യുഎസിലേക്ക് കടക്കാനുള്ള ശ്രമത്തിനിടെ ഇന്ത്യൻ യുവാവ് ഗ്വാട്ടിമാലയിൽ കൊല്ലപ്പെട്ടു

ചണ്ഡിഗഡ്: യുഎസിലേക്ക് കടക്കാനുള്ള ശ്രമത്തിനിടെ ഹരിയാന സ്വദേശിയായ യുവാവ് ഗ്വാട്ടിമാലയിൽ വച്ച് കൊല്ലപ്പെട്ടു. കയ്തൽ ജില്ലയിലെ മോഹന ഗ്രാമത്തിൽ നിന്നുള്ള യുവരാജിനെ (18) ആണ് മനുഷ്യക്കടത്തുകാർ വധിച്ചത്. പഞ്ചാബിൽ നിന്നുള്ള മറ്റൊരു യുവാവും കൊല്ലപ്പെട്ടതായി സൂചനയുണ്ട്.

ഹരിയാനയിൽ നിന്നുള്ള 3 ട്രാവൽ ഏജൻസികളാണ് പണം വാങ്ങി യുവരാജിനെ കയറ്റിവിട്ടത്. ഗ്വാട്ടിമാലയിൽ നിന്ന് രഹസ്യപാതയിലൂടെ യുഎസിലേക്ക് കടത്തുന്ന മനുഷ്യക്കടത്തു സംഘം പണം ആവശ്യപ്പെട്ട് 2 ചെറുപ്പക്കാരെയും തടവിൽ വച്ചു. തുടർന്ന് 3 ലക്ഷം രൂപ ആവശ്യപ്പെട്ട് വീട്ടുകാരെ വിളിച്ചു. പണം അയച്ചുകൊടുത്തതിനു പിന്നാലെ കുടുംബത്തിന് യുവരാജിന്റെ മരണ സർട്ടിഫിക്കറ്റും ചിത്രവും അയച്ചുകൊടുത്തു. ഏജന്റുമാർക്കും മനുഷ്യക്കടത്തുകാർക്കുമായി 50 ലക്ഷത്തോളം രൂപ നൽകിയെന്ന് കുടുംബം പറയുന്നു.