വാഷിങ്ടൻ: ‘ഓപ്പറേഷൻ എപിക് ഫ്യൂറി’ക്ക് പിന്നാലെ വിദേശത്തുള്ള അമേരിക്കൻ പൗരന്മാരുടെ സുരക്ഷ ഉറപ്പാക്കുന്നതിനായി വിദേശകാര്യ സെക്രട്ടറി മാർക്കോ റൂബിയോ സുപ്രധാന നിർദേശങ്ങൾ പുറപ്പെടുവിച്ചു. ഇറാൻ നടത്തിയ ആക്രമണങ്ങളുടെ പശ്ചാത്തലത്തിൽ പൗരന്മാരുടെ സുരക്ഷയ്ക്കാണ് സ്റ്റേറ്റ് ഡിപ്പാർട്ട്മെന്റ് ഏറ്റവും ഉയർന്ന മുൻഗണന നൽകുന്നതെന്ന് അദ്ദേഹംവിഡിയോ സന്ദേശത്തിലൂടെ വ്യക്തമാക്കി.
ഇതിനായി 24 മണിക്കൂറും പ്രവർത്തിക്കുന്ന പ്രത്യേക ടാസ്ക് ഫോഴ്സ് സജ്ജമാക്കിയിട്ടുണ്ടെന്നും സുരക്ഷാ വിവരങ്ങൾ തത്സമയം പൗരന്മാരിലേക്ക് എത്തിക്കുമെന്നും അദ്ദേഹം അറിയിച്ചു. വിദേശത്ത് താമസിക്കുന്ന അമേരിക്കക്കാർ, പ്രത്യേകിച്ച് മിഡിൽ ഈസ്റ്റിലുള്ളവർ, അടിയന്തരമായി ‘സ്മാർട് ട്രാവലർ എൻറോൾമെന്റ് പ്രോഗ്രാം’ (STEP) ൽ റജിസ്റ്റർ ചെയ്യണമെന്ന് സെക്രട്ടറി നിർദേശിച്ചു. step.state.gov എന്ന വെബ്സൈറ്റ് വഴി ഈ സേവനം ലഭ്യമാണ്. ഇതിലൂടെ അടുത്തുള്ള അമേരിക്കൻ എംബസികളിൽ നിന്നോ കോൺസുലേറ്റുകളിൽ നിന്നോ ഏറ്റവും പുതിയ സുരക്ഷാ അറിയിപ്പുകൾ നേരിട്ട് ലഭിക്കുമെന്ന് അദ്ദേഹം ഉറപ്പുനൽകി. പൗരന്മാരുടെ സുരക്ഷയ്ക്കായി വകുപ്പ് അതീവ ജാഗ്രതയിലാണ് എന്നും അദ്ദേഹം കൂട്ടിച്ചേർത്തു.
വിവരങ്ങൾ വേഗത്തിൽ ലഭ്യമാക്കുന്നതിനായി സോഷ്യൽ മീഡിയ പ്ലാറ്റ്ഫോമുകളും സ്റ്റേറ്റ് ഡിപ്പാർട്ട്മെന്റ് പ്രയോജനപ്പെടുത്തുന്നുണ്ട്. പൗരന്മാർ വാട്ട്സ്ആപ്പിലെ ‘Security Updates for U.S. Citizens’ എന്ന ചാനലോ അല്ലെങ്കിൽ സോഷ്യൽ മീഡിയയിലെ @TravelGov എന്ന ഹാൻഡിലോ പിന്തുടരണമെന്ന് നിർദേശമുണ്ട്. കൂടുതൽ വിവരങ്ങൾക്കും അലർട്ടുകൾക്കുമായി travel.state.gov സന്ദർശിക്കാവുന്നതാണ്.
അടിയന്തര സാഹചര്യങ്ങളിൽ സഹായം തേടുന്നതിനായി മിഡിൽ ഈസ്റ്റിലുള്ള അമേരിക്കൻ പൗരന്മാർക്ക് സ്റ്റേറ്റ് ഡിപ്പാർട്ട്മെന്റിനെ നേരിട്ട് ബന്ധപ്പെടാനുള്ള സൗകര്യവും ഒരുക്കിയിട്ടുണ്ട്. ഇതിനായി 1-202-501-4444 എന്ന നമ്പറിൽ ആഴ്ചയിൽ ഏഴ് ദിവസവും 24 മണിക്കൂറും സേവനം ലഭ്യമാണ്. ഇറാന്റെ ആക്രമണങ്ങളെ ‘ഭീരുത്വപരമായത്’ എന്ന് വിശേഷിപ്പിച്ച സെക്രട്ടറി, പൗരന്മാരെ സംരക്ഷിക്കാൻ സർക്കാർ സദാ സന്നദ്ധമാണെന്നും വ്യക്തമാക്കി.
Report ജയിംസ് വർഗീസ്
