അദാനി ഗ്രൂപ്പിനെതിരായ യുഎസ് കേസ്: അഭിഭാഷകർ വഴി നോട്ടിസ് സ്വീകരിച്ചു

ന്യൂയോർക്ക് : അമേരിക്കൻ സെക്യൂരിറ്റീസ് ആൻഡ് എക്സ്ചേഞ്ച് കമ്മിഷന്റെ (SEC) സിവിൽ തട്ടിപ്പ് കേസിൽ നോട്ടിസ് കൈപ്പറ്റാൻ ഗൗതം അദാനിയും അനന്തരവൻ സാഗർ അദാനിയും സമ്മതിച്ചു. ഇതോടെ ഒരു വർഷത്തിലേറെയായി നിലനിന്നിരുന്ന നിയമപരമായ തടസ്സങ്ങൾ നീങ്ങി കേസ് നടപടികൾ വേഗത്തിലാകും.

ഇന്ത്യയിലായിരുന്നതിനാൽ നോട്ടിസ് നേരിട്ട് നൽകാൻ കഴിയാത്തതായിരുന്നു കേസ് നീണ്ടുപോകാൻ കാരണം. ഇപ്പോൾ അഭിഭാഷകർ വഴി നോട്ടിസ് സ്വീകരിക്കാൻ അദാനി കുടുംബം തയാറായി. അദാനി ഗ്രീൻ എനർജി ലിമിറ്റഡുമായി ബന്ധപ്പെട്ട് നിക്ഷേപകരെ തെറ്റിദ്ധരിപ്പിച്ചുവെന്നും അഴിമതി മറച്ചുവച്ചെന്നുമാണ് SEC-യുടെ സിവിൽ കേസ്.

കോടതി അംഗീകാരം നൽകിയാൽ, ആരോപണങ്ങൾക്കെതിരെ മറുപടി നൽകാൻ അദാനി ഗ്രൂപ്പിന് 90 ദിവസം വരെ സമയം ലഭിക്കും. സൗരോർജ്ജ കരാറുകൾക്കായി 26.5 കോടി ഡോളർ കൈക്കൂലി നൽകിയെന്ന ക്രിമിനൽ കുറ്റവും ഇവർക്കെതിരെ നിലവിലുണ്ട്. എല്ലാ ആരോപണങ്ങളും അദാനി ഗ്രൂപ്പ് നേരത്തെ നിഷേധിച്ചിരുന്നു.