ഗ്ലാസ്ഗോ: കോമൺവെൽത്ത് ഗെയിംസിൽ ഇന്ത്യയുടെ പുതുൽ സോനോവാളിന്റെ അരങ്ങേറ്റം ലോകചാമ്പ്യനെ അട്ടിമറിച്ചുകൊണ്ട്. പുരുഷന്മാരുടെ ലോൺ ബോൾസിൽ കാനഡയുടെ റ്യാൻ ബെസ്റ്ററിനെയാണ് സോനോവാൾ അട്ടിമറിച്ചത്. സെക്ഷൻ ഡിയിലെ ആദ്യ മത്സരത്തിൽ ടൈ ബ്രേക്കറിലായിരുന്നു പുതുലിന്റെ ജയം. ലോക റാങ്കിൽ ഇരുപത്തിയൊന്നാം സ്ഥാനക്കാരനാണ് പുതുൽ. രണ്ടു തവണ കോമൺവെൽത്ത് ഗെയിംസിൽ വെള്ളിയും ഒരു തവണ വെങ്കലവും നേടിയ താരമാണ് ബെസ്റ്റർ.
ആദ്യ സെറ്റ് ഇന്ത്യൻ താരം 5-4 എന്ന സ്കോറിൽ സ്വന്തമാക്കിയെങ്കിലും രണ്ടാം സെറ്റിൽ 7-3 എന്ന സ്കോറിൽ ബെസ്റ്റർ തിരിച്ചുവന്നു. ടൈബ്രേക്കർ സെറ്റിൽ പുതുൽ വിജയം സ്വന്തമാക്കി.
നിലവിൽ ഏഷ്യൻ ചാമ്പ്യനാണ് പുതുൽ. ഫോക്ലൻഡ് ഐലൻഡ്സിന്റെ സിസിൽ അലക്സാണ്ടറാണ് അടുത്ത എതിരാളി.
നേരത്തെ രൂപ റാണി ടിർക്കി-പിങ്കി സഖ്യം വനിതകളുടെ പെയറിൽ വിജയിച്ചു. ടൈബ്രേക്കറിൽ മാൾട്ടയുടെ റെബേക്ക ലൂയിസ്-കോണി ലെയ് സഹോദരിമാരെയാണ് അവർ പരാജയപ്പെടുത്തിയത്.
