ന്യൂഡൽഹി: പ്രതിരോധ വ്യാവസായിക സഹകരണം ശക്തിപ്പെടുത്തുന്നതിനുള്ള സംയുക്ത ഉടമ്പടിയിൽ ഇന്ത്യയും ഗ്രീസും തിങ്കളാഴ്ച ഒപ്പുവെച്ചു. ഇരുരാജ്യങ്ങളും തമ്മിലുള്ള പങ്കാളിത്തം വർധിപ്പിക്കുന്നതിനുള്ള അഞ്ചുവർഷത്തെ പദ്ധതി ആസൂത്രണം ചെയ്യുന്നതിനുള്ള ചുവടുവെപ്പാണിത്. പ്രതിരോധമന്ത്രി രാജ്നാഥ് സിങ് ഗ്രീക്ക് പ്രതിരോധമന്ത്രി നിക്കോളോസ്-ജോർജിയോസ് ഡെൻഡിയാസുമായി നടത്തിയ ഉഭയകക്ഷി ചർച്ചകൾക്ക് ശേഷമാണ് കരാർ ഒപ്പുവെച്ചത്.
ഒരു അന്താരാഷ്ട്ര ലെയ്സൺ ഉദ്യോഗസ്ഥനെ ഗുരുഗ്രാമിലെ ഇൻഫർമേഷൻ ഫ്യൂഷൻ സെന്റർ-ഇന്ത്യൻ ഓഷ്യൻ റീജിയണിൽ വിന്യസിക്കുമെന്ന ഗ്രീസിന്റെ പ്രഖ്യാപനത്തെ രാജ്നാഥ് സിങ് സ്വാഗതം ചെയ്തു. ഈ നടപടി ഇരുരാജ്യങ്ങൾക്കിടയിലെ സമുദ്രസഹകരണം വർധിപ്പിക്കും.
“ഇന്ന് ഗ്രീക്ക് പ്രതിരോധമന്ത്രി ബഹുമാനപ്പെട്ട നിക്കോളോസ്-ജോർജിയോസ് ഡെൻഡിയാസുമായി കൂടിക്കാഴ്ച നടത്തിയതിൽ സന്തോഷമുണ്ട്. ഇന്ത്യയും ഗ്രീസും പ്രതിരോധ വ്യാവസായിക സഹകരണം ശക്തിപ്പെടുത്തുന്നതിനുള്ള സംയുക്ത ഉടമ്പടിയിൽ ഒപ്പുവെക്കുകയും 2026 വർഷത്തേക്കുള്ള ഉഭയകക്ഷി സൈനിക സഹകരണ പദ്ധതി കൈമാറുകയും ചെയ്തു. ഇരുരാജ്യങ്ങൾക്കിടയിൽ സമുദ്ര സഹകരണം വർധിപ്പിക്കുന്നതിനായി ഗുരുഗ്രാമിലെ ഇൻഫർമേഷൻ ഫ്യൂഷൻ സെന്റർ-ഇന്ത്യൻ ഓഷ്യൻ റീജിയണിൽ ഒരു ഗ്രീക്ക് അന്താരാഷ്ട്ര ലെയ്സൺ ഉദ്യോഗസ്ഥനെ വിന്യസിക്കുമെന്ന പ്രഖ്യാപനത്തെ ഞാൻ സ്വാഗതം ചെയ്യുന്നു,” രാജ്നാഥ് സിങ് എക്സ് പോസ്റ്റിൽ കുറിച്ചു.
ഇന്ത്യ-ഗ്രീസ് തന്ത്രപരമായ പങ്കാളിത്തം സമാധാനം, സ്ഥിരത, സ്വാതന്ത്ര്യം, പരസ്പര ബഹുമാനം എന്നീ മൂല്യങ്ങൾ അടിസ്ഥാനമാക്കിയുള്ളതാണെന്ന് ഇരുനേതാക്കളും പറഞ്ഞു. ഇന്ത്യയുടെ ആത്മനിർഭർ ഭാരതും ഗ്രീക്ക് പ്രതിരോധ പരിഷ്കാരങ്ങളും തമ്മിലുള്ള പങ്കാളിത്തത്തിലൂടെ ഇരുരാജ്യങ്ങളുടെയും തദ്ദേശീയ പ്രതിരോധ വ്യവസായങ്ങളുടെ ശേഷി വികസിപ്പിക്കാൻ ഇരുരാജ്യങ്ങളും തീരുമാനിച്ചതായി പ്രതിരോധ മന്ത്രാലയം അറിയിച്ചു.
മേഖലയിലെ സമാധാനത്തിന്റെയും സുരക്ഷയുടെയും വിവിധ വിഷയങ്ങൾ ഇരുമന്ത്രിമാരും ചർച്ച ചെയ്തു. 2026 ലെ ഉഭയകക്ഷി സൈനിക സഹകരണ പദ്ധതിയും കൈമാറി. യോഗത്തിന് മുമ്പ്, ഗ്രീക്ക് പ്രതിരോധ മന്ത്രി നാഷണൽ വാർ മെമ്മോറിയലിൽ പുഷ്പചക്രം അർപ്പിക്കുകയും രാജ്യസേവനത്തിനായി ജീവൻ ബലിയർപ്പിച്ച ധീരരെ ആദരിക്കുകയും ചെയ്തു. മനേക് ഷാ സെന്ററിൽ ട്രൈ-സർവീസ് ഗാർഡ് ഓഫ് ഓണർ പരിശോധിക്കുകയും ചെയ്തു.
ഗ്രീക്ക് പ്രതിനിധിസംഘം ബെംഗളൂരുവിലെ പ്രധാന പ്രതിരോധ, വ്യാവസായിക സ്ഥാപനങ്ങളും സന്ദർശിക്കുകയും ന്യൂഡൽഹിയിൽ ഡിപിഎസ്യു, പ്രതിരോധ വ്യവസായം, സ്റ്റാർട്ടപ്പ് പ്രതിനിധികളുമായി സംവദിക്കുകയും ചെയ്തു. ഇരു രാജ്യങ്ങൾക്കും അവരുടെ ജനങ്ങൾക്കുമിടയിലുള്ള ദീർഘകാലത്തെ ഊഷ്മളവും തീവ്രവുമായ ബന്ധത്തെ അടിസ്ഥാനമാക്കിയുള്ള ഇന്ത്യ-ഗ്രീസ് തന്ത്രപരമായ പങ്കാളിത്തത്തെ ഈ സന്ദർശനം ഊട്ടിയുറപ്പിക്കുന്നുവെന്ന് ഗ്രീക്ക് ഗ്രീക്ക് പ്രതിനിധിസംഘം പറഞ്ഞു.
