റാഞ്ചി: മുൻ ഇന്ത്യൻ ക്രിക്കറ്റ് ക്യാപ്റ്റൻ മഹേന്ദ്ര സിംഗ് ധോണിക്ക് വാഹനങ്ങളോടുള്ള ഇഷ്ടം ഏറെ പ്രസിദ്ധമാണ്. റാഞ്ചിയിലെ അദ്ദേഹത്തിൻ്റെ ഗാരേജ് ഏതൊരു വാഹന പ്രേമിയുടെയും സ്വപ്നമാണ്. ഇപ്പോഴിതാ, ഒരു ആരാധകൻ്റെ റോയൽ എൻഫീൽഡ് ഇൻ്റർസെപ്റ്റർ 650 ബൈക്കിൽ ധോണി കയ്യൊപ്പ് ചാർത്തിയ സംഭവമാണ് സോഷ്യൽ മീഡിയയിൽ ശ്രദ്ധ നേടുന്നത്.
ഏകദേശം മൂന്നര ലക്ഷം രൂപ വിലവരുന്ന ചുവന്ന റോയൽ എൻഫീൽഡാണ് ആരാധകൻ ധോണിയെ കാണിക്കാനായി എത്തിച്ചത്. വൈറലായ വീഡിയോയിൽ, ധോണി ബൈക്ക് ശ്രദ്ധയോടെ നോക്കിയ ശേഷം അതിൻ്റെ പെട്രോൾ ടാങ്കിൽ ഒപ്പിടുന്നത് കാണാം. ഒപ്പിട്ട ശേഷം ആരാധകനോട് ബൈക്ക് ഓടിച്ച് അഭിപ്രായം അറിയിക്കണമെന്ന് ധോണി പറഞ്ഞ വാക്കുകളും ശ്രദ്ധേയമായി.
ഈ വീഡിയോക്ക് താഴെ ‘റൈഡ് വിത്ത് മഹീ?’ എന്ന് ധോണി തന്നെ കമൻ്റ് ചെയ്തതും ആരാധകർക്കിടയിൽ ചർച്ചയായി. വീഡിയോ വൈറലായതോടെ നിരവധി പേരാണ് പ്രതികരണങ്ങളുമായി എത്തിയത്. “എന്തൊരു ഭാഗ്യവാൻ! ബൈക്കിന്റെ വില മൂന്ന് ലക്ഷത്തിൽ നിന്ന് 30 കോടി ആയി,” എന്നാണ് ഒരാൾ കമൻ്റ് ചെയ്തത്. ധോണിയുടെ പുതിയ ‘സാൾട്ട് ആൻഡ് പെപ്പർ’ ലുക്കും സോഷ്യൽ മീഡിയയിൽ ചർച്ചയായി. “നമ്മുടെയൊക്കെ കുട്ടിക്കാലത്തെ നായകന്മാർക്ക് പ്രായമാകുന്നത് കാണുമ്പോൾ വിഷമമുണ്ട്” എന്നും ചിലർ കുറിച്ചു.
