വാഷിങ്ടൺ: അമേരിക്ക താങ്ക്സ് ഗിവിങ് ദിനത്തിലേക്ക് അടുക്കുന്നു. നവംബർ മാസത്തിലെ നാലാമത്തെ വ്യാഴാഴ്ച ആണ് താങ്ക്സ് ഗിവിങ് ദിനം ആഘോഷിക്കുന്നത്. ഈ വർഷം നവംബർ 27നാണ് താങ്ക്സ് ഗിവിങ് ദിനം. അമേരിക്കൻ സംസ്കാരത്തിൽ വളരെ പ്രാധാന്യമുള്ള ഈ ദിവസം നന്ദി പ്രകടിപ്പിക്കാനും ഒത്തുചേരാനും ഒരുമിച്ചുള്ള വിരുന്നുകൾ ആസ്വദിക്കാനും കുടുംബങ്ങൾ സമയം കണ്ടെത്തുന്നു.
വിളവെടുപ്പുമായി ബന്ധപ്പെട്ട ചരിത്രമുള്ള താങ്ക്സ് ഗിവിങ് ദിനം നന്ദിയുടെയും ഐക്യത്തിൻ്റെയുമടക്കം പ്രതീകമാകുന്നു. ഫെഡറൽ അവധി ദിവസമായ താങ്ക്സ് ഗിവിങ് ഡേയിൽ എല്ലാ ഫെഡറൽ സർക്കാർ ഓഫീസുകളും മിക്ക സ്കൂളുകളും ബാങ്കുകളും കോടതികളും അടഞ്ഞുകിടക്കും. തപാൽ സേവനങ്ങളും മറ്റ് സർക്കാർ സേവനങ്ങളും ഈ ദിവസം നിർത്തിവെക്കും. ഇതിലൂടെ ഭൂരിഭാഗം ജീവനക്കാർക്കും വിദ്യാർഥികൾക്കും കുടുംബത്തോടൊപ്പം സമയം ചെലവഴിക്കാനാകും.
മിക്ക അമേരിക്കക്കാരും കുടുംബാംഗങ്ങളോടും സുഹൃത്തുക്കളോടും ഒപ്പം വലിയ വിരുന്നുകളിൽ ഒത്തുചേർന്നാണ് ഈ ദിവസം ആഘോഷിക്കുന്നത്. ടർക്കി വിരുന്നാണ് ഇതിലെ പ്രധാന ആകർഷണം. കൂടാതെ, ഭീമാകാരമായ ബലൂണുകളും ഫ്ലോട്ടുകളും സംഗീത സംഘങ്ങളും അണിനിരക്കുന്ന പരേഡും ഈ ദിവസത്തിൻ്റെ പ്രത്യേകതയാണ്.
താങ്ക്സ് ഗിവിങ് ദിനത്തിൽ ഏതൊക്കെ സ്വകാര്യ സ്ഥാപനങ്ങൾ തുറക്കും, അല്ലെങ്കിൽ അടഞ്ഞുകിടക്കും എന്ന് നോക്കാം.
വാൾമാർട്ട്, ടാർഗറ്റ്, മാസിസ് പോലുള്ള വലിയ റീട്ടെയിൽ ശൃംഖലകൾ താങ്ക്സ് ഗിവിങ് ദിനത്തിൽ അടഞ്ഞുകിടക്കുകയും പിറ്റേദിവസമായ ബ്ലാക്ക് ഫ്രൈഡേയിൽ വീണ്ടും തുറക്കുകയും ചെയ്യും. എന്നാൽ ചില ഗ്രോസറി ശൃംഖലകളും ചെറിയ കടകളും താങ്ക്സ് ഗിവിങ് ദിനത്തിൽ പ്രവർത്തിക്കും, കോസ്റ്റ്കോയുടെ എല്ലാ വെയർഹൗസുകളും താങ്ക്സ് ഗിവിങ് ദിവസം അടഞ്ഞുകിടക്കും. അമേരിക്ക ഫാർമ സ്റ്റോർ ശൃംഖലയായ വാൾഗ്രീൻസിൻ്റെ മിക്ക സ്റ്റോറുകളും അടഞ്ഞുകിടക്കും. എന്നാൽ ചിലയിടങ്ങളിലെ സ്റ്റോറുകൾ അത്യാവശ്യ ഫാർമസി സേവനങ്ങൾ നൽകുന്നതിനായി തുറന്നുപ്രവർത്തിക്കുമെന്ന് കമ്പനി സ്ഥിരീകരിച്ചു. നവംബർ 27ന് ടാർഗറ്റും തുറക്കില്ല. കൂടാതെ, വാൾമാർട്ടും പ്രവർത്തിക്കില്ല.
എബിസി10 റിപ്പോർട്ട് അനുസരിച്ച്, താങ്ക്സ് ഗിവിങ് ദിവസം അടഞ്ഞുകിടക്കുന്ന സ്റ്റോറുകൾ ഇവയാണ്; അക്കാദമി സ്പോർട്സ് & റീക്രിയേഷൻ അൽഡി, ബിജെസ് വെയർഹൗസ് ക്ലബ്, ബാത്ത് & ബോഡി വർക്സ്, ബെസ്റ്റ് ബൈ, കോസ്റ്റ്കോ, ഡിക്ക്സ് സ്പോർട്ടിങ് ഗുഡ്സ്, ഫുട്ലോക്കർ, ഹോം ഡിപ്പോ, ഹോംസെൻസ്, ഹൈ-വീ, ജെ സി പെനി, കോൾസ്,ലോസ്, മാസിസ്, മാർഷ്യൽസ്, മൈക്കിൾസ്, നോർഡ്സ്ട്രോം, പെറ്റ്കോ, പബ്ളിക്സ്, ആർഇഐ, സാംസ് ക്ലബ്, സിയെറ, സൈമൺ മാൾസ്, ടാർഗറ്റ്, ടിജെ മാക്സ്, ട്രേഡർ ജോസ്, വാൾഗ്രീൻസ്, വാൾമാർട്ട്, പറ്റഗോണിയ.
താങ്ക്സ് ഗിവിങ് ദിനത്തിൽ തുറന്നു പ്രവർത്തിക്കുന്ന സ്റ്റോറുകൾ ഏതൊക്കെയെന്ന് നോക്കാം. ആമസോൺ ഫ്രഷ് മിക്ക ലൊക്കേഷനുകളും പരിമിതമായ മണിക്കൂറുകളിൽ പ്രവർത്തിക്കുമെന്നാണ് റിപ്പോർട്ട്. സിവിഎസ് സ്റ്റോറുകളും ഫാർമസികളും തുറന്നു പ്രവർത്തിക്കും. ഡോളർ ജനറൽ മിക്ക സംസ്ഥാനങ്ങളിലും, സ്റ്റോറുകൾ താങ്ക്സ് ഗിവിങ് ദിനത്തിൽ തുറന്നു പ്രവർത്തിച്ചേക്കാം. ഡോളർ ട്രീ, ഫുഡ് ലയൺ, ജയന്റ് ഈഗിൾ, ഹാരിസ് ടീറ്റർ, മീജർ, വെഗ്മാൻസ്, ഹോൾ ഫുഡ്സ് എന്നിവയുടെ സ്റ്റോറുകളും തുറക്കും. ക്രോഗർ തുറന്നുക്കുമെങ്കിലും താങ്ക്സ് ഗിവിങ് ദിനത്തിൽ പരിമിതമായ മണിക്കൂറുകൾ മാത്രമാകും പ്രവർത്തിക്കുക.
അതേസമയം താങ്ക്സ് ഗിവിങ് ദിനത്തിൻ്റെ പിറ്റേദിവസം നവംബർ 28 ബ്ലാക്ക് ഫ്രൈഡേ ആണ്. അമേരിക്കയിൽ ക്രിസ്മസ് അവധിക്കാല ഷോപ്പിങ് സീസണിന് അന്നുമുതൽ തുടക്കമാകും. ബ്ലാക്ക് ഫ്രൈഡേ പ്രമാണിച്ച് ആമസോൺ, വാൾമാർട്ട്, ടാർഗറ്റ് തുടങ്ങിയ പ്രമുഖ റീട്ടെയിലർമാർ വലിയ ഓഫറുകളോടെ സെയിൽ ആരംഭിച്ചിട്ടുണ്ട്.
Leave a comment