ലണ്ടന്: 2025-ലെ ബുക്കര് പുരസ്കാരം ഹംഗേറിയന് എഴുത്തുകാരനായ ഡേവിഡ് സൊല്ലോയ്ക്ക്. ലണ്ടനില് നടന്ന ചടങ്ങില് പുരസ്കാരം സമ്മാനിച്ചു. ഡേവിഡ് സൊല്ലോയുടെ ‘ഫ്ളെഷ്’ എന്ന നോവലാണ് പുരസ്കാരത്തിന് അര്ഹമായത്.
ഇന്ത്യന് സാഹിത്യകാരി കിരണ് ദേശായിയുടേതുള്പെടെ ആറു നോവലുകളാണ് ചുരുക്കപ്പട്ടികയില് ഇടംനേടിയത്. 50000 പൗണ്ടാണ്(ഏകദേശം 58 ലക്ഷം രൂപ) പുരസ്കാരത്തുക.
കാനഡയില് ജനിച്ച അദ്ദേഹം ലെബനന്, യുകെ, ഹംഗറി എന്നിവിടങ്ങളില് ജീവിച്ച ശേഷം ഇപ്പോള് വിയന്നയിലാണ് ഡേവിഡ് സൊല്ലോ താമസിക്കുന്നത്. 20-ല് അധികം ഭാഷകളിലേക്ക് വിവര്ത്തനം ചെയ്യപ്പെട്ട ആറ് ഫിക്ഷന് കൃതികളുടെയും നിരവധി ബിബിസി റേഡിയോ നാടകങ്ങളുടെയും രചയിതാവാണ് അദ്ദേഹം.
സൊല്ലോയുടെ ആദ്യ നോവലായ ‘ലണ്ടന് ആന്ഡ് ദി സൗത്ത്-ഈസ്റ്റ്’ 2008-ല് ബെറ്റി ട്രാസ്ക്, ജെഫ്രി ഫേബര് മെമ്മോറിയല് പുരസ്കാരങ്ങള് നേടി. ‘ഓള് ദാറ്റ് മാന് ഈസ്’ എന്ന കൃതിക്ക് ഗോര്ഡന് ബേണ് പ്രൈസും പ്ലിംപ്ടണ് പ്രൈസ് ഫോര് ഫിക്ഷനും ലഭിച്ചു.
2016-ല് ബുക്കര് പ്രൈസിന്റെ ചുരുക്കപ്പട്ടികയിലും ഡേവിഡ് സൊല്ലോ ഇടംനേടി. 2019-ല് ‘ടര്ബുലന്സ്’ എന്ന ചെറുകഥാ സമാഹാരത്തിന് എഡ്ജ് ഹില് പ്രൈസ് ലഭിച്ചു. ‘ഫ്ലെഷ്’ അദ്ദേഹത്തിന്റെ ആറാമത്തെ ഫിക്ഷന് കൃതിയാണ്.
Leave a comment