വാട്‌സ്ആപ്പിൽ വിപ്ലവകരമായ മാറ്റം: ചാനൽ അഡ്മിൻമാർക്കായി ‘ചാനൽ സ്റ്റാറ്റസ്’ ഫീച്ചർ വരുന്നു

തിരുവനന്തപുരം: ലോകത്തിലെ ഏറ്റവും ജനപ്രിയ മെസേജിംഗ് പ്ലാറ്റ്‌ഫോമായ വാട്‌സ്ആപ്പ് (WhatsApp new update 2026) ഉപയോക്താക്കൾക്കായി മറ്റൊരു പുതിയ ഫീച്ചർ കൂടി അവതരിപ്പിക്കുന്നു. ചാനൽ അഡ്‌മിൻമാർക്കായി “ചാനൽ സ്റ്റാറ്റസ്” (Channel Status) എന്ന പുതിയ സൗകര്യമാണ് കമ്പനി ഒരുക്കുന്നത്. ഈ ഫീച്ചർ വഴി ചാനൽ ഉടമകൾക്ക് താൽക്കാലികമായി ഫോട്ടോ, വീഡിയോ, ടെക്സ്റ്റ് അടക്കമുള്ള അപ്‌ഡേറ്റുകൾ സ്റ്റാറ്റസ് രൂപത്തിൽ ഇനിമുതൽ ഫോളോവേഴ്‌സുമായി പങ്കിടാൻ കഴിയും.

നിലവിൽ വ്യക്തിഗത ഉപയോക്താക്കൾക്ക് (Personal Accounts) മാത്രമേ വാട്‌സ്ആപ്പിൽ സ്റ്റാറ്റസ് പോസ്റ്റ് ചെയ്യാനുള്ള സൗകര്യമുള്ളൂ. എന്നാൽ പുതിയ മാറ്റത്തോടെ ചാനൽ അഡ്‌മിൻമാർക്കും തങ്ങളുടെ ഫോളോവേഴ്‌സുമായി കൂടുതൽ വേഗത്തിലും എളുപ്പത്തിലും ആശയവിനിമയം നടത്താൻ അവസരം ലഭിക്കും. പ്രമുഖ വാട്‌സ്ആപ്പ് ട്രാക്കിംഗ് വെബ്‌സൈറ്റായ വാബീറ്റഇൻഫോ (WABetaInfo) പുറത്തുവിട്ട റിപ്പോർട്ട് പ്രകാരം, ഈ സ്റ്റാറ്റസ് അപ്‌ഡേറ്റുകൾ വ്യക്തിഗത സ്റ്റാറ്റസുകളെപ്പോലെ തന്നെ 24 മണിക്കൂറിന് ശേഷം സ്വയം അപ്രത്യക്ഷമാകും. സ്ഥിരമായ പോസ്റ്റുകൾക്ക് പകരം താൽക്കാലിക അറിയിപ്പുകൾ പങ്കിടാൻ ഈ സംവിധാനം കൂടുതൽ അനുയോജ്യമാകും.

എങ്ങനെ ഉപയോഗിക്കാം?
ചാനൽ സ്റ്റാറ്റസ് പോസ്റ്റ് ചെയ്യുന്നതിനായി ആദ്യം അഡ്‌മിൻ സ്വന്തം ചാനൽ തുറന്ന് ‘ക്രിയേറ്റ് സ്റ്റാറ്റസ്’ (Create Status) ഓപ്ഷൻ തിരഞ്ഞെടുക്കണം. തുടർന്ന് സാധാരണ പോലെ ഫോട്ടോ, വീഡിയോ, ടെക്സ്റ്റ് എന്നിവ ചേർക്കാൻ സാധിക്കും. സ്റ്റാറ്റസ് എഡിറ്റിംഗ് വിഭാഗത്തിൽ ടെക്സ്റ്റ്, സ്റ്റിക്കറുകൾ, മറ്റ് ഗ്രാഫിക് ഘടകങ്ങൾ എന്നിവ ഉൾപ്പെടുത്തി കൂടുതൽ ആകർഷകമാക്കാനും കഴിയും. ഒന്നിലധികം ചാനലുകൾ കൈകാര്യം ചെയ്യുന്ന അഡ്മിൻമാർക്ക് ഏത് ചാനലിലേക്കാണ് സ്റ്റാറ്റസ് പങ്കിടേണ്ടതെന്ന് തിരഞ്ഞെടുക്കാനും സൗകര്യമുണ്ടാകും. എന്നാൽ ഒരേസമയം ഒരു ചാനലിൽ മാത്രമേ സ്റ്റാറ്റസ് പോസ്റ്റ് ചെയ്യാൻ സാധിക്കൂ.

ഫോളോവേഴ്‌സിനും ഈ ഫീച്ചറിലൂടെ കൂടുതൽ ഇടപെടലുകൾ (Engagement) സാധ്യമാകും. ചാനൽ സ്റ്റാറ്റസുകൾക്ക് ലൈക്ക് നൽകുക, അവ സ്വന്തം വാട്‌സ്ആപ്പ് സ്റ്റാറ്റസിലേക്ക് ഷെയർ ചെയ്യുക തുടങ്ങിയ സംവിധാനങ്ങളും നിലവിൽ പരീക്ഷണഘട്ടത്തിലാണ്. വ്യക്തിഗത സ്റ്റാറ്റസുകളിൽ നിന്ന് ഉപയോക്താക്കൾക്ക് എളുപ്പത്തിൽ തിരിച്ചറിയാൻ ‘ചാനൽ സ്റ്റാറ്റസ്’ എന്ന പ്രത്യേക ലേബലോടെ ആയിരിക്കും ഇവ പ്രദർശിപ്പിക്കുക.

വിവിധ ഇവന്റുകളുടെ റിമൈൻഡറുകൾ, പ്രധാന ബ്രേക്കിംഗ് അറിയിപ്പുകൾ, പ്രമോഷൻ വിവരങ്ങൾ തുടങ്ങിയ താൽക്കാലിക ഉള്ളടക്കങ്ങൾ പങ്കിടാൻ ഈ ഫീച്ചർ ചാനൽ ഉടമകളെ ഏറെ സഹായിക്കുമെന്നാണ് വിലയിരുത്തൽ. നിലവിൽ ആൻഡ്രോയ്‌ഡ് (Android), ഐഒഎസ് (iOS) ബീറ്റാ ഉപയോക്താക്കൾക്കായി ഘട്ടംഘട്ടമായാണ് ഈ ഫീച്ചർ പുറത്തിറക്കുന്നത്. വരും ആഴ്‌ചകളിൽ എല്ലാ ഉപയോക്താക്കൾക്കും ഇത് ലഭ്യമാകുമെന്നാണ് പ്രതീക്ഷിക്കുന്നത്.