വനിതാ ഏകദിന ലോകകപ്പിൽ ഇന്ത്യ സെമി ഫൈനലിൽ. ന്യൂസിലൻഡിനെ 53 റൺസിന് തോൽപിച്ചാണ് ഇന്ത്യ സെമി ഫൈനലിലെത്തിയത്. ആദ്യം ബാറ്റ് ചെയ്ത ഇന്ത്യ 49 ഓവറിൽ 3 വിക്കറ്റ് നഷ്ടത്തിൽ 340 റൺസ് എടുത്തു. മറുപടി ബാറ്റിങ്ങിൽ ന്യൂസിലൻഡിന്റെ വിജയലക്ഷ്യം 44 ഓവറിൽ 325 ആക്കിയെങ്കിലും അവർക്ക് 271 റൺസ് മാത്രമേ നേടാനായുള്ളു.
നവി മുംബൈ, ഡി വൈ പാട്ടീൽ സ്റ്റേഡിയത്തിൽ ഇടയ്ക്ക് മഴ എത്തിയതിനെ തുടർന്ന് മത്സരം ആദ്യം 49 ഓവറാക്കി ചുരുക്കിയെങ്കിലും പിന്നീടത് 44 ഓവറാക്കി മാറ്റി. പ്രതിക റാവൽ (122), സ്മൃതി മന്ദാന (109) എന്നിവരുടെ ഇന്നിംഗ്സുകളാണ് ഇന്ത്യയെ കൂറ്റൻ സ്കോറിലേക്ക് നയിച്ചത്. ജമീമ റോഡ്രിഗസ് 55 പന്തിൽ പുറത്താവാതെ നിന്ന് 76 റൺസെടുത്തു.
