ഹൂസ്റ്റൺ: മലയാളം സൊസൈറ്റി ഓഫ് അമേരിക്ക, ഹ്യൂസ്റ്റണ്ൻറെ സൂം മീറ്റിംഗ് ജനുവരി പതിനൊന്നാം തിയതി നാലുമണിക്ക് നടന്നു. എല്ലാവർക്കും പുതുവത്സരാശംസകൾ നേർന്നുകൊണ്ടും ആയുർആരോഗ്യത്തിന് വേണ്ടി പ്രാർഥിച്ചുകൊണ്ടും, പ്രത്യേകിച്ച് മലയാളം സൊസൈറ്റി പ്രസിഡണ്ട് മണ്ണിക്കരോട്ടിനെ സ്മരിച്ചുകൊണ്ടും വൈസ് പ്രസിഡണ്ട് പൊന്നുപിള്ള ഏവരെയും മീറ്റിങ്ങിലേക്ക് സ്വാഗതം ചെയ്തു. അതിനുശേഷം, സെക്രട്ടറി ജോർജ് പുത്തൻകുരിശ് ചെറുകഥ അവതരിപ്പിച്ച ജെയിംസ് ചിറത്തടത്തിനെ ഹൃസ്വമായി പരിചയപ്പെടുത്തി. തുടർന്ന് സൂം മാനേജർ എ. സി. ജോർജ്ജ് മോഡറേറ്ററായി മീറ്റിങ്ങ് ആരംഭിക്കുകയും ചെയ്തു.
ജെയിംസ് ചിറതടത്തിൽ ‘ബീ അമേരിക്കൻ ബേബി’ എന്ന ചെറുകഥ അവതരിപ്പിച്ചു. കഥയിലെ പ്രധാന കഥാപാത്രങ്ങളായ ആലീസിലൂടേയും, ജോണിക്കുട്ടിലൂടേയും, അവരുടെ മകനായ ജോവലിലൂടേയും ജെയിംസ് കഥ പറഞ്ഞു കഴിയുമ്പോൾ, ഈ അവസരങ്ങളുടെ നാടായ സ്വപ്നഭൂമിയിൽ ഉൽക്കർഷേച്ഛയോടെ വന്ന് ജീവിക്കുന്നവരോ, ജീവിച്ചു മരിച്ചുപോയവരുടേയോ കഥ ഇതെന്ന് തോന്നിപോകും. ഇതിൽ കഥാകൃത്ത് പച്ചയായ സത്യങ്ങൾ വിളിച്ചു പറയുന്നു, ലോകം വെട്ടിപ്പിടിക്കാൻ പോകുമ്പോൾ ജീവിക്കാൻ മറന്നുപോകുന്നവരുടെ കഥ ജീവിത മൂല്യങ്ങൾ നഷ്ടമാകുമ്പോഴും സാന്മാർഗ്ഗിക ചട്ടങ്ങൾ ലംഘിക്കപ്പെടുമ്പോഴും ജീവിതം വഴി തെറ്റിപോകുന്നവരുടെ കഥ, വളരെ ഒതുക്കത്തോടെയും സുന്ദരമായ ഭാഷാശൈലിയിലും അവതരിപ്പിക്കുന്നു,
ചർച്ചയിൽ പങ്കെടുത്തവർ അദ്ദേഹത്തിൻറെ ഭാഷാ പ്രയോഗങ്ങളെ അഭിനന്ദിച്ചപ്പോൾ ചിലതിനെ മാറ്റണം എന്നുള്ള നിർദേശവും പൊന്തി വന്നു. ഗുണപാഠത്തോടെ കഥ അവസാനിച്ചിരുന്നെങ്കിൽ നന്നായേനെ എന്ന അഭിപ്രായം ഉണ്ടായപ്പോൾ അതിലെങ്കിലും കഥ കാര്യം വ്യക്തമാക്കുന്നുണ്ടെന്ന അഭിപ്രായവും കേൾക്കുകയുണ്ടായി.
കഥയുടെ സാങ്കേതികത്വം, ക്രാഫ്റ്റ് ഇവയെല്ലാം ചർച്ച വിഷയമായി. പ്രൊഫ. ഫിലിപ്പ് കല്ലട, തോമസ് കളത്തൂർ, ജോസഫ് തച്ചാറ, ജോസഫ് നമ്പിമഠം, ടി.ൻ സമുവേൽ, എ. സി. ജോർജ്, പൊന്നുപിള്ള, ജെയിംസ് ചിറത്തടം, ജോർജ് പുത്തൻകുരിശ് തുടങ്ങിയവർ ചർച്ചയിൽ സജ്ജീവമായി പങ്കുകൊണ്ടു.
മലയാളം സൊസൈറ്റി വൈസ് പ്രസിഡണ്ട് പൊന്നുപിള്ളയുടെ നന്ദി പ്രകാശനത്തോടെ മീറ്റിങ് അവസാനിച്ചു.
