ന്യൂഡൽഹി : റിപ്പബ്ലിക് ദിന പരേഡിൽ പുരുഷ സിആർപിഎഫ് യൂണിറ്റിനെ ഇരുപത്തിയാറുകാരി സിമ്രൻ ബാല നയിക്കും. ജമ്മു-കാശ്മീരിലെ രജൗരി ജില്ലയിലെ അതിർത്തി നഗരമായ നൗഷേര സ്വദേശിനിയാണ്. രജൗരി ജില്ലയിൽ നിന്ന് സിആർപിഎഫ് ഓഫിസർ പദവിയിലെത്തുന്ന ആദ്യ വനിതയും.
2023ൽ ആദ്യ ശ്രമത്തിൽ ദേശീയതലത്തിൽ 82–ാം റാങ്ക് നേടിയാണ് യുപിഎസ്സി സെൻട്രൽ ആംഡ് പൊലീസ് ഫോഴ്സ് (സിഎപിഎഫ്) പരീക്ഷ ജയിച്ചത്. നിലവിൽ സിആർപിഎഫ് അസിസ്റ്റന്റ് കമൻഡാന്റാണ്. രാജ്യത്തെ ഏറ്റവും വലിയ അർധസൈനിക വിഭാഗത്തിലെ 140ലേറെ പുരുഷ ഉദ്യോഗസ്ഥരെ നയിച്ചാണ് 26ന് കർത്തവ്യപഥിലൂടെ സിമ്രൻ ബാല മാർച്ച് ചെയ്യുക.
