ഫിലഡൽഫിയ: നഷ്ടപ്പെടുന്ന (നഷ്ടപ്പെട്ടുകൊണ്ടിരിക്കുന്ന) തലമുറയെ തിരികെ കൊണ്ടുവരികയും, ചേർത്തു നിർത്തുകയും ക്രിസ്തീയ ദൂതും സാക്ഷ്യവും സംസ്കാരവും പുതു തലമുറക്ക് കൈമാറുക എന്ന വെല്ലുവിളിയാകണം ജൂബിലി ആഘോഷങ്ങളുടെ ദൗത്യം എന്ന് മാർത്തോമ്മാ സഭയുടെ ഡോ. എബ്രഹാം മാർ പൗലോസ് മെത്രാപ്പൊലീത്ത. ഗ്രേറ്റർ ഫിലഡൽഫിയയിലെ ആദ്യ മാർത്തോമ്മാ ദേവാലയത്തിന്റെ ഒരു വർഷം നീണ്ടു നിൽക്കുന്ന സുവർണ ജൂബിലി പ്രവർത്തനങ്ങളുടെ ഉദ്ഘാടനം നിർവഹിച്ചു കൊണ്ട് സംസാരിക്കുകയായിരുന്നു അദ്ദേഹം.
കുർബാനയെ തുടർന്ന് ജൂബിലി ഉദ്ഘാടനം റവ. ജോസ് ഏബ്രഹാമിന്റെ പ്രാർഥനയോടെ ആരംഭിച്ചു. തുടർന്ന് ഇടവക വികാരി റവ. റ്റിറ്റി യോഹന്നാൻ, സന്നിഹിതരായിരുന്ന ഏവരേയും സ്വാഗതം ചെയ്തു. കുടുംബ ദിനവും, ഇടവക ദിനവും, സുവർണ ജൂബിലി പ്രവർത്തനോത്ഘാടനവും ഒരുമിച്ചു ആഘോഷിച്ച ചടങ്ങിൽ ഇടവകയിലെ 75ഉം അതിനു മുകളിലും പ്രായമുള്ളവരെ ഏബ്രഹാം മാർ പൗലോസ് മെത്രാപ്പൊലീത്ത പൊന്നാട നൽകി ആദരിച്ചു.
ഇടവകയുടെ ജൂബിലി കൊയർ ഗാനങ്ങൾ ആലപിച്ചു. സുവർണ ജൂബിലിയുടെ ലോഗോ, ഇടവകയുടെ ഡിജിറ്റൽ ഫോട്ടോ ഡയറക്റ്ററിയുടെ പ്രകാശനം എന്നിവയും മെത്രാപ്പൊലീത്ത നിർവഹിച്ചു. സുവർണ ജൂബിലിയുടെ പ്രോജക്ടുകൾ വിശദീകരിക്കുന്ന ഒരു വിഡിയോ അവതരിപ്പിച്ചു. ഇടവക സെക്രട്ടറി തോമസ് ഏബ്രഹാം(ബിജു) ഏവർക്കും നന്ദി പറഞ്ഞു. ഫിലഡൽഫിയ മേഖലയിലെ യൂത്ത് ചാപ്ലയിൻ റവ. ജെഫ് ജാക് ഫിലിപ്പിന്റെ പ്രാർഥനയോടെയും ഏബ്രഹാം മാർ പൗലോസ് തിരുമേനിയുടെ ആശിർവാദത്തോടെയും ഉദ്ഘാടന ചടങ്ങ് പര്യവസാനിച്ചു.
Leave a comment