രോഗികളെ രഹസ്യമായി ചിത്രീകരിച്ചതിന് ക്രിമിനൽ കുറ്റം ചുമത്തപ്പെട്ട ഗൈനക്കോളജിസ്റ്റിനെതിരെ കൂടുതൽ പരാതികൾ

വാഷിംഗ്ടൺ ഡി.സി: രോഗികളെ രഹസ്യമായി ചിത്രീകരിച്ചതിന് ക്രിമിനൽ കുറ്റം ചുമത്തപ്പെട്ട അമേരിക്കൻ സൈന്യത്തിലെ ഗൈനക്കോളജിസ്റ്റിനെതിരെ (സ്ത്രീരോഗ വിദഗ്ധൻ)യുള്ള സിവിൽ കേസിൽ 81 സ്ത്രീകൾ കൂടി പങ്കുചേർന്നു. ഇതോടെ, ഈ കേസിൽ ആരോപണവുമായി രംഗത്തുവന്നവരുടെ എണ്ണം വർധിച്ചു.

ടെക്‌സസിലെ ഫോർട്ട് ഹുഡിലെ ആർമി മേജറും ഡോക്ടറുമായ ബ്ലെയ്ൻ മക്‌ഗ്രോവാണ് ആരോപണ വിധേയൻ. കഴിഞ്ഞ നവംബറിൽ ആരംഭിച്ച സിവിൽ കേസിൽ, മെഡിക്കൽ പരിശോധനകൾക്കിടെ ഇയാൾ നിരവധി സ്ത്രീകളെ ആവർത്തിച്ച് അനുചിതമായി സ്പർശിക്കുകയും രഹസ്യമായി വീഡിയോയിൽ പകർത്തുകയും ചെയ്തുവെന്നാണ് ആരോപണം.

പരിശോധനകൾക്കിടെ ‘അനാവശ്യമായതും, അപമാനകരമായതുമായ സ്പർശനത്തിനും ഒളിഞ്ഞുനോട്ടത്തിനും രഹസ്യ ചിത്രീകരണത്തിനും’ ഇരയായതായി സ്ത്രീകൾ ആരോപിക്കുന്നു. ഇരകളെന്ന് പറയുന്നവരുടെ അഭിഭാഷകർ സൈന്യത്തിന്റെ പ്രത്യേക ട്രയൽ കൗൺസിൽ മക്‌ഗ്രോവിനെതിരെ ക്രിമിനൽ കുറ്റം ചുമത്തി ഒരു ദിവസത്തിന് ശേഷം, വിപുലീകരിച്ച പരാതി സമർപ്പിക്കുകയായിരുന്നു. സി.എൻ.എൻ. റിപ്പോർട്ട് പ്രകാരം, ക്രിമിനൽ കുറ്റങ്ങളിൽ 44 ഇരകളുമായി ബന്ധപ്പെട്ട 54 ഇനം ‘അപമര്യാദയായ ദൃശ്യരേഖപ്പെടുത്തൽ’ ഉൾപ്പെടെയുള്ള കുറ്റങ്ങളാണ് ഉൾപ്പെടുന്നത്.

സൈന്യം നൽകിയ കേസ് രഹസ്യമായി നടത്തിയ ചിത്രീകരണത്തിൽ ശ്രദ്ധ കേന്ദ്രീകരിക്കുമ്പോൾ, പുതുക്കിയ സിവിൽ കേസ് കൂടുതൽ ഗുരുതരമായ ആരോപണങ്ങൾ ഉന്നയിക്കുന്നുണ്ട്. ടെക്‌സസ് നിയമപ്രകാരം മക്‌ഗ്രോവ് ആക്രമണം, ലൈംഗികാതിക്രമം, മർദ്ദനം എന്നിവ നടത്തിയെന്ന് സിവിൽ കേസിൽ ആരോപിക്കുന്നു. ഗൈനക്കോളജിക്കൽ പരിശോധനകൾക്കിടെ ഇയാൾ ‘അറിഞ്ഞുകൊണ്ടും മനഃപൂർവവും ദോഷകരമായ ശാരീരിക ബന്ധം’ പുലർത്തിയെന്നും ഫയലിംഗിൽ പറയുന്നു. 2023 മുതലാണ് മക്‌ഗ്രോവ് ഫോർട്ട് ഹുഡിൽ രോഗികളെ ചികിത്സിച്ചിരുന്നത്.

നിലവിൽ സേവനത്തിലുള്ള ഒരു വനിതാ സൈനികൻ തനിക്ക് നേരിട്ട ദുരനുഭവം സിവിൽ കേസ് രേഖകളിൽ വിവരിക്കുന്നുണ്ട്. ബലാത്സംഗം സ്ഥിരീകരിക്കാൻ നടത്തുന്ന ‘റേപ്പ് കിറ്റ് എക്‌സാമിനേഷൻ’ പരിശോധനയ്ക്കിടെ മക്‌ഗ്രോവ് തന്റെ ചിത്രങ്ങൾ എടുത്തിരിക്കാൻ സാധ്യതയുണ്ടെന്ന് അവർ സംശയം പ്രകടിപ്പിച്ചു.

‘അങ്ങേയറ്റം ദുർബലമായ ആ പരിശോധനാ വേളയിൽ, ഡോക്ടർ തന്റെ കാലുകൾക്കിടയിൽ വെച്ച് നിരന്തരം ഫോണിൽ ശ്രദ്ധിച്ചിരുന്നു,’ എന്ന് വ്യവഹാരത്തിൽ പറയുന്നു. പരിശോധനയ്ക്കിടെ മക്‌ഗ്രോവ് ഫോൺ ഉപയോഗിച്ച് തന്റെ ഫോട്ടോയെടുത്തു എന്നാണ് ഈ സൈനിക ഇപ്പോൾ വിശ്വസിക്കുന്നത്.

കൂടാതെ, തന്റെ മെഡിക്കൽ രേഖകളിൽ ‘റേപ്പ് കിറ്റ് എക്‌സാമിനേഷൻ’ നടത്തിയതായി മക്‌ഗ്രോവ് രേഖപ്പെടുത്തിയില്ലെന്നും പരാതി പറയുന്നു. ഇതിനെത്തുടർന്ന് പിന്നീട് ക്രിമിനൽ കോടതിയിൽ കേസ് ഫയൽ ചെയ്ത പ്രോസിക്യൂട്ടർമാർക്ക് വ്യക്തമായ ഫോറൻസിക് രേഖകൾ ഹാജരാക്കാൻ കഴിഞ്ഞില്ല. അത് പ്രതിക്ക് അനുകൂലമാവുകയും ഇരയെ ആക്രമിച്ചയാൾ കുറ്റവിമുക്തനാക്കപ്പെടുകയും ചെയ്തുവെന്ന് പരാതിയിൽ ചൂണ്ടിക്കാട്ടി.

‘ഈ സാഹചര്യത്തിൽ മക്‌ഗ്രോവിന്റെ ദുഷ്പ്രവൃത്തി ലൈംഗിക അതിക്രമത്തിന് ഇരയായ വ്യക്തിയെ സംരക്ഷിക്കുന്നതിൽ പരാജയപ്പെടുക മാത്രമല്ല ചെയ്തത്, അത് അവരുടെ നീതിയിലേക്കുള്ള പ്രവേശനത്തെ സജീവമായി തകർക്കുകയും കുറ്റവാളിക്ക് രക്ഷപ്പെടാൻ അവസരം നൽകുകയും ചെയ്തു,’ ഫയലിംഗിൽ കൂട്ടിച്ചേർത്തു.

ലൈംഗിക ദുരുപയോഗങ്ങൾ പരിഹരിക്കുന്നതിനും ഇരകളെ പിന്തുണയ്ക്കുന്നതിനുമായി പെന്റഗൺ അടുത്തിടെ കൊണ്ടുവന്ന പരിഷ്‌കാരങ്ങൾ ഉദ്ദേശിച്ച രീതിയിൽ പ്രവർത്തിക്കുന്നുണ്ടോ എന്ന് ഈ കേസ് പരീക്ഷിക്കാനുള്ള സാധ്യതയുണ്ടെന്ന് നിയമ വിദഗ്ദ്ധരും അഭിഭാഷക ഗ്രൂപ്പുകളും വിലയിരുത്തുന്നതായി ‘വാഷിംഗ്ടൺ പോസ്റ്റ്’ റിപ്പോർട്ട് ചെയ്യുന്നു.