ലാസ് വേഗസ്: ഇൻഷുറൻസ് പരിരക്ഷയില്ലാത്ത ദശലക്ഷക്കണക്കിന് അമേരിക്കക്കാർക്ക് ആശ്വാസമേകി പ്രസിഡന്റ് ഡൊണാൾഡ് ട്രംപിന്റെ തിരഞ്ഞെടുപ്പ് വാഗ്ദാനമായ ‘ഡിസ്കൗണ്ട് ഫാർമ’ (TRUMP-Rx) പദ്ധതി നിലവിൽ വന്നു. നിത്യോപയോഗ മരുന്നുകളുടെ വില ഗണ്യമായി കുറയ്ക്കുന്ന ഈ പദ്ധതിയിലൂടെ സാധാരണക്കാർക്ക് താങ്ങാനാവുന്ന നിരക്കിൽ ചികിത്സ ഉറപ്പാക്കുമെന്ന് വൈറ്റ്ഹൗസ് അറിയിച്ചു.
പദ്ധതിയുടെ പ്രധാന ലക്ഷ്യങ്ങൾ:
- 90% വരെ വിലക്കുറവ്: പ്രമുഖ ബ്രാൻഡഡ് മരുന്നുകൾക്ക് തുല്യമായ ഗുണനിലവാരമുള്ള ‘ജനറിക്’ മരുന്നുകൾ വിപണിയിലെത്തിക്കും. ഇതിലൂടെ മരുന്നുകളുടെ വിലയിൽ 90 ശതമാനം വരെ കുറവുണ്ടാകും.
- ആദ്യഘട്ടത്തിലെ ആനുകൂല്യങ്ങൾ: പ്രമേഹം (Diabetes), അമിതവണ്ണം കുറയ്ക്കാനുള്ള മരുന്നുകൾ (Weight loss drugs) എന്നിവയ്ക്കാണ് ആദ്യഘട്ടത്തിൽ വിലക്കുറവ് പ്രഖ്യാപിച്ചിരിക്കുന്നത്. വരും ദിവസങ്ങളിൽ കൂടുതൽ മരുന്നുകൾ പട്ടികയിൽ ഉൾപ്പെടുത്തും.
- രാജ്യാന്തര വിലയുമായി ഏകീകരണം: മറ്റ് രാജ്യങ്ങളെ അപേക്ഷിച്ച് അമേരിക്കയിൽ മരുന്നുകൾക്ക് 1000 ശതമാനം വരെ അധികവില ഈടാക്കുന്നതിനെ ട്രംപ് കുറ്റപ്പെടുത്തി. താരിഫ് നയങ്ങളിൽ മാറ്റം വരുത്തി, ലോകത്തിലെ ഏറ്റവും കുറഞ്ഞ നിരക്കിൽ അമേരിക്കക്കാർക്ക് മരുന്ന് ലഭ്യമാക്കുമെന്നും അദ്ദേഹം പ്രഖ്യാപിച്ചു.
വിവരങ്ങൾക്ക് വെബ്സൈറ്റ്:
പദ്ധതിയെക്കുറിച്ചുള്ള വിവരങ്ങൾക്കും ലഭ്യമായ മരുന്നുകളുടെ പട്ടികയ്ക്കുമായി പ്രത്യേക വെബ്സൈറ്റ് ആരംഭിച്ചിട്ടുണ്ട്: https://trumprx.gov/. മരുന്നുകളുടെ നിലവിലെ വിലയും ഈ സൈറ്റിൽ പ്രസിദ്ധീകരിച്ചിട്ടുണ്ട്.
ഇന്ത്യൻ മാതൃകയുമായുള്ള സാമ്യം
ഇന്ത്യയിൽ തുടക്കം കുറിച്ച ‘ജനഔഷധി’ പദ്ധതിക്ക് സമാനമായ രീതിയിലാണ് അമേരിക്കയിലും ഈ പുതിയ മരുന്ന് വിതരണ സംവിധാനം ഒരുക്കിയിരിക്കുന്നത്. ബ്രാൻഡഡ് മരുന്നുകൾക്ക് പകരം കുറഞ്ഞ വിലയിൽ ജനറിക് മരുന്നുകൾ സാധാരണക്കാരിലേക്ക് എത്തിക്കുക എന്ന ആശയമാണ് ഇവിടെയും നടപ്പിലാക്കുന്നത്.
