ഡെമോക്രാറ്റുകൾക്ക് നേട്ടമായ അമേരിക്കൻ തെരഞ്ഞെടുപ്പ് ഫലം സൂചിപ്പിക്കുന്നതെന്ത്?

വാഷിങ്ടൺ: അമേരിക്കയിൽ അടുത്ത വർഷം നടക്കുന്ന ഇടക്കാല തെരഞ്ഞെടുപ്പിന് മുന്നോടിയായി നടന്ന ന്യൂയോർക്ക് സിറ്റി മേയർ, വിർജീനിയ, ന്യൂജേഴ്‌സി ഗവർണർ തെരഞ്ഞെടുപ്പുകളിൽ നേട്ടം കൊയ്ത് ഡെമോക്രാറ്റിക് പാർട്ടി. ന്യൂയോർക്ക് സിറ്റിയിൽ ഡെമോക്രാറ്റിക് സോഷ്യലിസ്റ്റായ സൊഹ്രാൻ മംദാനി മേയർ സ്ഥാനത്തേക്ക് തെരഞ്ഞെടുക്കപ്പെട്ടപ്പോൾ വിർജീനിയയിൽ എബിഗെയ്ൽ സ്പാൻബെർഗർ, ന്യൂജേഴ്‌സിയിൽ മൈക്കി ഷെറിൽ എന്നീ മിതവാദികളായ ഡെമോക്രാറ്റുകളും ജയിച്ചുകയറി. രാജ്യത്തെ വിലക്കയറ്റം അടക്കം ഉയർത്തി നടത്തിയ പ്രചാരണമാണ് ഡെമോക്രാറ്റുകൾക്ക് നേട്ടമായത്. തെരഞ്ഞെടുപ്പിൽ ഡെമോക്രാറ്റുകൾക്ക് ലഭിച്ച മേൽക്കൈ അമേരിക്കക്കാർക്ക് ഡൊണാൾഡ് ട്രംപ് ഭരണകൂടത്തോടുള്ള അതൃപ്തി വെളിവാക്കുന്നതാണെന്ന് ഡെമോക്രാറ്റുകൾ പറയുന്നു. ട്രംപിന്റെ വിഭജന നയങ്ങൾക്ക് എതിരായ ജനവിധിയായും ചിലർ ഇതിനെ വിലയിരുത്തുന്നുണ്ട്. സാമ്പത്തിക നീതി, പ്രാദേശിക ശാക്തീകരണം, എല്ലാവരെയും ഉൾക്കൊള്ളുന്ന നയം എന്നിവ ഡെമോക്രാറ്റുകളുടെ പ്രധാന വിഷയങ്ങളായിരുന്നു. തെരഞ്ഞെടുക്കപ്പെട്ട നേതാക്കളുടെ വൈവിധ്യവും ജനകീയ പ്രചാരണങ്ങളും ഡെമോക്രാറ്റിക് പാർട്ടിയുടെ വളർച്ചയെ സൂചിപ്പിക്കുന്നു. 2026ലെ ഇടക്കാല തെരഞ്ഞെടുപ്പുകൾക്ക് മുന്നോടിയായി ഡെമോക്രാറ്റുകൾക്ക് ഇത് വലിയ ഊർജം നൽകിയിട്ടുണ്ട്.

പുരോഗമന പ്രത്യയശാസ്ത്രത്തിലൂടെ പ്രചാരണം നയിച്ചതും പുതുമ ആഗ്രഹിച്ച വോട്ടർമാരെ ആകർഷിച്ചതുമാണ് സൊഹ്രാൻ മംദാനിക്ക് നേട്ടമായത്. കൂടാതെ, ന്യൂയോർക്ക് സിറ്റിയിലെ ജനങ്ങളുടെ ചെലവ് കുറയ്ക്കാനുള്ള വാഗ്ദാനങ്ങളും വോട്ട!ർമാർക്കിടയിൽ ശ്രദ്ധ നേടി. മംദാനി വാഗ്ദാനങ്ങൾ നിറവേറ്റിയാൽ, ജീവിതച്ചെലവ് കുതിച്ചുയർന്ന അമേരിക്കൻ നഗരങ്ങൾക്ക് ന്യൂയോർക്ക് സിറ്റി ഒരു മാതൃകയാകും. ഒരുപക്ഷേ മംദാനി പരാജയപ്പെട്ടിരുന്നെങ്കിൽ പുരോഗമനവാദികൾക്കെതിരായ ഒരു മുന്നറിയിപ്പായി പ്രസിഡന്റ് ട്രംപ് അടക്കമുള്ള റിപ്പബ്ലിക്കന്മാർക്ക് ഇത് ഉപയോഗിക്കാമായിരുന്നു.

യുവജനങ്ങളുടെയും കുടിയേറ്റക്കാരുടെയും വലിയ പിന്തുണയും ഡിജിറ്റൽ പ്രചാരണവും മംദാനിയുടെ വിജയത്തിന് കാരണമായി. ഇത് കൂടുതൽ പുരോഗമനപരമായ ഭരണരീതിയിലേക്കുള്ള മാറ്റം സൂചിപ്പിക്കുന്നു. വാടക നിയന്ത്രണം, സൗജന്യ പൊതുഗതാഗതം, കുട്ടികൾക്കുള്ള പരിചരണ സൗകര്യങ്ങൾ വർധിപ്പിക്കൽ, മിനിമം വേതനം ഉയർത്തൽ തുടങ്ങിയവ മംദാനിയുടെ വാഗ്ദാനമായിരുന്നു. പ്രസിഡന്റ് ട്രംപിന്റെ ഭീഷണികളെ ചെറുക്കുമെന്നും കുടിയേറ്റക്കാരെ സംരക്ഷിക്കുമെന്നും അദ്ദേഹം ആവർത്തിച്ചിരുന്നു.

ന്യൂജേഴ്‌സിയിൽ മുൻ നേവി പൈലറ്റും കോൺഗ്രസ് അംഗവുമായ മൈക്കി ഷെറിൽ ഗവർണർ സ്ഥാനത്തേക്ക് തെരഞ്ഞെടുക്കപ്പെട്ടത് സംസ്ഥാനത്തെ ഡെമോക്രാറ്റുകളുടെ സ്വാധീനം നിലനിർത്തുന്നുണ്ട്. സാമ്പത്തിക സ്ഥിരത, ആരോഗ്യ സംരക്ഷണം, പൊതുവിദ്യാഭ്യാസം എന്നിവയായിരുന്നു ഷെറിലിന്റെ പ്രധാന പ്രചാരണ വിഷയങ്ങൾ. വിർജീനിയയിൽ പൊതു സുരക്ഷ, വിദ്യാഭ്യാസം, ഇരു പാർട്ടികളും സഹകരിച്ചുള്ള ഭരണം എന്നിവയ്ക്ക് ഊന്നൽ നൽകിയായിരുന്നു ഡെമോക്രാറ്റിക് സ്ഥാനാർഥി എബിഗെയ്ൽ സ്പാൻബെർഗർ പ്രചാരണം നയിച്ചത്. തെരഞ്ഞെടുപ്പിൽ വിജയിച്ചതോടെ വിർജീനിയയുടെ ആദ്യ വനിതാ ഗവർണറായി എബിഗെയ്ൽ സ്പാൻബെർഗർ മാറി.

അതേസമയം ന്യൂയോർക്ക് സിറ്റി മേയറായി സൊഹ്രാൻ മംദാനി തെരഞ്ഞെടുക്കപ്പെട്ടത് പ്രസിഡന്റ് ഡൊണാൾഡ് ട്രംപിന് കനത്ത തിരിച്ചടിയാണ്. തെരഞ്ഞെടുപ്പ് പ്രചാരണത്തിനിടെ, ട്രംപ് മംദാനിക്കെതിരെ നിലപാട് എടുക്കുകയും മംദാനി ജയിച്ചാൽ ന്യൂയോർക്ക് സിറ്റിക്ക് നൽകുന്ന ഫെഡറൽ ഫണ്ട് വെട്ടിക്കുറയ്ക്കുമെന്ന് ഭീഷണിപ്പെടുത്തുകയും ചെയ്തിരുന്നു. കമ്യൂണിസ്റ്റായ മംദാനി വിജയിക്കുന്നത് തനിക്ക് ചിന്തിക്കാൻ പോലും കഴിയില്ലെന്ന് ട്രംപ് പറഞ്ഞിരുന്നു. മംദാനിയുടെ പരാജയത്തിനായി ട്രംപ് റിപ്പബ്ലിക്കൻ സ്ഥാനാർഥി കർട്ടിസ് സ്ലിവയെ പിന്തുണയ്ക്കാതെ സ്വതന്ത്രനായ ആൻഡ്രൂ ക്യൂമോയ്ക്ക് പിന്തുണച്ചതും ശ്രദ്ധനേടിയിരുന്നു. ഒരു മോശം കമ്യൂണിസ്റ്റും ഒരു മോശം ഡെമോക്രാറ്റും മത്സരിച്ചാൽ മോശം ഡെമോക്രാറ്റിനെ തിരഞ്ഞെടുക്കും എന്നായിരുന്നു ട്രംപിന്റെ വാദം. റിപ്പബ്ലിക്കൻ സ്ഥാനാർഥിക്ക് വോട്ട് ചെയ്യുന്നത് മംദാനിക്ക് വോട്ടുചെയ്യുന്നതിന് തുല്യമാണെന്നും ട്രംപ് അവകാശപ്പെട്ടിരുന്നു.

ഇന്ത്യൻ വംശജനും ന്യൂയോർക്ക് അസംബ്ലി അംഗമായ സൊഹ്രാൻ മംദാനിയുടെ വിജയം അമേരിക്കൻ രാഷ്ട്രീയത്തിൽ പുതുചരിത്രം രചിച്ചിട്ടുണ്ട്. അമേരിക്കയുടെ സാമ്പത്തിക തലസ്ഥാനമായ ന്യൂയോ!ർക്ക് സിറ്റിയുടെ ആദ്യ മുസ്ലീം മേയറാണ് 34കാരനായ മംദാനി. കൂടാതെ, മേയറാകുന്ന ആദ്യ ഇന്ത്യൻ വംശജനും സൗത്ത് ഏഷ്യനുമാണ് അദ്ദേഹം. ഒരു നൂറ്റാണ്ടിനിടയിലെ ഏറ്റവും പ്രായം കുറഞ്ഞ മേയർ എന്ന നേട്ടവും മംദാനി സ്വന്തമാക്കി.

ഉഗാണ്ടയിലെ കംപാലയിൽ ജനിച്ച സോഹ്രാൻ മംദാനി, പ്രശസ്ത ഇന്ത്യൻ ചലച്ചിത്ര സംവിധായക മീര നായരുടെയും ഉഗാണ്ടൻ പണ്ഡിതൻ മഹ്മൂദ് മംദാനിയുടെയും മകനാണ്. ഏഴാം വയസ്സിൽ ന്യൂയോർക്കിലേക്ക് താമസം മാറിയ മംദാനി 2018ലാണ് അമേരിക്കൻ പൗരത്വം നേടിയത്. രാഷ്ട്രീയ പ്രവേശനത്തിന് മുൻപ് ഭവനരഹിതരാകുന്നവരെ സഹായിക്കുന്ന കൗൺസിലറായി ജോലി ചെയ്തിരുന്നു. 2020ലാണ് ന്യൂയോർക്ക് സ്‌റ്റേറ്റ് അസംബ്ലിയിലേക്ക് തെരഞ്ഞെടുക്കപ്പെട്ടതും രാഷ്ട്രീയ ജീവിതം ആരംഭിക്കുന്നതും. അതേസമയം യുഎസ് ഭരണഘടനയിലെ ആ!ർട്ടിക്കിൾ രണ്ട് സെക്ഷൻ ഒന്ന് പ്രകാരം, മംദാനിക്ക് യുഎസ് പ്രസിഡന്റ് സ്ഥാനത്തേക്ക് എത്തിപ്പെടാനാവില്ല. യുഎസിൽ ജനിച്ച ഒരാൾക്ക് മാത്രമേ പ്രസിഡന്റ് സ്ഥാനത്തേക്ക് മത്സരിക്കാനാകൂ.

രാജ്യത്തെ വിലക്കയറ്റം അടക്കം ഉയർത്തി നടത്തിയ പ്രചാരണമാണ് ഡെമോക്രാറ്റുകൾക്ക് നേട്ടമായത്. തെരഞ്ഞെടുപ്പിൽ ഡെമോക്രാറ്റുകൾക്ക് ലഭിച്ച മേൽക്കൈ അമേരിക്കക്കാർക്ക് ഡൊണാൾഡ് ട്രംപ് ഭരണകൂടത്തോടുള്ള അതൃപ്തി വെളിവാക്കുന്നതാണെന്ന് ഡെമോക്രാറ്റുകൾ പറയുന്നു. ട്രംപിന്റെ വിഭജന നയങ്ങൾക്ക് എതിരായ ജനവിധിയായും ചിലർ ഇതിനെ വിലയിരുത്തുന്നുണ്ട്.