ഡാളസ് : സെന്റ് പോള്സ് മാര്ത്തോമ ഇടവകയിലെ ശുശ്രൂഷാ കാലയളവ് പൂര്ത്തിയാക്കി മടങ്ങുന്ന ബഹുമാനപ്പെട്ട മനു അച്ചനും ഡാളസ് സി എസ് ഐ കോണ്ഗ്രിഗേഷനില് സേവനം പൂര്ത്തിയാക്കി കേരളത്തിലേക്ക് തിരിക്കുന്ന സുഗു അച്ചനും ഇടവക ഉചിതമായതും ഹൃദയസ്പര്ശിയുമായ യാത്രയയപ്പ് നല്കി. ഏപ്രില് 12 ഞായറാഴ്ച്ച രാവിലെ നടന്ന ഇംഗ്ലീഷ് വിശുദ്ധ കുര്ബാനയെത്തുടര്ന്ന് വിപുലമായ പരിപാടികളോടെയാണ് യാത്രയയപ്പ് സമ്മേളനം സംഘടിപ്പിച്ചത്.
അലക്സാണ്ടര് ഫിലിപ്പിന്റെ പ്രാര്ത്ഥനയോടെ യോഗം ആരംഭിച്ചു. ഇംഗ്ലീഷ് ക്വയര് ആലപിച്ച മനോഹരമായ ഗാനം പരിപാടിക്ക് ഭക്തിസാന്ദ്രമായ തുടക്കം കുറിച്ചു.റവ. റെജിന് രാജു സ്വാഗതവും അധ്യക്ഷ പ്രസംഗവും നടത്തി. അച്ചന്മാരുടെ സേവനങ്ങളെ അദ്ദേഹം സ്മരിച്ചു.
ഇടവകയുടെ സ്നേഹോപഹാരമായി അച്ചന്മാര്ക്ക് പുഷ്പഹാരങ്ങള് അര്പ്പിച്ചു. വിവിധ സംഘടനകളെ പ്രതിനിധീകരിച്ച് ലിജി സഖറിയ (ക്വയര് & പ്രാര്ത്ഥനാ ഗ്രൂപ്പുകള്), ക്രിസ്റ്റീന രാജു & ജോഷ്വ സഖറിയ (യൂത്ത് ഫെലോഷിപ്പ് & യുവജനസഖ്യം), സോജി സഖറിയ (ഇടവക) എന്നിവര് ആശംസകള് അര്പ്പിച്ചു.
ഇടവക ട്രസ്റ്റിമാരായ രാജു ചാക്കോ,റിപ്സണ് തോമസ് എന്നിവര് ചേര്ന്ന് അച്ചന്മാര്ക്ക് യാത്രയയപ്പ് സമ്മാനം കൈമാറി. സണ്ഡേ സ്കൂളിനെ പ്രതിനിധീകരിച്ച് ലീ മാത്യു കൃതജ്ഞതയും ആശംസകളും അറിയിച്ചു.
യാത്രയയപ്പിന് മറുപടിയായി റവ റെജീവ് സുഗുവും ,റവ. എബ്രഹാം കുരുവിളയും സംസാരിച്ചു. തങ്ങളുടെ ശുശ്രൂഷാ വേളയില് ഇടവക നല്കിയ സഹകരണത്തിന് അവര് നന്ദി രേഖപ്പെടുത്തി.മിസ്സിസ് സാറാ ചെറിയാന്റെ പ്രാര്ത്ഥനയോടെയും അച്ചന്റെ ആശീര്വാദത്തോടെയും സമ്മേളനം സമാപിച്ചു. എക്സിക്യൂട്ടീവ് കമ്മിറ്റി അംഗങ്ങള് അച്ചന്മാരോടൊപ്പം സ്മരണിക ഫോട്ടോ എടുക്കുകയും ചെയ്തു.
Leave a comment