അമേരിക്കയിൽ മോർട്ട്ഗേജ് നിരക്കുകൾ മൂന്ന് വർഷത്തിന് ശേഷം 6 ശതമാനത്തിന് താഴെ

വാഷിങ്ടൻ: അമേരിക്കയിൽ ഭവന വായ്പാനിരക്കുകൾ (Mortgage Rates) കഴിഞ്ഞ മൂന്ന് വർഷത്തിനിടെ ആദ്യമായി 6 ശതമാനത്തിന് താഴെയെത്തി. ഫ്രെഡി മാക് പുറത്തുവിട്ട ഏറ്റവും പുതിയ കണക്കുകൾ പ്രകാരം 30 വർഷത്തെ ഫിക്സഡ് റേറ്റ് മോർട്ട്ഗേജ് ശരാശരി 5.98% ആയി കുറഞ്ഞു.

കഴിഞ്ഞ ആഴ്ച 6.01% ആയിരുന്ന നിരക്കാണ് ഇപ്പോൾ കുറഞ്ഞത്. 2022 സെപ്റ്റംബറിന് ശേഷം ആദ്യമായാണ് നിരക്ക് 6 ശതമാനത്തിന് താഴേക്ക് വരുന്നത്. നിരക്കിലെ ഈ കുറവ് സാധാരണക്കാരുടെ മാസത്തവണകളിൽ നൂറുകണക്കിന് ഡോളറുകളുടെ ലാഭമുണ്ടാക്കുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.

കുറഞ്ഞ നിരക്കുകൾ കൂടുതൽ ആളുകളെ വീട് വാങ്ങാൻ പ്രേരിപ്പിക്കുമെന്നാണ് വിലയിരുത്തൽ. ഭവന വിപണി സജീവമാക്കുന്നതിന്റെ ഭാഗമായി മോർട്ട്ഗേജ് ബോണ്ടുകൾ വാങ്ങാൻ ട്രംപ് ഭരണകൂടം ഫാനി മേ, ഫ്രെഡി മാക് എന്നിവയ്ക്ക് നിർദേശം നൽകിയിരുന്നു. ഇത് നിരക്കുകൾ ഇനിയും കുറയാൻ സഹായിക്കുമെന്ന് കരുതപ്പെടുന്നു. വീട് വാങ്ങാൻ ആഗ്രഹിക്കുന്നവർക്ക് ഈ വിലക്കുറവ് വലിയ അവസരമാണ് ഒരുക്കുന്നത്.