ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാർ യാഥാർത്ഥ്യത്തിലേക്ക്

ദാവോസ്: ഇന്ത്യയും യൂറോപ്യൻ യൂണിയനും ദീർഘകാലമായി കാത്തിരുന്ന ഒരു സ്വതന്ത്ര വ്യാപാര കരാർ യാഥാർത്ഥ്യമാകാൻ പോകുകയാണ്. അടുത്ത ചൊവ്വാഴ്ച ന്യൂഡൽഹിയിൽ നടക്കുന്ന ഇന്ത്യ ഇയു ഉച്ചകോടിയിൽ ഇത് സംബന്ധിച്ച പ്രഖ്യാപനം ഉണ്ടാകുമെന്നാണ് കരുതപ്പെടുന്നത്. യൂറോപ്യൻ പാർലമെന്റ് ഒപ്പുവെച്ച് അംഗീകരിച്ചുകഴിഞ്ഞാൽ, കുറഞ്ഞത് ഒരു വർഷമെടുക്കുന്ന ഒരു പ്രക്രിയയിലൂടെ, ഈ കരാറിന് ഉഭയകക്ഷി വ്യാപാരം വികസിപ്പിക്കാനും ഓഗസ്റ്റ് അവസാനം മുതൽ 50% യുഎസ് താരിഫ് ഏർപ്പെടുത്തിയിരിക്കുന്ന തുണിത്തരങ്ങൾ, ആഭരണങ്ങൾ തുടങ്ങിയ ഇന്ത്യൻ കയറ്റുമതി ഉയർത്താനും കഴിയും.

ആഗോള വിപണിയിലെ പ്രവേശനം ഉറപ്പാക്കാനുള്ള ഇന്ത്യയുടെ ശ്രമത്തിന്റെ ഭാഗമായി രാജ്യത്തിന്റെ നാല് വർഷത്തിനുള്ളിലെ ഒമ്പതാമത്തെ കരാർ ആയിരിക്കും ഇത്. യൂറോപ്യൻ യൂണിയനെ സംബന്ധിച്ചിടത്തോളം ഈ കരാർ വിതരണ ശൃംഖലയിലെ വൈവിധ്യവത്ക്കരണത്തെ പിന്തുണയ്ക്കുകയും ഇക്കാര്യത്തിൽ ചൈനയെ ആശ്രയിക്കുന്നത് കുറയ്ക്കുകയും ചെയ്യും. അതേ സമയം ഇന്ത്യയുടെ അതിവേഗം വളരുന്ന 4.2 ട്രില്യൺ ഡോളർ സമ്പദ്വ്യവസ്ഥയെ പ്രയോജനപ്പെടുത്തുകയും ചെയ്യുന്നു.

202425 ൽ മൊത്തം ഉഭയകക്ഷി ചരക്ക് സേവന വ്യാപാരം 190 ബില്യൺ ഡോളറിലധികം കവിഞ്ഞതോടെ, യു.എസിനും ചൈനയ്ക്കും ഒപ്പം ഇന്ത്യയുടെ മുൻനിര വ്യാപാര പങ്കാളികളിൽ ഒന്നാണ് യൂറോപ്യൻ യൂണിയൻ. 27 രാജ്യങ്ങളുള്ള കൂട്ടായ്മയിലേക്ക് ഇന്ത്യ ഏകദേശം 76 ബില്യൺ ഡോളറിന്റെ സാധനങ്ങളും 30 ബില്യൺ ഡോളറിന്റെ സേവനങ്ങളും കയറ്റുമതി ചെയ്തു. ഡൽഹി ആസ്ഥാനമായുള്ള തിങ്ക് ടാങ്കായ ഗ്ലോബൽ ട്രേഡ് റിസർച്ച് ഇനിഷ്യേറ്റീവ് പറയുന്നത് ഇന്ത്യൻ ഉൽപ്പന്നങ്ങളുടെ ശരാശരി യൂറോപ്യൻ യൂണിയൻ താരിഫ് ഏകദേശം 3.8% ആണ്.

2023 ൽ യൂറോപ്യൻ യൂണിയൻ വസ്ത്രങ്ങൾ, ഫാർമസ്യൂട്ടിക്കൽസ്, മെഷിനറികൾ എന്നിവയുൾപ്പെടെയുള്ള ഉൽപ്പന്നങ്ങളിൽ ജനറലൈസ്ഡ് സിസ്റ്റം ഓഫ് പ്രിഫറൻസസ് പ്രകാരം താരിഫ് ഇളവുകൾ പിൻവലിക്കാൻ തുടങ്ങിയതിനുശേഷം നഷ്ടമായ മത്സരശേഷി പുനഃസ്ഥാപിക്കാൻ ഇത് സഹായിക്കും, കൂടാതെ ഉയർന്ന യുഎസ് താരിഫുകളുടെ ആഘാതം നികത്തുകയും ചെയ്യും. ഇന്ത്യയിലേക്കുള്ള യൂറോപ്യൻ യൂണിയൻ കയറ്റുമതി നിരവധി തടസ്സങ്ങൾ നേരിടുകയാണ്. ഓട്ടോമൊബൈലുകൾ, ഓട്ടോ പാർട്‌സ്, കെമിക്കൽസ്, പ്ലാസ്റ്റിക് എന്നിവയ്ക്ക് തീരുവകൾ കൂടുതലാണ്. ലോകത്തെ മൊത്തം ആഭ്യന്തര ഉൽപ്പാദനത്തിന്റെ നാലിലൊന്ന് വിഹിതം കൈയ്യാളുന്ന ഈ കരാറിനെ ‘എല്ലാ കരാറുകളുടെയും മാതാവ്’ എന്നാണ് വിശേഷിപ്പിക്കുന്നത്.

ഏകദേശം 200 കോടി ജനങ്ങളെ ഉൾപ്പെടുത്തിക്കൊണ്ടുള്ള ഒരു കൂറ്റൻ വിപണിയാണ് ഇതിലൂടെ സൃഷ്ടിക്കപ്പെടുന്നത്. ആഗോള വിതരണ ശൃംഖലയെ പുനർനിർമ്മിക്കാനും വ്യാപാര ബന്ധങ്ങളിലെ അപകടസാധ്യതകൾ കുറയ്ക്കാനും ശേഷിയുള്ളതാണ് ഇന്ത്യയും യൂറോപ്യൻ യൂണിയനും തമ്മിലുള്ള ഈ ചരിത്രപരമായ ഉടമ്പടി. . കയറ്റുമതി വർധിപ്പിക്കാനും ഉൽപ്പാദന ശൃംഖലയിൽ മുൻനിരയിലെത്താനും ഇന്ത്യയ്ക്ക് ഈ കരാർ സഹായകമാകും. ക്ലീൻ എനർജി, ഫാർമസ്യൂട്ടിക്കൽസ്, ഡിജിറ്റൽ സേവനങ്ങൾ തുടങ്ങിയ മേഖലകളിൽ കരാർ വലിയ മാറ്റങ്ങൾ സൃഷ്ടിച്ചേക്കുമെന്നാണ് വിദഗ്ധരുടെ വിലയിരുത്തൽ.

2007ൽ തന്നെ കരാറിനെ സംബന്ധിച്ച ചർച്ചകൾ തുടങ്ങിയിരുന്നെങ്കിലും നടപ്പാക്കുന്നതിൽ തടസം നേരിടുകയായിരുന്നു. നിലവിൽ ഇന്ത്യ യൂറോപ്യൻ യൂണിയൻ ട്രേഡ് ആൻഡ് ടെക്‌നോളജി കൗൺസിൽ വഴി നിർണായക സാങ്കേതികവിദ്യകളിലും വിതരണ ശൃംഖലകളിലും ഇരു വിഭാഗവും സഹകരണം ഉറപ്പാക്കുന്നുണ്ട്. 2023ൽ ചരക്ക് വ്യാപാരം 124 ബില്യൺ യൂറോയിലും സേവനവ്യാപാരം 60 ബില്യൺ യൂറോയിലും എത്തി ചരിത്രനേട്ടം കൈവരിച്ചിരുന്നു. എങ്കിലും, കരാർ പൂർത്തിയാക്കാൻ ചില തടസ്സങ്ങൾ ഇനിയും മറികടക്കേണ്ടതുണ്ട്.

ഓട്ടോമൊബൈൽ, വൈൻ, സ്പിരിറ്റ് തുടങ്ങിയവയുടെ ഇറക്കുമതി തീരുവ കുറയ്ക്കണമെന്ന് യൂറോപ്യൻ യൂണിയൻ ആവശ്യപ്പെട്ടിട്ടുണ്ട്. വിദഗ്ധ തൊഴിലാളികൾക്ക് വിസ നൽകുന്നതിലും യാത്രാ സൗകര്യങ്ങളിലും ഇളവ് വേണമെന്നാണ് ഇന്ത്യയുടെ ആവശ്യം. കൂടാതെ പരിസ്ഥിതി മാനദണ്ഡങ്ങൾ, പൊതു സംഭരണം, നിയന്ത്രണങ്ങളുടെ ഏകീകരണം തുടങ്ങിയ കാര്യങ്ങളിലും ചർച്ചകൾ തുടരുകയാണ്.