ചണ്ഡീഗഢിനെ 240-ാം അനുച്ഛേദത്തില്‍ കൊണ്ടുവരാന്‍ കേന്ദ്രസര്‍ക്കാര്‍; വിട്ടുകൊടുക്കില്ലെന്ന് പഞ്ചാബ്

ചണ്ഡീഗഢ്: സംസ്ഥാന തലസ്ഥാനമായ ചണ്ഡീഗഢിനെ ഭരണഘടനയുടെ 240-ാം അനുച്ഛേദത്തിന് കീഴിൽ കൊണ്ടുവരാനുള്ള കേന്ദ്ര സർക്കാർ നീക്കത്തെ എതിർത്ത് പഞ്ചാബ്. മറ്റ് കേന്ദ്രഭരണ പ്രദേശങ്ങളുടെ പട്ടികയിലേക്ക് ചണ്ഡീഗഢിനെയും കൂട്ടിച്ചേർക്കുന്ന 131-ാം ഭേദഗതി ബിൽ പാർലമെന്റിന്റെ ശീതകാല സമ്മേളനത്തിൽ അവതരിപ്പിക്കും. പഞ്ചാബിൽ ഭരണകക്ഷിയായ എഎപിയും പ്രതിപക്ഷത്തുള്ള കോൺഗ്രസ്, ശിരോമണി അകാലിദൾ പാർട്ടികളും ഈ നീക്കത്തിൽ പ്രതിഷേധിക്കുകയാണ്. 

“ഈ ഭേദഗതി പഞ്ചാബിന്റെ താൽപര്യങ്ങൾക്ക് എതിരാണ്. ഞങ്ങൾ ഇതിനെ ശക്തമായി എതിർക്കുന്നു. പഞ്ചാബിനെതിരെ കേന്ദ്ര സർക്കാർ മെനയുന്ന ഈ ഗൂഢാലോചന വിജയിക്കാൻ ഞങ്ങൾ അനുവദിക്കില്ല.  പഞ്ചാബിലെ ഗ്രാമങ്ങൾ നശിപ്പിച്ച് നിർമ്മിച്ച ചണ്ഡീഗഢിന്മേൽ പഞ്ചാബിന് മാത്രമാണ് അവകാശം. ഞങ്ങളുടെ അവകാശങ്ങൾ ഞങ്ങൾ വിട്ടുകൊടുക്കില്ല. അതിനായി എന്ത് നടപടികൾ സ്വീകരിക്കാനും ഞങ്ങൾ തയ്യാറാണ്,” മുഖ്യമന്ത്രി ഭഗവന്ത് മൻ എക്‌സിൽ കുറിച്ചു.

ചണ്ഡീഗഡിനെ ഭരണഘടനയുടെ 240-ാം അനുച്ഛേദത്തിന്റെ പരിധിയിൽ കൊണ്ടുവന്നാൽ ഇത് കേന്ദ്രഭരണ പ്രദേശത്തിനായി നേരിട്ട് ചട്ടങ്ങൾ രൂപവത്കരിക്കാൻ രാഷ്ട്രപതിക്ക് അധികാരം നൽകും. ഭരണഘടനയുടെ 240-ാം അനുച്ഛേദം അനുസരിച്ച് (എ) ആൻഡമാൻ നിക്കോബാർ ദ്വീപുകൾ, (ബി) ലക്ഷദ്വീപ്, (സി) ദാദ്ര, നഗർ ഹവേലി, (ഡി) ദാമൻ, ദിയു, (ഇ) പുതുച്ചേരി എന്നീ കേന്ദ്രഭരണ പ്രദേശങ്ങളുടെ സമാധാനം, പുരോഗതി, സദ്ഭരണം എന്നിവയ്ക്കായി രാഷ്ട്രപതിക്ക് ചട്ടങ്ങൾ രൂപവത്കരിക്കാവുന്നതാണ്. പാർലമെന്റ് ബുള്ളറ്റിൻ അനുസരിച്ച്, ഡിസംബർ 1-ന് ആരംഭിക്കുന്ന ശീതകാല സമ്മേളനത്തിൽ ഭരണഘടന (131-ാം ഭേദഗതി) ബിൽ 2025 അവതരിപ്പിക്കാനാണ് കേന്ദ്രം പദ്ധതിയിടുന്നത്.

നിലവിൽ പഞ്ചാബിന്റെയും ഹരിയാണയുടെയും സംയുക്ത തലസ്ഥാനമായ ചണ്ഡീഗഡിന്റെ അഡ്മിനിസ്‌ട്രേറ്റർ പഞ്ചാബ് ഗവർണറാണ്. 1966-ൽ പഞ്ചാബ് വിഭജിച്ച് ഹരിയാണ രൂപവത്കരിച്ചപ്പോഴാണ് ചണ്ഡീഗഢ് ഒരു കേന്ദ്രഭരണ പ്രദേശമായി മാറിയത്. ചണ്ഡീഗഡ് സംസ്ഥാനത്തിന്റേതാണെന്നും ഹരിയാണയ്ക്ക് പ്രത്യേക തലസ്ഥാനം വേണമെന്നും പഞ്ചാബിലെ രാഷ്ട്രീയ നേതാക്കൾ പണ്ടേ ആവശ്യപ്പെടുന്നുണ്ട്.

നിലവിലെ സംവിധാനത്തിന് മുമ്പ്, കേന്ദ്ര ആഭ്യന്തര മന്ത്രാലയത്തിന് നേരിട്ട് റിപ്പോർട്ട് ചെയ്യുന്ന ഒരു ചീഫ് കമ്മിഷണറായിരുന്നു ചണ്ഡീഗഡിനുണ്ടായിരുന്നത്. 1984-ൽ പഞ്ചാബിൽ ഭീകരവാദം രൂക്ഷമായപ്പോൾ ഈ തസ്തിക നിർത്തലാക്കുകയും പകരം പഞ്ചാബ് ഗവർണറുടെ ഉപദേഷ്ടാവിനെ നിയമിക്കുകയും ചെയ്തു. അദ്ദേഹത്തിനായിരുന്നു കേന്ദ്രഭരണ പ്രദേശത്തിന്റെ അഡ്മിനിസ്‌ട്രേറ്ററുടെ ചുമതല നൽകിയത്.

2016 ഓഗസ്റ്റിൽ, മുൻ ഐഎഎസ് ഉദ്യോഗസ്ഥനായ കെ.ജെ. അൽഫോൻസിനെ ഉന്നത തസ്തികയിൽ നിയമിച്ച് ഒരു സ്വതന്ത്ര അഡ്മിനിസ്‌ട്രേറ്ററെ നിയമിക്കുന്ന പഴയ രീതി പുനഃസ്ഥാപിക്കാൻ കേന്ദ്രം ശ്രമിച്ചിരുന്നു. എന്നാൽ, അന്നത്തെ മുഖ്യമന്ത്രി പ്രകാശ് സിങ് ബാദലിന്റെ കടുത്ത എതിർപ്പിനെത്തുടർന്ന് ഈ നീക്കം പിൻവലിച്ചു.

ഭരണകക്ഷിയായ എഎപിയും പ്രതിപക്ഷമായ കോൺഗ്രസും അകാലിദളും കേന്ദ്രത്തിന്റെ നീക്കത്തെ പഞ്ചാബ് വിരുദ്ധം എന്ന് രൂക്ഷമായി വിമർശിച്ചു. ഈ നീക്കം തികച്ചും അനാവശ്യമാണ് എന്ന് പഞ്ചാബ് കോൺഗ്രസ് അധ്യക്ഷൻ അമരീന്ദർ സിങ് രാജ വാറിങ് പറഞ്ഞു. “ചണ്ഡീഗഡ് പഞ്ചാബിന്റേതാണ്, അത് തട്ടിയെടുക്കാനുള്ള ഏതൊരു ശ്രമത്തിനും ഗുരുതരമായ പ്രത്യാഘാതങ്ങൾ ഉണ്ടാകും,” അദ്ദേഹം പറഞ്ഞു. ഈ വിഷയത്തിൽ തങ്ങളുടെ നിലപാട് വ്യക്തമാക്കാൻ ലുധിയാന എംപി പഞ്ചാബിലെ ബിജെപി നേതാക്കളോട് ആവശ്യപ്പെട്ടു. പഞ്ചാബ് വിരുദ്ധ ബില്ലിനെയും ഫെഡറൽ ഘടനയ്‌ക്കെതിരായ ആക്രമണത്തെയും എല്ലാ തലങ്ങളിലും നേരിടുമെന്ന് മുൻ ഉപമുഖ്യമന്ത്രിയും അകാലിദൾ അധ്യക്ഷനുമായ സുഖ്ബീർ സിങ് ബാദൽ പറഞ്ഞു.

കേന്ദ്രത്തിന്റെ നീക്കം പഞ്ചാബിന്റെ സ്വത്വത്തിന്മേലുള്ള ആക്രമണമാണെന്ന് മുൻ ഡൽഹി മുഖ്യമന്ത്രിയും എഎപി അധ്യക്ഷനുമായ അരവിന്ദ് കെജ്‌രിവാൾ പറഞ്ഞു. “ചരിത്രം സാക്ഷിയാണ്. പഞ്ചാബികൾ ഒരിക്കലും ഏകാധിപത്യത്തിന് മുന്നിൽ തലകുനിച്ചിട്ടില്ല. ഇന്നും അത് ചെയ്യില്ല. ചണ്ഡീഗഢ് പഞ്ചാബിന്റേതാണ്, അത് അങ്ങനെ തന്നെ തുടരും, രാജ്യത്തിന്റെ സുരക്ഷയ്ക്കും ധാന്യത്തിനും വെള്ളത്തിനും വേണ്ടി എപ്പോഴും ത്യാഗം ചെയ്ത പഞ്ചാബിന് അതിന്റെ അവകാശം നിഷേധിക്കപ്പെടുകയാണ്”, കെജ്‌രിവാൾ കൂട്ടിച്ചേർത്തു.

എന്നാൽ, ചണ്ഡീഗഢിനെ അനുച്ഛേദം 239-ന് പകരം അനുച്ഛേദം 240-ന് കീഴിൽ കൊണ്ടുവരുന്നത് അതിന്റെ ഭരണപരമായ പദവിയിൽ മാറ്റം വരുത്തില്ലെന്ന് മുൻ പഞ്ചാബ് കേഡർ ഐഎഎസ് ഉദ്യോഗസ്ഥൻ മാധ്യമങ്ങളോട് പ്രതികരിച്ചു. പഞ്ചാബ് ഗവർണർ ചണ്ഡീഗഡിന്റെ എക്‌സ്-ഒഫീഷ്യോ അഡ്മിനിസ്‌ട്രേറ്റർ ആയിരിക്കണമെന്ന് ഇപ്പോൾ പോലും ഭരണഘടനാപരമായ ഉറപ്പില്ലെന്ന് അദ്ദേഹം ചൂണ്ടിക്കാട്ടി. നിയമസഭകളില്ലാത്ത കേന്ദ്രഭരണ പ്രദേശങ്ങൾക്കായി ചട്ടങ്ങൾ രൂപവത്കരിക്കാൻ രാഷ്ട്രപതിക്ക് അധികാരം നൽകുക മാത്രമാണ് 240-ാം അനുച്ഛേദം ചെയ്യുന്നതെന്നും ഒരു ഭരണഘടനാ ഭേദഗതിക്കും മാറ്റാൻ കഴിയാത്ത സ്വാഭാവികവും ചരിത്രപരവുമായ അവകാശം നഗരത്തിന്മേൽ പഞ്ചാബിനുണ്ടെന്നും അദ്ദേഹം പറഞ്ഞു.