായിരിക്കും ടീമിന്റെ പുനഃസംഘടിപ്പിച്ച പുതിയ ഭരണസമിതി. ഐ.പി.എൽ. ടീമിന് പുറമെ ദക്ഷിണാഫ്രിക്കയിലെ പാൾ റോയൽസ്, കരീബിയനിലെ ബാർബഡോസ് റോയൽസ് എന്നീ ടീമുകളും ഈ ഇടപാടിലൂടെ പുതിയ ഉടമസ്ഥരുടെ കീഴിലാകും.
