വാഷിങ്ടൻ: അമേരിക്കയിൽ സ്ഥിരതാമസമാക്കാൻ ആഗ്രഹിക്കുന്ന പതിനായിരക്കണക്കിന് ഇന്ത്യൻ ഐടി പ്രഫഷണലുകളുടെ പ്രതീക്ഷകൾക്ക് കനത്ത ആഘാതമേകി യുഎസ് സ്റ്റേറ്റ് ഡിപ്പാർട്ട്മെന്റിന്റെ പുതിയ വീസ ബുള്ളറ്റിൻ.
പുതുതായി പുറത്തിറങ്ങിയ ജൂണിലെ വീസ ബുള്ളറ്റിനിൽ ഇന്ത്യക്കാരുടെ ഗ്രീൻ കാർഡ് മുൻഗണനാ തീയതികൾ പുറകോട്ട് പോയതായി വ്യക്തമാക്കുന്നു. ഇതോടെ സ്ഥിരതാമസത്തിനായുള്ള ഇന്ത്യക്കാരുടെ കാത്തിരിപ്പ് കാലാവധി ഇനിയും വർഷങ്ങളോളം നീളും.
ഏറ്റവും ഉയർന്ന യോഗ്യതയുള്ളവർക്കുള്ള EB-1 വിഭാഗത്തിലും, ഇന്ത്യൻ ഐടി ജീവനക്കാരുടെ പ്രധാന ആശ്രയമായ EB-2 വിഭാഗത്തിലുമാണ് ഈ കനത്ത തിരിച്ചടി ഉണ്ടായിരിക്കുന്നത്. ഓരോ രാജ്യത്തിനും അനുവദിച്ചിട്ടുള്ള നിശ്ചിത വീസ കോട്ടയേക്കാൾ കൂടുതൽ അപേക്ഷകർ ഇന്ത്യയിൽ നിന്ന് ഉള്ളതിനാലാണ് തീയതികൾ യുഎസ് സ്റ്റേറ്റ് ഡിപ്പാർട്ട്മെന്റിന് പിന്നോട്ട് മാറ്റേണ്ടി വന്നത്.
ഈ തീയതി മാറ്റം എച്ച്-1ബി വീസയിൽ യുഎസിൽ തുടരുന്ന പ്രൊഫഷണലുകളെ കടുത്ത അനിശ്ചിതാവസ്ഥയിലാക്കിയിരിക്കുകയാണ്. ഗ്രീൻ കാർഡ് നടപടികൾ അവസാന ഘട്ടത്തിൽ എത്തിനിൽക്കെ തീയതി പിന്നോട്ട് പോയത് ഇവരുടെ കരിയർ വളർച്ചയെയും കുടുംബത്തിന്റെ വീസ സ്റ്റാറ്റസിനെയും ബാധിക്കും. ഇതോടെ കാനഡ, യൂറോപ്പ് തുടങ്ങിയ രാജ്യങ്ങളിലേക്ക് കുടിയേറുന്നതിനെക്കുറിച്ച് ചിന്തിക്കാൻ പല പ്രഫഷണലുകളും നിർബന്ധിതരാവുകയാണ്.
Report ജയിംസ് വർഗീസ്
