മനുഷ്യ പരിണാമം: ‘ലൂസി’യുടെ സിംഹാസനം ഇളകുന്നു; എത്യോപ്യയിൽ പുതിയ കണ്ടെത്തൽ

എത്യോപ്യ : മനുഷ്യന്റെ നേരിട്ടുള്ള പൂർവികരെന്ന് കരുതപ്പെട്ടിരുന്ന ‘ലൂസി’ (Australopithecus afarensis) എന്ന ഫോസിൽ വംശത്തിനൊപ്പം തന്നെ മറ്റ് മനുഷ്യ സദൃശ്യ വർഗ്ഗങ്ങളും ഭൂമിയിൽ ജീവിച്ചിരുന്നു എന്നതിന് ശക്തമായ തെളിവുകൾ ലഭിച്ചു. എത്യോപ്യയിലെ വോറാൻസോ-മില്ലെ  പ്രദേശത്തുനിന്ന് ലഭിച്ച 3.4 ദശലക്ഷം വർഷം പഴക്കമുള്ള പാദത്തിന്റെ ഫോസിലുകളാണ് ഈ പുതിയ കണ്ടെത്തലിന് ആധാരം.

പുതിയ വർഗ്ഗം (Australopithecus deyiremeda): 2010-ൽ കണ്ടെത്തിയ ഈ പാദത്തിന്റെ ഫോസിലുകൾ ‘ഓസ്‌ട്രലോപിറ്റിക്കസ് ഡെയിറെമെഡ’ എന്ന വിഭാഗത്തിന്റേതാണെന്ന് ശാസ്ത്രജ്ഞർ സ്ഥിരീകരിച്ചു. ലൂസിയുടെ വർഗ്ഗത്തിൽ നിന്നും വ്യത്യസ്തമായ താടിയെല്ലും പല്ലുകളും പാദഘടനയുമാണ് ഇതിനുള്ളത്.

ഒരേ കാലഘട്ടം, വ്യത്യസ്ത സ്വഭാവം: ലൂസിയുടെ വർഗ്ഗവും പുതിയതായി കണ്ടെത്തിയ വർഗ്ഗവും ഒരേ കാലഘട്ടത്തിൽ വെറും 5 കിലോമീറ്റർ ദൂരപരിധിയിൽ ജീവിച്ചിരുന്നവരാണ്. എന്നാൽ ലൂസിയുടെ വർഗ്ഗം പുൽമേടുകളിൽ കാണപ്പെടുന്ന സസ്യങ്ങൾ ആഹാരമാക്കിയപ്പോൾ, ഡെയിറെമെഡ വിഭാഗം കാടുകളിലെ ഇലകളും പഴങ്ങളുമാണ് ഭക്ഷിച്ചിരുന്നത്.

ലൂസിയുടെ വർഗ്ഗം നേരെ നടക്കാൻ ശീലിച്ചവരായിരുന്നു. എന്നാൽ പുതിയതായി കണ്ടെത്തിയ വർഗ്ഗത്തിന് നേരെ നടക്കാൻ കഴിയുന്നതിനൊപ്പം തന്നെ മരങ്ങളിൽ പിടിച്ചു കയറാൻ സഹായിക്കുന്ന തരത്തിലുള്ള കാല്വിരലുകളും (Grasping big toe) ഉണ്ടായിരുന്നു.